- alafadila
- 5 مايو
- 4 دقيقة قراءة
تاريخ التحديث: 18 يونيو
اجمل عشرة قرى في المانيا
خلينا نكون صريحين، ألمانيا مش أكثر دولة محبوبة سياحياً..مش راح أحكيلك زي كثير "إنفلونسر" إن الكل غلطان وإن ألمانيا الخ الخ الخ...هو فعلاً ان المانيا مش جذابة سياحياً مثل جيرانها فرنسا وهولندا والنمسا وسويسرا؛ راح تلاحظ إن مدن ألمانيا مش أجمل مدن، وطبيعتها مش أجمل طبيعة. الحروب العالمية ومخلفاتها أثرت كثير في صورة المدن الألمانية. لكن لحسن الحظ، هنا وهناك موجودة شوية قرى بقيت على صورتها زي ما هي. ولو صادف وجيت ألمانيا، وبحسب وين أنت موجود، لا تنسى إنك تمر على قسم من القرى الساحرة هذه...اليوم جايبلك قائمة بأجمل عشرة قرى ألمانية بحسب آراء الكثيرين، ومن بينهم الالمان نفسهم..
١. "مونريال" (Monreal)
قرية صغيرة موجودة في وادي "إلتز" (Eltz) في ولاية راينلاند فالتز (Rheinlandfalz). منظر القرية ببيوتها التاريخية إللي قوام أساسها وحيطانها من الخشب القوي، وإلللي ما بينها متوزعة أزقة صغيرة، و جداول بتمر فوقها جسور صغيرة، بتعطي للقرية بالذات بفترة الربيع منظر وكانه من حكايا الأطفال. إسم هذه البيوت بالألماني "فاخ فيرك هاوس" (Fachwerkhaus). إنسى المصطلح، لأنك مش راح تقدر تلفظه. بما إننا إحنا بنحكي هنا عن قرية عمرها أكثر من ١٠٠٠ سنة، الأكيد إن منظر البيوت هذه شيء غير مألوف لشعوبنا. فوق تل صغير قريب موجودة قلاع "لوفينبورغ" و "فيليبسبورغ" إللي ممكن المرور عليها. ومنطقة التلال المحيطة بالقرية بتضم طرق ممهدة صغيرة مخصصة لمحبين التمشي في الطبيعة.
٢. "باخاراخ" (Bacharach)
يا دوب ٢٠٠٠ نسمة بيسكنوا هذه القرية، وإللي البعض بيعتبرها مدينة صغيرة. بجانب وقوعها على نهر الراين المحبوب في ألمانيا، موجود هنا مبنى بيخطف الأبصار بسبب وقوعه فوق سقوف البيوت؛ "برج شتاليك" (Burg Stahleck). في المدينة الصغيرة هذه موجودة عدة مباني تاريخية، أهمها كنيستين مميزتين الشكل والهندسة، والتصميم برضه. المدينة الزغنطوطة هذه مشهورة بصناعة النبيذ، إللي هو شيء يعني ما إلنا دخل فيه، لكنه يعتبر مغناطيس سياحي للأوروبيين.
٣. "ميرسبورغ" (Meersburg)
ترجمة الإسم هي البرج البحري، أو هيك شيء مشابه. بسبب موقعها على "بودينزي" (Bodensee)، في كثير بيعتبروا هذه المدينة الصغيرة هي الأجمل في ولاية "بادين فوتنبيرغ". وبسبب وقوعها على منطقة مرتفعة تعتبر الإطلالة على البحر هنا برضة من الأجمل. معالم سياحية وفعاليات كثيرة موجودة هنا بتتيح للواحد إن يقضي بالراحة يوم كامل في ميريسبورغ، أهمها: مباني القلعة القديمة والجديدة، الممشى على إمتداد البحيرة، بوابة المدينة السفلى والعليا، متحف زبلين، وعدد كبير من المباني التاريخية، أغلبها ذو طابع ديني.
٤. "روتنبورغ اوب دير تاوبر" (Rotenburg ob der Tauber)
كمان مدينة صغيرة في ولاية "بافاريا"، عدد سكانها ١١ ألف نسمة. هنا أول شيء راح تلاحظة هو كثرة السواح إللي بيدخلوا المدينة ليوم واحد ليتعرفوا على قلبها التاريخي. هذا المركز التاريخي والمحاط ب جدار حامي مبهر بأبراجه وبوابته من العصور الوسطى، بيحتوي على شوارع وميادين كاملة مليانة بالمباني التاريخية. في كل زاوية هنا راح تشوف شواهد تاريخية بتدل على طريقة حياة البشر قديماً.
أهم لمحة تاريخية ومعلم مشهور في المدينة هو "برونلاين" (Prönlein) وهو عبارة عن ايييه..ممكن نسميه ميدان صغير جداً! الميدان هذا بيبدأ عند تفرع شارعين بيتوسطهم مبنى تاريخي أصفر مميز، وبجانبه موجود برج الساعة التاريخي واللي واحد من الشارعين بيمر من تحته. صورة لهذا التفرع هي ممن اشهر الصور السياحية في المانيا بشكل عام.
٥. "شيلتاخ" (Schiltach)
قرية، أو ممكن نعتبرها مدينة صغيرة، عدد سكانها بيبلغ ٣٥٠٠ نسمة وواقعة في قلب الغابة السوداء جنوبي المانيا. القرية غنية جداً بالمباني التاريخية إياها اللي دخلت في إنشاءها أعمدة خشب ضخمة من أجل تدعيمها، الشيء اللي ظاهر للعين في منظر محبب للبيوت هذه من الخارج.
في ميدان "شيلتاخر ماركت بلاتز" (schiltacher Marktplatz) الرئيسي واللي بيحوي برضة مبنى البلدية موجودة عدة مباني من الطراز اللي ذكرته واللي بيميزها - بجانب تصميمها - هو الالوان الفاتحة الجذابة، بجانب رسوم تاريخية على حائط هنا او هناك. موجودة برضة عدة متاحف وكنائس تاريخية، لكن الأجمل هو التمشي بمحاذاة النهر الموجود او التمشي في شوارع القرية صعوداً للقمة لأنها موجودة في منطقة جبلية.
٦. "سانت جوارسهاوزن" (St. Goarshausen)
القرية الموجودة في ولاية "راينلاند فالتز" واقعة على نهر الراين. وبرغم من انها صغيرة جداً الا ان منظر البيوت التاريخية المتراصة جنب بعض على ضفاف النهر هو من أجمل المناظر في الولاية. المفروض الواحد ما يتردد إن يجلس أمام واحد من المطاعم أو المقاهي الموجودة على ضفاف النهر في يوم صيفي، ويتأمل البشر والمناظر إللي حواليه.
من أشهر المباني هنا هو مبنى كنيسة "فيهر-كيرشة سانت مارتين" وإللي عمرها أكثر من ٨٠٠ سنة. لكن المبهر بصرياً هو قلعة أو برج "كاتس" اللي بيعتلي الجبل الموجود خلف القرية هذه.
٧." ليهدة أم شبريفالد" (Lehde im Spreewald)
أنا متأكد إنك سمعت ب مدينة "خيثورن" في هولندا وشفت صور أو فيديوهات لقوارب داخل قنوات بتتفرع ما بين البيوت التاريخية. قرية " ليدة أم شبريفالد" بتذكرنا بشكل كبير ب خيثورن هذه.القرية هذه استبدلت الشوارع بقنوات مائية. حتى البريد وتصريف النفايات بيتم عن طريق القوارب. ويا دوب ١٥٠ شخص ساكنين بهذه القرية..تخيل!
٨. "جارميش بارتينكيرشين" (Garmisch Partenkirchen)
هذه القرية الجبلية في ولاية "بافاريا" على سفح جبال الألب بتتيح لزوارها عدد كبير من المناظر ال..يعني..خليني اقول "سويسرية"!
ملائمة لكل واحد بيحب المشي في أحضان الطبيعة. لكن في الشتاء ملائمة برضة لمحبي رياضة التزلج على الجليد. راجع صفحات الانترنت الخاصة بهذه القرية لتسافر لها خلال واحدة من الإحتفاليات الشعبية الكثيرة اللي تقام فيها.
٩. "روديسهايم أم راين" (Rodesheim am Rhein)
كمان قرية ساحرة تاريخية واقعة في وادي على نهر الراين، وإللي بتتميز بكثرة الخضرة والطبيعة المحيطة فيها لكثرة حقول العنب..القرية مشهورة بانتاج النبيذ وواقعة لهيك على ما يسمي "دويتشة فاين شتراسة" بما معناه شارع النبيذ الالماني..
أشهر شوارع هذه القرية هو شارع "دروسل غاسة" الضيق والمليان بالبيوت التاريخية إياها وإللي بتضم داخلها مخازن نبيذ، لكن برضة مطاعم أمانية.. بالإمكان إستخدام التلفريك هنا للصعود ل "نيدرفالد-دينكمال"، ومن هنا موجود منظر بانورامي للمنطقة المميزة بحقول وأسراب شجر العنب.
١٠. بريم (Bremm)
هذه القرية ما بتختلف كثير عن القرى اللي ذكرتها. لكن ميزتها في وقوعها على نهر "موزل" وبالاحرى على "موزل شلايفة" وهي عبارة عن إنحناء للنهر بشكل شبه دائري في منظر طبيعي قلما الواحد شافه. بالذات لمحبين التمشي والتسلق هذه المنطقة مناسبة جداً. على فكرة منظر النهر هذا مشهور في ألمانيا لدرجة إن تم تخصيص طوابع بريدية بتحمل صورته.
