- alafadila
- 6 أبريل
- 14 دقيقة قراءة
تاريخ التحديث: 18 يونيو
مدينة المستقبل سنغافورة
مقدمة مبسطة
شوف..قصة سنغافورة والتطور الخرافي الغير مسبوق إللي شهدته في آخر ٥٠ سنة ووصلها للصورة الحالية, هي قصة مشهورة والإنترنت أخذ قصتها رايح جاي، فاااا..مش راح أتطرق لهذا التاريخ وأحرق وقتك ووقتي! إحنا جايين اليوم نحكي عن سنغافورة "السوبر سيتي" من الناحية السياحية..في سنغافورة يا صديقي كل شيء مبهر أكثر وأكثر..مبانيها أعلى وأعلى..فنادقها أفخم وأفخم..قوانينها أصرم وأصرم (هو في كلمة هيك؟؟)، والنظام فيها أدق وأدق..شوارعها من الأنظف، ومنتزهاتها الكثيرة..من الأخضر!..بكل صراحة..عن نفسي؟ سنغافورة هي واحدة من المدن القليلة إللي قدرت أتخيل إنني ممكن أعيش فيها وأكون مبسوط و "متأنتخ" ليلاً نهاراً. بس العين بصيرة واليد قصيرة. سنغافورة غالية غالية غالية..من كل ناحية!
سنغافورة الدولة هي أصغر دول جنوب شرق آسيا، وسنغافورة المدينة (العاصمة) هي أكثر مدن جنوب شرق آسيا إبهاراً للعين؛ مجموعة ناطحات سحاب على مجمعات تجارية فاخرة لأبعد الحدود، ومباني تفننوا في تصميمها، يمكن بس لتتصور وتنحط على الإنستاجرام! كل هذا وسط نظام ونظافة ما إلها مثيل (إلا في اليابان العزيزة)، ونظام مترو عصري لأقصى حد، ما بين شوارع ومنتزهات مزدانة ومليانة بالأشجار الكثيفة، ووسط مجموعة محترمة من القوانين إللي بترغم ساكنيها وسواحها على "المشي على العجين ميلخبطهوش"...لكن..وهذه هي كلمتي المفضلة..لكن..سنغافورة هي مش بس مدينة للروبوتات البشرية إللي بتحترم نفسها لأنها بتمشي على القانون رامية تعظيم سلام على طول! لأ..برضه في سنغافورة موجودة مناطق شعبية، قريبة جداً جداً للقلب، وفيها لمحة تاريخية أو تراثية، مثل "كامبونغ غلام"، المنطقة ذات الطابع العربي أو الإسلامي، أو "تشاينا تاون"، أو "ليتل إنديا"..بإختصار: سنغافورة ملائمة للشاب والصبية، للطفل والكبير، للسينغل وللعائلة..هنا موجود كل شيء لكل واحد. تعال نتعرف على أهم تفاصيل هذه المدينة..
الموسم السياحي
جرب إفحص في الإنترنت، وراح تشوف إن كل واحد بيحكي شيء ثاني..لكن على الأغلب وبحسب المتفق عليه؛ الفترة ما بين شهر ٢ أو ٣ حتى شهر ٧ راح تكون ملائمة أكثر، في الغالب. مع العلم إن كمية المطر، والرطوبة تقريباً متساوية كل أيام السنة..لكن الفترة ما بين شهور ٣ و٧ بيكون هطول المطر فيها أقل حبتين. لكن خليني أحكيلك إن الرطوبة هنا عالية..من باب العلم بالشيء مش أكثر.
وهاااذا شيء أنا واجهته شخصياً؛ يوم الإثنين كل التطبيقات حكت إن راح يكون مطر بنسبة ٧٠ بالمية..ولا نزلت حبة مطر واحدة! يوم الثلاثاء يا معلم، حكوا راح يكون مطر بنسبة عشرين بالمية بس، فيضاناااات فوق راسي! لكن هذه هي سنغافورة..ولو مطرت، راح تشمس بعدها بشوية لا تخاف. أهم شيء، خللي المظلة رفيقة دربك..
المدة
٥ أيام إلى أسبوع، ولو كان معك وقت - وأهم شيء فلوس - ممكن تبقى هنا فترة أطول شوية. إعمل حسابك إن سنغافورة قريبة جداً من تايلاند وفيتنام و إندونيسيا وماليزيا. لهذا الشيء إللي بييجي هنا بيعمل حسابه يمر على مدن أو دول أخرى..لو الجيبة بتسمح..مش عاوزين خراب بيوت!
العملة النقدية والأسعار
العملة النقدية هي "سنغابور دولار" وبتساوي حالياً ٠،٧٦ دولار أمريكي. من الآن فصاعداً لما أحكي هنا كلمة دولار، قصدي دولار سنغافوري..إتفقنا؟
سنغافورة يمكن تكون حالياً أغلى دولة ممكن الواحد يفوتها. لكن برضه هنا موجودة طرق ممكن الواحد يجربها لحتى يقتصد شوية. لكن بتضل المدينة أكيد غالية، لو قارنناها بأي دول أخرى.
أسعار الفنادق في المناطق المركزية وحواليها أغلى (تقديري الشخصي بنسبة ٢٥ إلى ٣٠ بالمائة من دول أوروبا وآسيا).
لكن أحياناً ممكن يصادف الواحد فندق هنا أو هناك أرخص من المتعارف عليه، بالذات في منطقة "جي لانغ" (Geylang) ، أو "جو شيات" (Joo Chiat)، أو حتى في منطقة "كامبونغ غلام" (Kampong Glam). أنت بس أعمل إللي عليك وركز على إنك تحجز فندق قبل رحلتك بفترة أطول، لتضمن سعر أفضل.
بالنسبة للمطاعم؛ الأسعار العادية هنا برضة أغلى..الفطور العادي ممكن تكون تكلفته تقارب ال ١٥ دولار على الأقل. القهوة ٥ دولار على الأقل. برضه هنا موجودة طبعا إمكانيات أرخص، لكن أنا بحكي عن المتوسط إللي بنشوفه في أغلب الأماكن.
لكن الأكل ولا مرة كان مشكلة، بالذات في المناطق الشعبية مثل "تشاينا تاون"، "ليتل إنديا" أو "كامبونغ غلام" الاسعار بتكون أقل بمراحل..البيتسا إللي سعرها بأقل مطعم في "اورشارد رود" (Orchard Rd) الفخم ممكن توصل براحة ل ٢٥ دولار، ممكن تلاقيها في "كامبونغ غلام" ب ١٠ دولار..لاحظ الفرق!
ممكن الواحد يجرب الأكل الشعبي في "هوكر سنتر" (Hawker Center) المتوزعة في كل أنحاء المدينة، وهي عبارة عن أسواق فيها مطاعم صغيرة كثيرة ومتنوعة، وما بينها متوزعة طاولات وكراسي مشتركة بشكل عشوائي. الأسعار هنا بسيطة، لكن الاجواء نفس الشيء..ما تتوقع قعدات خمس نجوم. والأكل أغلبه صيني على هندي على ماليزي على باكستاني على ياباني.
الوصول والمواصلات
نظام المترو أو "إم آر تي" (MRT)
شخصياً أنا شفت نظام المترو في سنغافورة أفضل من أي مكان أنا دخلته قبل. الدقة، النظام، النظافة، طرق الإستخدام، الأسعار المعقولة، الشكل والراحة. جدير بالذكر إن نظام المترو ملائم جداً للعائلات. المحطات مكيفة ومزودة بالمصاعد والإنترنت.
على فكرة، الحكومة قررت بناء شبكة المترو هذه بعد ما لاحظت إن الدولة بتستقبل ضعف عدد ساكنيها من السواحَ!
في سنغافورة موجودة ٦ خطوط مترو بتحمل ما يقارب ال ٣ مليون إنسان يومياِ، وبتمر على ١٦٠ محطة في أنحاء المدينة في نظام بيبلغ ٢٤٠ كيلومتر.
لتسهيل الحركة جعلوا لكل خط لون معين، ولكل محطة رقم وإسم معين. حقيقة، ما في لزوم أشرح كثير عن أسماء المحطات أو "هو من فين يودي على فين". أكتب داخل "جوجل مابس" عاوز توصل لأي مكان وراح يطلع معك الخطوط إللي ممكن تستعملها. أغلب المعالم السياحية ممكن الوصول إلها بالمترو لوحده. تقريباً ما حدا بيستخدم الباصات من السواح. جدير بالذكر إن شبكة القطار مربوطة برضه بالمطار. وعلى فكرة إللي بيحب المشي، متعة خالصة تجربة المشي ما بين أحياء ومناطق المدينة، ما بين المنتزهات الصغيرة والمباني المبهرة. وبشكل عام يفضل تجنب ركوب المترو في أوقات الذهاب والرجوع من العمل، لأن المترو بيكون مليان بأبناء البلد الرايحين أو الراجعين من الشغل.
بالنسبة لشراء التذاكر:
هو بالإمكان إستخدام بطاقات الإئتمان لركوب المترو. لكن أنا بنصحك بشراء بطاقة "إز لينك" (ez link) أو "نيتس" (Nets) من المكاتب الموجود في المحطات (خلي بالك إن المكاتب بتأخذ كاش، مش ممكن الدفع ببطاقة الإئتمان).
سعرها ٦ دولار. ثلاثة دولار ما بيرجعوا، والبطاقة ممكن إستخدامها لأربع سنين. البطاقة هذه ممكن دائماً شحنها على الأجهزة الموجودة في محطات المترو، وإللي بتستقبل بدورها بطاقات الإئتمان وبرضة كاش. سعر السفرية الواحدة تقريباً ٢،٥ دولار سنغافوري..
الخلاصة يا معلم: في سنغافورة لا تستأجر سيارة..إستخدم المترو..
المبيت
لأن سنغافورة غالية ما تتوقع إنك ممكن تقتصد هنا ولا هناك وبشكل ملحوظ لو سكنت منطقة معينة. صحيح إن الفنادق في مناطق مثل "جي لانج" أو "جو شيات" أو "ليتل إنديا" أو "كامبونغ غلام" ممكن تكون أرخص شوية..لكن في النهاية الفرق مش كبييييير جداً. لكن بشكل عام طبعاً مفضل الواحد يتجنب المناطق المعروف إنها غالية مثل "أورشارد رود" ومنطقة "مارينا باي" أو "سنتوسا آيلاند".
شو أعمل في سنغافورة
لأن الحركة داخل المدينة سهلة جداً، كل إللي راح نذكره هنا ممكن الوصول له بواسطة إستخدام المترو بسهولة وسرعة. إخترتلك أهم المعالم السياحية وأشهرها.
في كثييير أشياء أخرى موجودة ممكن المرور عليها لكن مش بأهمية التالي:
١. سنتوسا آيلاند (Sentosa Island)
زي ما عينك شايفة..إسمها "سانتوسا ايلاند"...جزيرة بحالها!..فاا..بدك تسامحني إنني راح أذكرلك بس أهم الأشياء، ومن غير تفاصيل كبيرة، وراح نتطرق لها بمقال لحالها..الأكيد أن سانتوسا - إللي هي جزيرة قريبة جداً وتابعة لسنغافورة - تحولت لجنة سياحية في أيامنا هذه، فأكيد بتستحق تقضي فيها يوم أو يومين.
وهنا خلينا نشوف الأشياء المهمة للسواح في سانتوسا:
-"يونيفيرسال بيكتشرز ستوديوز" (Universal Pictures Studios)
على غرار شركة "ديزني"، إللي أسست مدينة ملاهي "ديزني لاند"، برضه شركة إنتاج الأفلام "يونيفرسال بيكتشرز ستوديوز" قامت بتأسيس مدن ملاهي بإسمها على مستوى العالم، وواحدة منها موجودة في سنغافورة. هنا موجودة عروض من شارع سمسم، أفلام "مينيونز"، "جوراسيك بارك"، عودة المومياء، "ترانسفورمارز"، "شريك" وغيرها.
العروض مبهرة بصرياً، والتجربة والألعاب بتسوى فعلاً، وملائمة للكبار. هنا شبه مضمون إن الواحد يقضي يوم رائع مع العائلة.
أسعار التذاكر بتبدأ من ما يقارب ال ٥٥ دولار أمريكي (تذكرة دخول ليوم واحد)، وشاملة كل العروض والركوبات.
عن تجربة شخصية، بتسوى الدخول.
-"أدفينتشور كوف ووتربارك" (Adventure Cove Waterpark)
شو يعني "ووتر بارك" عارفين طبعا. بالذات للأطفال والعائلات راح تنبسطوا كثير. هنا موجودة زحاليق رهيبة (زحليقة = زلاقة باللغة الفصحى) للي بيحب هذه الأشياء،. لكن برضه هنا نهر فيه أنواع كثيرة من الاسماك. واحدة من الأشياء إللي ممكن تضايق البعض هي أعداد البشر الكثيرة هنا. سعر الدخول ٣٤ دولار.
-"باترفلاي جاردن و إنزكت كينغدوم" (Butterfly Garden & Insect Kingdom)
زي ما هو واضح من الاسم هنا الواحد ممكن يتأمل أنواع غريبة من الفراشات والحشرات، وشوية حيوانات أخرى مثل طيور الببغاء والسلاحف. سعر الدخول ٢٠ دولار.
-"آيفلاي سينغابور" (iFly)
حابب تنط "باراشوت" ونفسك ما طاوعتك؟ داخل هذا المبنى موجود تيار هوائي صناعي تصاعدي مخصص وشغال لعلو ٢ متر. ال "سكاي دايف" هذا مكلف شوية: ٨٩ دولار لتجرب حظك مرتين في "ركوب الرياح".
-شاطيء "سيلوسو" (Siloso Beach)
في جزيرة سنتوسا موجودة عدة شواطيء، أشهرها شاطيء "سيلوسو". المقطع هذا من الجزيرة بالفعل حلو، نظيف وملائم للسباحة والرياضات المائية على مختلف أنواعها. طبعاً زي إللي بنتوقعه من سنغافورة، برضه هنا الشاطيء موجود فيه كل شيء، من حمامات، لمطاعم ومقاهي بيبيعوا كل شيء البطن بترغب فيه يا أبو كرش.
بالذات ممر المشاة على إمتداد الشاطي بيتيح لك إطلالة حلوة على منطقة الشاطيء. موجودة هنا باصات مجانية بتوصل السواح لل "مونوريل "الموجود في الجزيرة، وإللي بيربطها بسنغافورة. الدخول مجاني.
-"اي جي هيكيت" (AJ Heckett)
برج علوه بيبلغ ٥٠ متر متصل بجسر زجاجي طوله ٤٠ متر، وموجودة فيه أرجوحه عملاقة. هنا ممكن تجربة "بنجي" بسعر ٢٠٠ دولار. المشي على الجسر تكلفته ١٦ دولار، وركوب الأرجوحة ٨٠ دولار.
-مبنى "ميرليون" (Merleon)
هذا التمثال - إللي هو عبارة عن نصف أسد ونصف سمكة - هو رمز المدينة وموجود له عدة تماثيل داخل المدينة. أشهرها هذا المبنى على شكل تمثال مرليون عملاق. بالإمكان دخوله والصعود للقمة إلى فك الأسد (خليك شجاع!). من هنا عندك إطلالة على الجزيرة. سعر الدخول ١٢ دولار.
-"سي اكواريوم" (S.E.A Aquarium)
أكثر من ١٠٠ ألف حيوان بحري موجودين في هذا الأكواريوم الزجاجي العملاق. للي بيحب هذا الأمر بنصحك تيجي خلال أيام الأسبوع. بالذات في آخر الأسبوع بيكون الأكواريم مليان عن بكرة أبيه. سعر التذكرة ٣٩ دولار.
-"سنتوسا كيبل كار" (Cable Car)
هو طبعاً في عدة طرق للوصول إلى الجزيرة من جهة المدينة. أغلى هذه الطرق هو ركوب ال كايبل كار. صدقاً: بعد ال "كايبل كار" الموجود في "غرينديلفالد" في سويسرا، يمكن هذه هي أجمل سفرية بالقطار المعلق ممكن الواحد يعملها, بسبب منظر الجزيرة وفنادقها الفاخرة وسط الأشجار الكثيفة من فوق.
سعر التذكرة ٢٥ دولار (أونلاين).
٢. منطقة "كامبونغ غلام" (Kampong glam)
الأغلبية الساحقة من سكان هذه المنطقة هم بالأصل من الملايو، وإللي ديانتهم الإسلام. كانوا هاجروا لهذه المنطقة في بدايات القرن التاسع عشر. بجانب هذه الأقلية، كانوا هنا بعض التجار العرب. هذه المنطقة المعروفة ببناياتها المزينة بالألوان تحولت بعصرنا الحالي لمنطقة بتنبض بالحياة، بسبب مقاهيها ومطاعمها المميزة، إللي أغلبها بيقدم المأكولات العربية والتركية والماليزية، وبسبب شوارعها الصغيرة بمبانيها وزواياها إللي بيغلب عليها الطابع الإسلامي وأحياناً المالاوي، وشوية من الطابع الأوروبي، بسبب فترة الإستيطان البريطاني.
في كامبونغ غلام موجودة عدة نقاط سياحية قريبة جداً للقلب:
-شارع مسقط (Muscat Street)
واحد من أجمل الشوارع الموجودة في المنطقة والي مدخله عبارة عن بوابة شرقية مقوسة. مباشرة بعد البوابة موجودة لوحة جدارية كبيرة بتخص التراث العربي، ساحرة ومتقنة جداً ومحبوبة عند "مجانين الإنستغرام".
-"هاجي لاين" (Haji Lane)
شارع أو بالأحرى زقاق طوييييل مميز بمبانيه الصغيرة القصيرة، المهندسة بإتقان، وبتحوي تفاصيل ظريفة جداً، كأنها طالعة من فيلم أنمي ياباني.
أغلب المحلات الموجودة هنا هي بوتيكات صغيرة لماركات محلية، ومقاهي صغيرة وشوية بارات. وهنا بتكثر برضه اللوحات الجدارية الفنية. أغلب زوار هذا الزقاق هم من جيل الشباب، يعني لو عجوز، خذ عصاتك وما تمر هنا..لا بمزح..الشارع واجبة زيارته لكل واحد بيجي سنغافورة!
-شارع بوسوره (Bussorah Street)
شارع ظريف تكثر فيه المطاعم والكافيهات وبرضه محلات للمهارات اليدوية. من هنا في إطلالة حلوة على مسجد السلطان.
-مسجد السلطان (Sultan)
المبنى الأهم في المنطقة كلها، ببناؤه الإسلامي البحت (مسجد..واضح طبعاً) وقبته ذهبية اللون. مش المسجد الوحيد في منطقة كامبونغ غلام على فكرة، لكنه أشهرها.
-أراب ستريت (Arabstreet)
معروف بكثرة المحلات إللي بتتاجر بالسجاد والقماش والعطور إللي أصولها من الشرق الأوسط.
٣. تشاينا تاون (Chinatown)
الجالية الصينية في سنغافورة كبيرة جداً، لهذا الشيء من الطبيعي إنها تفرض حضارتها وتقاليدها في كل المجالات في بعض مناطق الدولة. أهم هذه المناطق هي المنطقة الملقبة ب "تشاينا تاون" في سنغافورة. أنت بس أدخل هنا ومش راح تشوف أي فرق بينها وبين أي مدينة صينية ثانية بتحترم نفسها..كل شيء هنا صيني يآخي: هندسة البناء، اللافتات، البشر، اللغة المتداولة، المطاعم، الشوارع، المنتزهات. وبالسنين الأخيرة، تم تطوير هذه المنطقة..واضح إن الحكومة صرفت وكلفت!
شوارع كاملة تشقلب حالها وصارت تلمع..مباني "بيراناكان" المميزة والملونة بشبابيكها المستطيلة، والأسواق اللي بتبيع كل ما هو صيني، وما حدا بيحتاجه لكن لازم يشتريه! الشيء الأكيد هو إن يوم كامل وطويل هنا راح يكون مليان بالمشي والإنبهار ما بين الشوارع المزينة، والمحلات والاسواق والمطاعم والمعابد الصينية، إللي ممكن الواحد يشوفه هنا كثير، لكن خليني أعطيك شوية رؤوس أقلام بس لحتى المقال ما يطول (فوق ما هو طويل!)، وإن شاء الله قريباً راح أجهز مقال عن يوم كامل في "تشاينا تاون" راح نتمشى فيه أنا وأنت مع بعض، وراح نمر على مهل على أهم النقاط في المنطقة.
مبدئياً المفروض الواحد يمر على هذه النقاط:
-"بيوبل بارك كومبلكس" (Pepole Park Complex)
في حال خروجك من محطة المترو راح يواجهك هذا المبنى العملاق، اللي باحته وطابقه الأرضي هي عبارة عن عشرات المطاعم الصينية إللي بتبيع أنواع متعددة من الأكل الصيني الشهي والرخيص. هنا الأكل الصيني التراثي الحقيقي!
داخل المبنى موجود سوق صيني عملاق بيبيع كل شيء ممكن يخطر على بالك، والأسعار أرخص من أي مكان آخر في المدينة.
-"جاردن لنك بريدج" (Garden Link Bridge)
عبارة عن جسر صغير مخصص للمشاة، من أجل العبور من فوق شارعين رئيسيين هنا. على هذا الجسر تم تأسيس حديقة ظريفة جداً جداً كانت إكتشاف بالنسبة لي..مكان رائع جداً لإلتقاط الصور!
-مسجد الجامعة (Jamae Mosque)
مسجد أخضر يعتبر أيقونة في منطقة تشاينا تاون (موجود دائماً على بطاقات البريد، أو الطوابع مثلاً، وتم الإعتراف فيه كنصب تذكاري قومي مهم في سنغافورة). تم بناؤه قبل أكثر من ٢٠٠ سنة من قبل مهاجرين مسلمين من جنوب الهند (تاميل).
-شوارع مهمة في تشاينا تاون..
موجودة شوارع هنا أهم من غيرها لازم الواحد يتمشى فيها ويستنشق الأجواء٬ "باجودا ستريت"، "سميث ستريت"، "تمبل ستريت"، "تشايناتاون ستريت ماركت"، و "تشايناتاون فود ستريت". وفي آخر هذول الشارعين الأخيرين موجود هذا المعبد..
-"بودا توث ريليك تمبل" (Buddha Tooth Relic Temple)
واحد من أجمل المعابد الموجودة في جنوب شرق آسيا بشكله المختلف عن المألوف للعين من المعابد الآسيوية. المعبد هذا بيفتح أبوابه للعامة للتجول بداخله ومشاهدة الرهبان خلال ترديد وترنيم صلواتهم. الدخول مجاني.
-"سري ماريامان تمبل" (Sri Mariamman Temple)
موجود ما بين "باغودا ستريت" و "تمبل ستريت"؛ معبد هندوسي مميز الشكل قلما الواحد يشوفه في دول آسيا (ما عدا الهند طبعاً). الدخول مجاني.
هذه هي أهم النقاط الموجودة في تشاينا تاون برأيي...لكن طبعا موجودة هنا وهناك كثير أسواق أخرى لأكل الشوارع..وبرضة موجودة مولات عصرية جداً، بجانب ناطحات سحاب عصرية بتوخذ العقل صراحة، ومنتزهات فائقة الظرافة بتجيب نزيف أنفي مزمن. راح نحكي عن تشاينا تاون إن شاء الله في مقال لوحدها.
٤. "ليتل إنديا" (Little India)
كمان جزء من المدينة بيدعم فكرة التنوع والتناغم ما بين البشر وإحترام الغير بغض النظر عن الإختلاف مهما كان نوعه.
ليه إسمها ليتل إنديا؟ مفهوم..واضح إن شوارعها المتشابكة أخذت كل شيء من الهند. هنا مقر الجالية الهندية الرئيسي في سنغافورة. الشوارع مليانة بمحلات بتبيع كل شيء أصله هندي, ناهيك عن الكم المهول من المطاعم الهندية.
يآخي حتى الموسيقى الهندية بتسمعها في كل زاوية...وأنا ماشي هنا توقعت شوية راقصين ينطوا أمامي بزيهم التقليدي بألوانه الزاهية وحركات أفلام بوليوود إياها! الحقيقة إن التمشي هنا ممتع لأقصى درجة..ما بين قلادات ألأزهار فاقعة اللون بأنواعها المتدلية على واجهات المحلات، وأصوات التجار بينادوا على بضاعتهم بأعلى الصوت..يآخي حتى حركة المرور هنا مختلفة..هنا الحابل أخ النابل مع بعض يداً بيد..الشارع المركزي هنا "سيرانجون رود" هو مركز الحدث، ومنه بتتفرع الشوارع الأخرى. أهم المعالم السياحية الموجودة في ليتل إنديا هي:
-معبد سري سرينيافا بيروميل (Sri Srinivasa Perumal Temple)
-"تيكا سنتر" (Tika Center)
هو مركز مثل غيره بتكثر فيه المطاعم الصغيرة إللي بتقدم الأكل السريع. لكن ما بنصحك تجرب شيء هنا. ناهيك عن كثرة البهارات الهندية في الأكل هنا إللي ممكن الواحد ما يستحملها، النظافة مش ولا بد. لكن مر وتفرج معلش..
-"مصطفى سنتر" (Mustafa Center)
هو مجمع تجاري بيبيع كل ما هو هندي على مدار الساعة.
-"سري فيراماكاليامان الهندوسي" (Sri Veeramakaliamman)
وهو أقدم معبد من نوعه. بالإمكان الدخول والتعرف على المعبد من الداخل. الدخول مجاني.
-"تان تينغ نياه" (Tan Teng Niah)
هذا البيت الموجود وسط المدينة كان تابع لرجل أعمال صيني من القرن المارق، كان بناه على شكله بالوانه الفاقعة المميزة هذه تقديراً لزوجته.
٥. "أورشارد رود" (Orchard Rd)
شارع رمي المصاري من الشباك..أنا مش بستهزيء لا سمح الله، كل واحد حر، والواحد لازم يدلع نفسه لو كان معه..عايشينها مرة واحدة!
هذا الشارع الفاخر طوله ٢،٢ كلم، وهو أشهر شارع وممشى "شوبينغ" في المدينة. هنا موجود أكثر من ٢٠ مجمع تجاري من الأفخر في العالم، شكلاً، وتصميماً، وتوظيفياً..كلام كبير أنا شخصياً مش فاهمه!
المهم إن تصميم المباني رهيب ورائع الشكل وعصري لأبعد الحدود ومن الداخل نفس النظام بمراحل؛ طوابق من المحلات والمطاعم بديكوراتها الفاخرة، بأسعارها إللي لازم تكون فاخرة طبعاً..بعض هذه المجمعات مربوطة ببعض مرة من فوق ومرة من تحت الأرض. وشبكة المترو موجودة في هذه المنطقة طبعاً. أشهر هذه المولات إللي بنصحك تدخلها (فوت تفرج بس، ما تضيع فلوس كثير) هي "إي أون" و "باراغون" و "تاكاشياما"...وكثير كثير غيره..يووووه على وجع الراس!
٦. منطقة "مارينا باي" (Marina Bay)
المنطقة المشهورة عالمياً الموجودة على خليج سنغافورة، هي مصب عدة أنهار من جهة المدينة، أصبحت أكثر منطقة عصرية وأصغرها عمراً في المدينة. الممشى الأنيق والعصري المحيط ب "شبه البحيرة" هذه، بيبلغ طوله ما يقارب ال ٣،٥ كلم. هنا يومياً - من الصبح إلى آخر الليل - موجودة أعداد كبيرة من السواح وأهل البلد إللي بيتمشوا أو بيقوموا برياضة المشي أو الركض أو ركوب الدراجات الهوائية، أو مراقبة البشر والحسد، أو مشاهدة المباني المحيطة من ناطحات السحاب، إللي فيها فنادق وشركات عالمية ومسارح ومتاحف الخ الخ..
يمكن هذه المنطقة هي أكثر منطقة عصرية ممكن تشوفها في العالم، برأيي على الأقل. السبب هو تصميم المباني المميز إللي وكأنه من فيلم أحداثه بتدور في المستقبل البعيد. أول شيء لازم تعمله هو إنك تمشي على الممشى الراقي وتتأمل الدوشة الموجودة وجموع البشر. وطبعاً لازم تدخل مكان هنا، أو مبنى هناك. تأكد من إنك تخصص يوم كامل لهذه المنطقة..برضة هنا راح يكون لنا وقفة مع أهم التفاصيل عن يوم كامل في مارينا باي..بإذن الله. خلينا نستعرض أهم المباني والفعاليات إللي المفروض السواح يقوموا فيها:
-"مارينا باي ساندس" (Marina Bay Sands)
هذا المبنى المبهر بصرياً ومعمارياً هو أشهر مبنى سنغافوري على الإطلاق، ويعتبر أيقونة الدولة من غير نقاش!
هذا الفندق بيتكون من ثلاثة أبراج، كل واحد منها فيه ٥٥ طابق! فوق ال ٣ أبراج موجود سقف على شكل سفينة، بيمتد فوقه مسبح "إنفينيتي".
هنا موجودة برضه مطعم وبار معتبرين وغاليين جداً..جداً. من أجل دخول المسبح الساحر لازم تكون مقيم في الفندق للأسف. لكن بالإمكان الصعود للسقف، حتى لو كنت غير مقيم في الفندق. سعر التذكرة هنا ٣٠ دولار، والإطلالة مبهرة صراحة، بالذات في ساعات المساء. طبعاً ممكن الحجز في المطعم الموجود، لو حبيت تتجنب سعر التذكرة، بس راح تلبس أسعار المطعم القاصفة لفقرات الظهر، قصفة أخيرة ما لها من علاج!.. الأسعار غالية بشكل مبالغ فيه.
-"آرت ساينس ميوزيوم" (Art Sciense Museum)
كمان مبنى مبهر (إستعملت هذه الكلمة كثير بس سنغافورة مبهرة إبهاراً..شو أعمل؟) بصرياً وغريب الشكل، وهو عبارة عن متحف تقام فيه عروض تكنولوجية وفنية وعلمية. سعر التذكرة تقريباً ٢٦ دولار.
-"ذا شوبس" (The Shops)
يعنييي..بتحسهم كانوا عاوزين يبنوا مطار، وغيروا رأيهم في آخر لحظة!..يحرق حريشكم حريش..كل هذه المساحة علشان مجمع تجاري؟..الديكور والشكل فاخر، والمحلات هنا بتبيع أهم الماركات العالمية.
-"ذا هليكس" (Helix)
جسر مميز الشكل ، جاءنا برضه من المستقبل البعيد..آه..هم عاملينه بس علشان يبهروا العالم، وصراحة نجحوا ببراعة. لعشاق التصوير تعالوا هنا.
-"مرليون بارك" (Merlion)
هذا التمثال متوسط الحجم على شكل نصف أسد ونصف سمكة هو رمز الدولة زي ما حكينا. منظر التمثال وهو "بيبصق المياه" ظريف جداً ومحبوب عند آلاف السواح المتجمهرين دائماً حواليه. مجاني.
-"إسبلاناد" (Esplanade)
هذا المبنى المميز الشكل إللي بيشبه حبة الجوافة (معلش سامحني..بحب الجوافة جداً). فيه قاعة "كونسيرت" وقاعة مسرح عملاقة، وبسبب شكله هذا إشتهر سياحياً.
-"جاردينز باي ذا باي" (Gardens by the Bay)
وراء فندق "مارينا باي ساندس" موجودة منطقة فسيحة وخضراء جداً..أدغال من الأشجار. في هذه المنطقة تم التخطيط بعناية وإنشاء عدد من الطرق والأنهار والنوافير والمباني بطريقة مبهرة (آسف..) جداً، وإللي الهدف كان منها زيادة المنطقة الطبيعية في المدينة لزيادة جودة حياة أهل البلد، بجانب زيادة الوعي وتوجيه الأنظار للمشاكل إللي بتواجهها البيئة والكرة الأرضية بشكل عام. المنطقة كلها هي من أجمل ما يمكن للعين إنها تشوفه! هو بجانب إن الواحد ممكن يتمشى هنا ويستمتع بالطبيعة - إللي يعني على طول مهتمين فيها لأقصى حد - هنا برضة ممكن المرور والوقوف عند مباني خرافية الشكل والوظيفة برضة.
"فلاور دوم" (Flower Dome) مثلاً هو مبنى زجاجي والأضخم من نوعه في العالم، مخصص لإحتواء نباتات عديدة، عادة بتنبت في مناطق قاحلة شوية. "كلاود فوريست" (Cloud Forrest) هو كمان مبنى زجاجي مخصص للنباتات، إللي بتشوفها عادة في المناطق العالية، ما بين ألف و ٣٠٠٠ متر فوق سطح البحر. سعر تذكرة الدخول للمبنيين ٢٨ دولار. لكن الإبداع الخيالي بنشوفه في ال "سوبر تريز جروف" (Supertrees Grove) وهي مجموعة أبراج حديدية ذو علو ما بين ٢٥ و٥٠ متر مليانة بالنباتات المتسلقة والنادرة. موجود فيها أنظمة إضاءة عديدة، وإللي بيتم تشغيلها بواسطة إكتساب الطاقة الشمسية.
تعال هنا الساعة السابعة و ٤٥ دقيقة مساءاً أو الثامنة و ٤٥ دقيقة لمشاهدة "لعبة الأضواء" على أنغام موسيقي..عرض مجاني يُعرف ب "جاردن رابسودي" (Garden Rapsody). هذا العرض بيشاهده الآلاف يومياً!
لو حبيت الصعود والمشي على الجسر الموجود بين بعض هذه الأبراج، لازم تشتري تذكرة سعرها ١٤ دولار.
٧. ساوثرن ريدجيز (Southern Ridges)
في زيارتي الثانية لهذه المدينة الخارقة حبيت إنني أتعرف على مناطق مش مشهورة بنسبة كبيرة..بعد البحث والسؤال شاب ماليزي نصحني أمشي لساوثرن ريدجز. هنا موجود واحد من أكبر المنتزهات الخضراء في المدينة اللي تم شق طريق للمشاة ما بينها، جزء كبير منه فوق جسور مشاة حديدية مرتفعة جداً ما بين الأدغال والحدائق والنباتات. ٩ كيلومتر بتنتظر الرياضيين ليتمشوا هنا، لكن ممكن الواحد يختار مسافة أقل. التمشي هنا ما له مقارنه مع أي شيء عملته قبل هيك. اللافتات هنا في كل مكان والشرح والموظفين موجودين ومتوزعين في المنتزه. أجمل مقطع بالنسبة لي شخصياً هو المقارب ل "هندرسون ويف بريدج" و "ماونت فابر".
٨. مطار "شانجي" (Changi Airport)
أجمل وأرقى مطار في العالم على ذمة الكثير من السواح..ليه؟ خلي الصور تتكلم..وبما إنك راح توصل المطار هيك ولا هيك خذ وقتك وتعرف عليه.
ولسه فيه ياما في سنغافورة..من حين لآخر راح أجدد المقال وأتطرق لمعالم أخرى أقل شهرة لكنها بتسوى الزيارة..