علشان رحلتك القادمة ما تكون سبهللة

بروكسل عاصمة الغرابة مقدمة مبسطة الموسم السياحي المدة العملة النقدية والأسعار الوصول والمواصلات المبيت شو أعمل في بروكسل مقدمة مبسطة ما بنكر إن بلجيكا بشكل عام مش مشهورة سياحياً مثل جيرانها، هولندا وفرنسا وباقي الشلة..بتحسها شوية وكأنها البطة السوداء. وحفاظاً على المصداقية (خليني أحاول يآخي..)، ما بحكيلك إن عاصمتها بروكسل ممكن تعجب كل واحد. بالذات إللي دخل فرنسا وهولندا من قبل، ممكن يشوف بروكسل أقل جمالاً ومش بهذا التميز. وفي الحقيقة ممكن أفهم هذا الشيء، لإن المباني نفس النوع، الأكل نفس النوع، اللغة نفس النوع، حتى شكل البشر نفس الشيء! طيييييييب..وإنت شو جاي يعني تحكيلنا عن بروكسل؟ شوف..عندي شوية أسباب بتخليني أنصحك تسافر إلى بروكسل، ممكن ما تكون مقنعة..لكن خليني أحكيلك إنها مقنعة بالنسبة إلي على الأقل: ١. بروكسل موقعها إستراتيجي جداً؛ إللي معاه سيارة وعامل رحلة في أوروبا، ممكن يمر بالمرة على بروكسل لفترة قصيرة، لأنها دائماً قريبة وبالطريق. من بروكسل إلى باريس عندك ٤ ساعات سفر بالسيارة، من بروكسل إلى أمستردام ياااا دووووب ساعتين ونصف بالسيارة. بل إنك ممكن تسافر من لندن إلى بروكسل مدة ساعتين ونصف!!. ٢. برأيي وبشكل عام، كل العواصم بتستحق السفر (إلا براتسلافا..لا تجيب سيرتها على لسانك أرجوك). وبروكسل، زي ما حضرتك عارف، عاصمة بلجيكا وعاصمة أوروبا. ٣. بروكسل فعلاً فيها كم شيء بيميزها عن غيرها من عشرات المدن، أشياء صعب تلاقيها في مكان ثاني بهذه السهولة. المدينة هذه ولا مرة راح تنافس غيرها من عواصم أوروبا، صحيح.. لكن إللي عنده وقت، أو بيدور على أهداف جديدة؛ بلجيكا فاتحة أبوابها! خلينا نحكي شوية وبسرعة عن بروكسل، عاصمة أوروبا الرسمية..المدينة العصرية وبنفس الوقت، التاريخية ذات البيوت الرفيعة والأزقة الأفعوانية، المليانة برائحة "الوافل"، و الشوكولاطة الأصلي والبطاطا المقلية المشهورة..وأهم شيء قلبي إللي تركته في أصغر مطعم لأزكى ساندويتشات أكلتها في حياتي، مطعم "تونتون غاربي" (Tonton Garby) .. الموسم السياحي هممم..محتار أحكيلك شهر ٥ ولا لأ؟؟...لأ..بلاش شهر ٥، لأنها أحياناً بتمطر في شهر ٥ و إحنا مش ناقصنا.. شهر ٦ إلى شهر ٩ هو أفضل وقت ممكن تدخل فيه هذه المدينة. وكعادة عواصم أوروبا الغربية في فترة رأس السنة، برضه بروكسل بتتحول لمعرض "كريسماس" خالص. والله لو أنت بتحب أسواق الكريسماس، تعال في شهر ١٢..بس أعمل حسابك أن أصابع رجليك ممكن تتساقط من البرد..واحداً تلو الآخر! المدة يومين أو ٣ أيام كاملين، بيكفوا هذه المدينة أكيد. ولو بتحب تدخل المتاحف، خذ عليهم كمان يوم أو إثنين زيادة. إعمل حسابك إنك بعد ما تخلص رحلتك في بروكسل، إنك تمرعلى أجمل مدن بلجيكا؛ مدينة بروج القريبة من بروكسل (ساعة واحدة بالسيارة!)..وأكرر هنا..راح نتكلم عن هذه المدينة في مكان لوحدها..قريباً إن شاء الله. العملة النقدية والأسعار العملة هي اليورو طبعاً..خينا ننط على طول إلى النقطة الأهم..الأسعار.. هنا كانت وما زالت المشكلة إللي بتبعد السواح عن هذه المدينة أكثر وأكثر؛ الأسعار! ليييييه؟ مش عارف، لكن بروكسل غالية فعلاً، وفي بعض المجالات ممكن تكون أكثر من باريس عاصمة فرنسا..تخيل. مثلاً..أسعار الفنادق المتوسطة للزوج بتبدأ من ١٥٠ يورو لليلة. الوجبة في مطعم متوسط الخدمة (وجبة مع جلوس، مش ساندويش فلافل على السريع) بتبدأ من ١٥ إلى ٢٠ يورو على الأقل. الوصول والمواصلات الوصول إلى بروكسل كل الطرق تؤدي إلى بروكسل: الطائرة، السيارة، أو القطار، أو الباص. طيب شو أختار يا رجل؟؟.. أول إمكانية هي طبعاً الأكثر منطقية. وبعدها المفروض الواحد يجمع في رحلته عدة مناطق أو مدن..وهيك بتكون هذه المدينة دائماً في الطريق مهما كانت الوجهة. بروكسل مربوطة على فكرة بعدة مدن أوروبية، بجانب الطيران، برضه بخطوط القطارات والباصات. المواصلات من المطار إلى المدينة أفضل وأسرع وأرخص وسيلة للسفر من المطار إلى مركز المدينة هي القطار. مدة السفر ١٧ دقيقة و تكلفة التذكرة ٨،٦ يورو. خلي بالك ولا تركب الباص "إيربورت بوس" (Airport Bus) رقم ١٢ أو ٢١؛ الباص هذا بيوصل ركابه من المطار إلى البرلمان الأوروبي الموجود في بروكسل، مش إلى مركز المدينة السياحي! المواصلات داخل بروكسل المترو (سابواي): نـظيف وجديد ورخيص نسبياً. موجود حالياً ٤ خطوط. ١، ٢، ٥، ٦. بيرميترو (permetro): هي قطارات شوارع، لكن أحياناً بتمر تحت الأرض في محطات معينة. برضة هنا موجودة ٤ خطوط : ٣ ،٤، ٧، ٩. قطار شوارع: وهي قطارات الشوارع العادية. هنا موجودين ١٧ خط..بيهمنا منها كسواح خط ٩٢ و ٩٤ وإللي بيمروا من جنب القصر الملكي والمنتزه الطبيعي وبرضه المتاحف الملكية. الباص: أهميتها هي إنها بتغطي مناطق ما بتدخلها قطارات بروكسل مثل أجزء من المناطق المحيطة والضواحي. لهذا الشئ أهميتها ثانوية. التذاكر: سعر التذكرة ٢،١ يورو. ٥ تذاكر سعرهم ٨ يورو، و١٠ تذاكر سعرهم ١٤ يورو. تذكرة ليوم واحد كامل سعرها ٧،٥ يورو. بالإمكان شراء التذاكر من كل محطات المترو، أو داخل الباصات (هنا أغلى شوية) أو في الأكشاك الصغيرة. لازم ختم التذكرة في محطات المترو أو داخل الباص أو القطار قبل الإستخدام. التذكرة ممكن إستخدامها لمدة ساعة واحدة، وخلالها ممكن إستخدام عدد مواصلات غير محدود. محطات القطار الرئيسية في بروكسل: موجودة ٣ محطات رئيسية هي "بروكسل ميدي" (Bruxelles midi)، "بروكسل نورد" (Bruxelles Nord) و "بروكسل سنترال" (Bruxelles Central). من "بروكسل ميدي" بتسافر أو بتوصل القطارات الدولية، فرنسا وهولندا وألمانيا وإنجلترا وغيرها. من "بروكسل سنترال" بالإمكان إستكشاف المدينة القديمة. المبيت هو أنا حكيت لك إن البلد غالية؟..شوف..هي خربانة خربانة..ف لا توجع راسك وحاول تشوف لك سكن بجانب المركز التاريخي في بروكسل. أغلب المعالم التاريخية والمتاحف مش بعيدة من هنا وبالإمكان المشي إلها، لو كنت بتحب المشي طبعاً. بعرف إن الفنادق هنا أغلى حبتين (لأ وممكن ثلاث حبات كمان!)..لكن بما إننا متفقين على ٣ أيام في بروكسل، ف يا ريت ما تقضيها في المواصلات العمومية.. شو أعمل في بروكسل "جراند بلايس" أو "جروته ماركت" ( Grand-Place, Grote Markt) يمكن هذا الميدان هو أهم معالم بروكسل. إبتداءاً من القرن الثاني عشر بدأ تشييد المباني هنا بعد ما تم "تنشيف" المستنقعات الموجودة في هذه المنطقة. الميدان هذا تم تفجيره وتدميره من قبل "الفغنساوي" (بلهجة ممثلين باب الحارة) في القرن السادس العشر. أهم المباني وأجملها هنا هو مبنى البلدية، وإللي عمره أكثر ٦٠٠ سنة..أيوه هو هذا المبنى أبو برج، إللي بيوصل إرتفاعه ل ٩٦ متر! لو حبيت تدخل وتصعد أعلى البرج، سعر التذكرة ١٠ يورو. "مونت ديس آرتس" ( Mont des Arts) ليه هذا ال "مونت" بيسموه "مونت" (جبل) مش عارف...كله شقفة تل..لا راح ولا إجا. ما علينا.. هذا ال "جبل" هو منطقة مرتفعة طبعاً عن سطح المدينة الإجمالي وموجود في وسط بروكسل. تاريخياً كانت هذه المنطقة دائماً مكتظة بالسكان. في العصور الوسطى كان هذا المرتفع بيضم بنايات الطبقة الحاكمة. في القرن السابع عشر، وكعادة مدن أوروبا لما تكون زهقانة، إندلع هنا حريق أطاح بأغلب المباني. الملك ليوبولد الثاني - ٢٠٠ سنة متاخر - قرر تحويل هذا المرتفع ل "جبل للفنون". في وسط الجبل موجودة حديقة أنيقة ومرتبة، مع نافورة كبيرة. وحوالين هذا كله موزعة كمية من المتاحف من الأهم والأشهر في بلجيكا (منها المتاحف الملكية، المكتبة الملكية، متحف الآلات الموسيقية، أرشيف الدولة). "كوميك ستريب روت" (Parcours BD de Bruxelles) مين ما بيعرف مسلسلات الكرتون "تان تان" و السنافر و "آستريكس" و "لاكي لوك". مسلسلات الكرتون هذه وغيرها، إللي كانت بداياتها مجلات الكوميكس بالأساس، تم إنتاجها في بلجيكا. من أجل هذا الفن والفنانين البلجيكيين، وإبتداءاً من سنة ١٩٩١، إبتدت تظهر لوحات جدارية لبعض أبطال الكوميكس على واجهات بعض المباني في بروكسل. حالياً موجود ما يقارب ٥٠ لوحة جدارية متوزعين في مركز بروكسل. في فعالية مشهورة عند السواح من أصل أوروبي: فعالية المشي أو مسار ما بين اللوحات الجدارية هذه. خلال ساعتين أو ٣. في مراكز معلومات السواح في بروكسل موجودة خارطة بتدل عل مكان هذه اللوحات. هذا المسار يا صديقي كان واحد من أهم الأسباب إللي خلتني شخصياً أدخل بروكسل..مش لأني بعدي طفل بحب الكارتون (هو هيك فعلاً) ولا لأني كنت فاضي ما عندي شغل أيامها (هذا بعينه إللي حصل!)، إنما لانها شغلة بتميز بروكسل عن مدن غيرها. لو كنت من الناس إللي بتشتري الكوميكس بالسر خجلاً من الجيران (وأنا زيك على فكرة)، إذن برضة النقطة القادمة راح تهمك "كوميكس آرت ميوزيوم" (Comic Art Museum) المبنى هذا عمره أكثر من ١٢٠ سنة, وكان بالأساس مخزن تم ترميمه خلال فترة الثمانينات، لغرض تحويله لمتحف لهذا الفن..ناس بتقدر هذا ال ايييه..هذا إللي بنحكي إحنا بنسميه "ألعاب أطفال" ..عملوا له متحف.. الفكرة لإقامة هذا المتحف كانت بالأساس بسبب ضغط الجماهير والفنانين المحبين للكوميكس..تخيل..الشعب.. ممكن الآن نفهم بسهولة إن هذا النوع من الرسومات يعتبر فن شعبي راقي من عشرات السنين في بلجيكا. بالذات في فترة الحرب العالمية الثانية كان الكوميكس وسيلة مهمة في الترويح عن الشعب خلال هذه الفترة الحرجة والصعبة. المتحف بيشرح لنا بدايات فن الكوميكس من القرن التاسع عشر حتى أيامنا الحالية، وقصة تطوره. وطبعاً بيركز على كبار الفنانين البلجيكيين مثل "هيرج" و "موريس" وغيرهم. المتحف بيتيح للزوار الإطلاع على الرسوم والمسودات الأصلية لمسلسلات مشهورة مثل "تان تان" و "لوكي لوك". للمحبين والجوعانين لمعلومات أكثر بالإمكان الإستعانة بصديق..إييييه..قصدي مرشد مع الشرح (إنجليزي أو فرنسي أو هولندي)..بل أزيدك من الشعر بيت: لعشاق الكوميكس موجودة إمكانية الإشتراك ب "وورك شوب" لتعلم رسم الكوميكس؛ فعالية ينصح فيها للأطفال (أنا جربتها شخصياً وإستمتعت فيها أكثر من الأطفال نفسهم!)|. سعر تذكرة الدخول ١٠ يورو. "أتوميوم" (Aomium) أنا خجلان منك والله..لانني ما دخلته..والسبب؟ والله مش عارف ليه ما دخلته..يمكن قلة وقت. الأتوميوم هو أيقونة بروكسل الأولى، والصورة إللي يمكن أول شيء بنشوفها في كل صفحة إنترنت لما نكتب إسم بلجيكا. المجسم هذا إللي تم إفتتاحه في أواخر الخمسينات بيتيح لزواره جولة بداخله؛ مجموعة من الممرات والكرات العملاقة المربوطة ببعض. بجانب مطعم، ومعارض علمية وتاريخية، موجودة في أعلى كرة في الاتوميوم إطلالة على بروكسل..مش ممكن أقول لك إذا كانت بتسوى..لانني ببساطة ما دخلتوش...لكنني ندمان طبعاً.. سعر التذكرة ١٦ يورو، وبالإمكان شرائها أونلاين طبعاً. "جاليريس روياليس ساينت هوبيرت" (Galeris Roxales Saint Hubert) هذا المعرض أو السوق التاريخي إللي بيذكرنا بمعارض إيطالية (أشهرها معرض "فيتوريو إيمانويلي الثاني" في ميلانو) هو مبنى بيتكون من طابقين من المحلات، مسقوف وبيمتد لأكثر من ٢١٣ متر. المحلات الراقية الموجودة هنا كان تم بناءها قديماً من أجل جذب الأغنياء. أغلب محلات المعرض الأنيقة هي مقاهي راقية، أو مطاعم راقية، ناسها راقية وأسعارها راقية زيها..إعمل زيي ومر من هنا مرور الكرام و "أطقش" كم صورة راقية لهذا السوق الأيقوني (وكأنه من الأفلام!).. كاتدرائية "سانت كاترين" (Sainte Catherine) أنا ذكرتلك هذه الكاتدرائية كمعلم سياحي، بس الحقيقة المنطقة المحيطة في الكاتدرائية، في حي دانزيرت (Dansaert) ساحرة بفترة الصيف. هنا موجودة كمية محترمة من المطاعم الصغي والمقاهي مع إمكانية للجلوس في الخارجك. بالذات بفترة عيد الميلاد وراس السنة المنطقة بتتحول لميمعة..سوق "الكريسماس" إللي بيفتحوه هنا هو من الأجمل في بلجيكا وبيجذب آلاف البشر. الحي الأوروبي (ِEuropean Quarter) عارف لما الواحد يقول شغلة مش مقتنع فيها ويحاول يداري شوية..أيوة..هنا أنا برضه مش مقتنع..لكن من واجبي أذكر إن بروكسل عاصمة الإتحاد الأوروبي، والمباني في "الحي الأوروبي" ممكن للسواح دخول جزء منها. لا تنسى تحمل جواز سفرك معك، راح يطلبوه على نقاط التفتيش. هذا الحي الواسع مليان على فكرة بالمناطق والمنتزهات الخضراء، وبضه بالمتاحف والمحلات والمعارض الفاخرة، بجانب مباني تاريخية ومباني عصرية في مزيج غريب لكنه لطيف. الكرزة على الكعكة (لو أمكن وصفها هيك أساساً) هو مبنى الإتحاد الأوروبي. أشهر الميادين هنا هو "بلاس دو لوكسمبورغ" (Place du Luxembourg) العصري. وسط المناطق الخضراء الكثيرة هنا؛ قريب جداً أهم منتزه طبيعي في بروكسل.."يوبيل بارك". "يوبيل بارك" (Jubel Park) آلاف الإنظار بتتوجه ناحية هذا المنتزه الطبيعي في أوقات الإحتفالات، تاريخية أو رياضية أو موسيقية كانت. بالذات في فترة الصيف بيمتلئ "يوبيل بارك" بالأهالي إللي ما بين راحة و "بيكنيك" أومن أجل واحدة من الفعاليات الرياضية. على غرار باريس وغيرها من المدن؛ برضه هنا موجود مبنى القوس التاريخي إياه..وأيوه - ويا للمفاجأة - إسمه برضه قوس النصر. "يوبيل بارك" بيضم مجموعة من المعارض والمتاحف للفنون و التاريخ. الدخول مجاني للمنتزه مجاني.. منيكين بيس (Manneken Pis) يآخي الدنيا هذه فعلاً أذواق..مش عارف سبب الشهرة الغريبة إللي هذا التمثال وبقية أصدقاؤه أخدوها. التمثال الصغير هذا لطفل واقف بكل فخر وأريحية وبيلبي نداء الطبيعة في الهواء الطلق (أخ لو ريح هبت بس) تحول لنقطة سياحية أيقونية في بروكسل.. شوف شوف كمية البشر إللي واقفة أمام التمثال تصوره طول اليوم. على غرار الطفل إللي واقف يلبي نداء الطبيعي بلا خجل، موجود كمان تمثال صغير لطفلة على غراره (Jeanneke Pis) ، وبرضه موجود تمثال لكلب (ٌZinneke Pis) , رافع رجله هو الآخر على جانب الطريق. التماثيل موجودة في شوارع مختلفة في مركز المدينة لكنها قريبة من بعض. أنا فهمت ليه هذه المدينة خضراء لهذه الدرجة.. همم مش عارف...بس واجبي أذكرلك المشهور هنا...وأنت وراسك بتعرف خلاصك. المراقبة مجانية! القصر الملكي (Palais Royal) كمان مبنى تاريخي في موجود في مركز المدينة، وإللي كان مقر العائلة المالكة. القصر هذا بيفتح أبوابه للعامة ما بين ٢١ من شهر ٧ إلى أواخر شهر ٨ من كل سنة. داخل المبنى موجود متحف كاودينبيرغ (Coudenberg) االموجود تحت الأرض، و متحف بيلفيو (Belvue). الدخول لكل متحف بيكلف ١٠ يورو ومع بعض ١٨ يورو. بالاس دي يوستيس (Palais de Justice) مبنى المحاكم الأهم في بلجيكا وإللي حالياً بيتم ترميمه، لفترة راح تستمر لأكثر من ٥ سنين. لكن بيضل المبنى من الخارج وبرضة المدخل الخاص فيه متاح للجماهير. المدخل لوحده مبهر جداً، ومن هنا على فكرة موجود منظر للمدينة ول الأتوميوم. لا تنسى تستكشف "حي مارولس" (Les Marolles) المجاور والظريف. مجاني. ملاحظة قبل الملاحظة الأخيرة: لو كنت من الناس إللي بتحب تجارب الأكل..خليني أنصحك ب مطعم "تونتون غاربي" (Tonton Garby) الرائع؛ مطعم زغنطوط جداً في وسط بروكسل ل ملّاك من المغرب العربي من ألطف ما يكون..آلساندويتشات هنا راح تغير نظرتك للحياة... الملاحظة الأخيرة: موجود - زي أغلب مدن أوروباـ "بروكسل كارد - وهي تذكرة لمدة ٢٤، أو ٤٨ أو ٧٢ ساعة (بسعر إبتداءاً من ٣٠ يورو تقريباً) بتتيح الدخول لأكثر من ٣٠ متحف في بروكسل، بجانب الإستخدام المجاني للمواصلات العمومية، غير عن تخفيضات على تذاكر الدخول لمجسم الأتوميوم وغيره، وتخفيضات في بعض المحلات التجارية...أنا ما إشتريته..فااا، مش راح أنصحك تشتريه..ولأ آنصح ما تشتريه...قرر أنت..

لشبونة عاصمة البرتغال ، مفاجأة أوروبا الكبرى مقدمة مبسطة الموسم السياحي المدة العملة النقدية والأسعار المبيت الوصول والمواصلات شو أعمل في لشبونة مقدمة مبسطة عارف لاعبي كرة قدم المشاهير، إللي الواحد على طول بيسأل نفسه، هم ليه على مقاعد الإحتياط؟..أهو لشبونة دي عاملة زييهم (تأثير الأفلام المصرية ساكن فيي من زمان!)، ولهذا الشيء لما العبدلله سافر إلى لشبونة - إللي يعني مش بشهرة باريس ولندن وروما - ما كنتش متوقع غير رحلة ظريفة ومسلية، مش أكثر! ما كنت أعرف إن هذه المدينة راح تخطف أنفاسي. لشبونة يمكن تكون المفاجأة الأكبر في أوروبا بالنسبة إلي. وإللي متاكد منه هو إن راح أدخلها مرة ثانية، إن كان إلنا عمر. لشبونة أنا شفتها مزيج من سان فرانسيسكو وبرشلونة وشوية من روما، لكنها مميزة عن غيرها بنفس الوقت بسبب منظر واجهات المباني المصفحة بالسيراميك - أو شيء مشابه - المزخرف والملون، إللي بيميز البرتغال عن غيرها من الدول الأوروبية. لشبونة واقعة على ٧ تلال، الشيء إللي بيفهمنا ليه شوارع كثيره هنا طالعة أو نازلة ما بين حارات ومناطق المدينة. راح تقضي وقتك كله ما بين تلالها و أزقاتها المليانة بموسيقى "فادو" البرتغالية الحزينة، والمحاطة بمباني ملونة بواجهتها المرصوفة المزخرفة..وما بين ميادينها التاريخية المزينة بالتماثيل والنوافير والمرصوفة بعناية والمليانة بمطاعم مختلفة فيها الغالي والرخيص..على ضفاف نهرها إللي ياما شهد خروج رحلات البحارة البرتغاليين العظام لإستكشاف العالم الفسيح...هيك راح تقضي أغلب وقتك في لشبونة..ومش راح تحس بالملل أبداً! الموسم السياحي طقس لشبونة من الأكثر إعتدالاً ما بين المدن الأوروبية. ما بين شهر ٥ وآخر شهر ٩ ممكن زيارة هذه المدينة بدون مشاكل. في شهر ٨ بتوصل درجات الحرارة للذروة، بمعدل ٣٠ درجة (طبعاً شعبنا بيضحك في عبّه!)...شوف هو أفضل شهر ممكن يكون ٦ أو ٧، لحتى ما تصاب بالإرهاق ما بين تلال المدينة وإنت طالع نازل، طالع نازل.. المدة برأيي ٥ أيام في لشبونة كافيين بشكل عام. لكن يا ريت لو كان معك ١٤ يوم، بحيث تعمل رحلة إلي سينترا وكاشكايش المجاورين، وتسافر إلى المدينة الساحرة بورتو. العملة النقدية والأسعار العملة هي اليورو طبعاً. المدن البرتغالية تعد من أرخص المدن مقارنة بدول أوروبا الغربية. لكن طبعاً بعد كابوس الكورونا عليها اللعنة، وبرضه بسبب الشهرة المتزايدة للشبونة بسبب السوشيال ميديا؛ الأسعار من سنة لسنة في تصاعد.. إستعمال بطاقات الإئتمان ممكن في أغلب المحلات الكبيرة. لكن المحلات و المطاعم الصغيرة مثلاً ممكن ما تتعامل إلا "كاش". سحب النقود من أجهزة الصراف الآلي بتحسب ١ إلى ٣ بالمية على المبلغ إللي بيتم سحبه. لا تنسى تراجع البنك تبعك لو كان برضة بيحسب عمولة على إستعمال البطاقة أو سحب الفلوس في الخارج. أسعار السكن للزوج في غرفة في فندق أو حتى شقة ممكن يكلف من ٦٠ إلى ١٠٠ يورو لليلة، وأكثر. لشبونة شهدت تزايد في تجهيز الشقق وزيادة في أعدادها بغرض تأجيرها للسواح. وبالفعل موجودة هنا شقق معتبرة "لوكتشيري" بأسعار معقولة، مقارنةً بدول أوروبا الغربية. أسعار الخدمات بشكل عام أرخص من دول أوروبا الغربية..الوجبات في المطاعم العادية مثلاً بتبدأ من ٦ يورو فما فوق. سعر القهوة (إسبرسو) بيكلف مثلاً ٩٠ سنت أو يورو واحد بس. أرجوك ما تحمل في جيبك فلوس كثيرة.. برضه هنا موجود نشالين. الحذر واجب في لشبونة، زي غيرها من المدن. المبيت المبيت المفروض يكون في منطقة "بايكسا" أو "شيادو"، قلب المدينة ومركزها وإللي راح يكون قريب من أغلب المعالم السياحية. الوصول والمواصلات الوصول إلى لشبونة مطار لشبونة الدولي بيستقبل رحلات من أغلب قارات العالم. لشبونة واقعة على البحر وبتستقبل برضه سفن سياحية من أنحاء العالم. بصفتي خبير في عدم الإقتراب من المياه ومعلوماتي عن السباحة مشابهة لمعلوماتي عن الدورة الدموية عند حيوان "فومبات"، ف مش ممكن أقدر أعطيك معلومات مفيدة عن السفر إلى لشبونة في السفن..إحجز طيارة وخلاص..بدناش وجع راس. مطار لشبونة فيه ترمينالين إثنين (جمع ترمينال!)، ترمينال ١ هو الأهم، وإللي بتوصل له أغلب الرحلات. ترمينال ٢ هو إللي بيخدّم على شركات الطيران الرخيصة مثل "ريان إير". بعد الوصول إلى ساحة الإستقبال: في الإتجاه اليمين موجود الطريق المؤدي إلي المترو وسيارات التاكسي، وعلى اليسار موجود المكان المخصص لسيارات تطبيق "أوبر" و "بولت". المواصلات من مطار لشبونة إلى وسط المدينة القطار: مطار لشبونة بيبعد عن وسط المدينة يا دوب ٧ كلم، ولهيك مرتبط بشبكة المترو. المترو بيتحرك من المطار إلى وسط المدينة ما بين الساعة ٦ ونصف حتى الواحدة بعد منتصف الليل. سعر التذكرة ١،٨٠ يورو. أرخص من كيلو الطماطم. القطار إللي بيطلع من المطار إلى المدينة هو الخط الأحمر. لكن من أجل الوصول إلى منطقة "شيادو"، "بايكسا" أو "ألفاما" (وهي المناطق الأكثر شهرة عند السواح) لازم تبدل القطار وتركب الخط الأخضر في محطة ألاميدا (Alameda) أو الخط الأزرق في محطة ساو سيباستياو (Sao Sebastiao). التذكرة إللي الواحد بيشتريها في المطار بتتيح السفر لكل الرحلة. السيارة: التاكسي موجود زي في أي مطار في العالم، لكن بما أن تطبيق "أوبر" وتطبيق "بولت" موجودين، فنصيحتي دائماً إن الواحد يطلب سيارة من المطار إلى وسط البلد. سعر السفرية بيتراوح ما بين ٨ و١٠ يورو وملائم لكل واحد معاه حِمْل زيادة (حمل يعني شنطة، مش خروف). وزي ما حكينا المكان إللي سيارات "أوبر" و "بولت" بتنتظر ركابها فيه موجودة على الجهة اليسار..ولو مش عارف يسار من يمين (زيي أحياناً بعد سفر متعب) كله مكتوب على لافتات المطار. سعر التاكسي إلى البلد بيبدأ من ١٢ يورو، مع العلم إن ممكن يكون أكثر أحياناً؛ بحسب حركة السير والإنتظار وعدد الحقائب (لكل حقيبة بيتم حساب ١،٦ يورو مثلاً)! تأكد دائماً من إن السائق يشغل العداد "التاكسيميتر"!!  المواصلات داخل لشبونة ١. شراء التذكرة من إجل إستخدام المواصلات كلها موجودة عندنا تذكرة "نافيجانتي" (Navegante), وإللي سعرها نصف يورو، وبالإمكان شحنها من أجل ركوب المواصلات. التذكرة بيتم شرائها في أي محطة مترو من الجهاز الخاص، برضه في المطار. لإستخدام المترو على فكرة مش شرط إستخدام "نافيجانتي"، ممكن إستخدام بطاقة الإئتمان كل مرة، الشيء إللي لا أنا ولا موظفي البنوك بينصحوا فيها. في تذكرة "نافيجانتي" في عدة إمكانيات: تذكرة ٢٤ ساعة، أو تذكرة لرحلة واحدة، أو "زابينغ" (Zapping) وإللي بنصحك فيها؛ "زابينغ" بتتيح للواحد شحن البطاقة بمبلغ معين، وبالتالي إستخدام التذكرة في كل وسائل النقل. موجود برضه "لسبوا كارد" (Lisboa Card) ليوم أو يومين أو ٣ أيام وبيتيح الدخول لأكثر من أربعين معلم سياحي، وبرضه إستخدام المواصلات. سعر التذكرة ل ٣ أيام ٥٤ يورو. ٢. أنواع المواصلات العمومية في لشبونة -المترو: في لشبونة موجودة ٤ خطوط مترو داخل المدينة، متوزعة على أغلب أقسام المدينة (أزرق، أصفر، أحمر، أخضر). سعر الرحلة الواحدة بإستخدام "زابينغ" هو ١،٦ يورو. -الترام: في أغلب الصور في الإنترنت لهذه المدينة الرائعة راح ينط لك الترام التاريخي الأصفر المميز الشكل إياه. منظر حلو..صحيح، لكن مش بس منظر، إنما خدمة سياحية مهمة. موجودة عندنا هنا ٦ خطوط هي 12E, 15E, 18E, 24E, 25E, 28E . أهم هذه الخطوط هو 28E ..راح أتكلم عنه في مقال لوحده قريباً. سعر الرحلة الواحدة بإستخدام "زابينغ" هو ١،٦ يورو. -المصاعد وال "إليفادور" (Elevador) : بسبب وجود المدينة على تلال، وشوارعها لهيك ممكن تكون متعبة للمشاة، موجود هنا مصاعد خارجية في بعض المناطق، أو برضه وسيلة نقل "تلفريك أرضي"..جاي الكلام عنهم كمان شوية.. سعر الرحلة الواحدة بإستخدام "زابينغ" هو ١،٦ يورو. -العبّارة: العبارة هي نوع من السفن البطيئة. هنا نصيحتي لك، لو حابب تشوف تمثال السيد المسيحي، إنك تركب عبارة "كايس دو سودري" (Cais do Sodre). سعر الرحلة الواحدة بإستخدام "زابينغ" هو ١،٥ يورو. -الباص: أكثر من ١٠٠ خط باص موجود في لشبونة. أنا ولا مرة جربتها..وبرضه أنت لو سكنت في وسط البلد. سعر الرحلة الواحدة بإستخدام "زابينغ" هو ١،٦ يورو. شو أعمل في لشبونة أكثر شئ راح يسهل عليك رحلتك هو فهم أقسام المدينة..وزيارتها بالترتيب.. الأجزاء والحارات كثيرة..لكن الأجزاء إللي بتهمنا في رحلتنا إلى لشبونة هي: ١. ألفاما: أقدم مناطق المدينة. ٢. بايكسا: قلب المدينة. فندقك المفروض يكون هنا. ٣. بايرو ألتو: منطقة كلها حياة وحركة لكثرة المقاهي والحانات والبارات، وأكثر روادها من الشباب. ٤. شيادو: مشهور بالشوبينغ والمعارض. ٥. بيليم: حي تاريخي، فيه كمية معالم تاريخية مشهورة. خلينا نستعرض أهم المعالم السياحية بحسب إنتشارها في أجزاء وحارات المدينة والمعالم الموجودة فيها: ١. "ألفاما" و "كاستيلو" (Alfama, Castelo) الإعتقاد الراسخ هو إن حي ألفاما أقدم جزء في المدينة. سنة ١٧٥٥ إستطاع هذا الحي بمعجزة النجاة من الزلزال الرهيب والمدمر، دوناً عن باقي المناطق هنا، بسبب طبيعة الأرض الصخرية هنا. أصل كلمة ألفاما هو "الحمّة"..يعني الحمامات وهيك..أيوة..الكلمة عربية يا صديقي قارىء هذه السطور العربية. بالذات في العصور الوسطى تأثر هذا الحي والحياة فيه بكثرة البحارة ،الصيادين فيها . حي كاستيلو بجانب ألفاما ممكن تعتبره جزء من ألفاما وخلاص..جنب بعض بقول لك. في ألفاما راح تشوف حياة أهل البرتغال التقليدية زي ما هي. في شوارع وأزقة ألفاما ما في مسار معين تتمشى بحسبه..المفروض الواحد "يضيع" بين أزقاتها و "ويغرق" في تفاصيل البيوت الصغيرة، وواجهاتها، ومحلاتها الصغيرة. أهم المعالم السياحية إللي بنصحك تدخلها في ألفاما: قلعة ساو جورجي (Castelo Sao Jorge): هذه القلعة المطلة فوق سقوف المدينة، تم بنائها في القرن الثامن، خلال فترة حكم المسلمين في البرتغال..أيام ما كانت لشبونة هي "ال-أشبونة"، وكانت من أبرز المدن الأوروبية. المنظر فوق سقوف ألفاما من هنا ساحر. سعر التذكرة ١٥ يورو. الكاتدرائية "سي دي ليسبوا" (Se de Lisboa) : هذا المبنى العريق عمره أكثر من ٨٠٠ سنة، وإللي تم بنائها مكان المسجد إللي كان مقام هنا. دخول المبنى الأساسي مجاني. "ميرادورو بورتاس دو سول" (Miradouro Portas do Sol): من هنا عندك إطلالة خلابة فوق أسقف ألفاما ونهر "تيو" "ميرادورو سانتا لوسيا" (Miradouro Santa Luzia): من هنا برضة موجودة إطلالة خلابة على حي ألفاما. "بانتياو ناسيونال" (Panteao Nacional): هذا المبنى التاريخي العملاق الأبيض الشامخ فوق أسقف حي ألفاما إللي أمامك، تم تأسيسه في القرن الثامن عشر، وبيضم رفات شخصيات مهمة في تاريخ الدولة..بذكرلك منها لاعب كرة القدم الأسطوري "أويزيبيو". بيفتح أبوابه ما بين الساعة ١٠ والسادسة مساءاً للجماهير، وسعر التذكرة هو ٤ يورو. كنيسة ودير سان "فينسنته دي فورا" (San Vincente de Fora): لمحبين الفن المعماري..وقريبة مسافة خمس دقائق مشي عن "بانتياو ناسيونال" جولة في عالم موسيقى ال "فادو" (Fado): في ألفاما، في أواخر القرن الثامن عشر، وُلدت موسيقى "فادو".الإعتقاد السائد إن الموسيقى هذه كان أساسها البحارة والصيادين إللي كانوا بيقضوا خلال إستراحتهم في مقهى أو بار أو مطعم في ألفاما. وطبعاً أغلب هواجسهم وأفكارهم إلها طابع حزين، بحكم بعدهم عن عائلاتهم بسبب طبيعة شغلهم الصعب، وبرضه بسبب آمالهم لمستقبل أفضل. وهيك ولدت موسيقى ال "فادو" الميلانخولية. خلال التمشي في شوارع ألفاما لابد ما يواجهك موسيقي متمكن بيترنم باللغة البرتغالية الساحرة بألحان ولا أروع. فيك تتجول على شوية أماكن للتعرف على هذه الموسيقى إللي أصبحت جزء لا يتجزأ من هوية لشبونة والبرتغال؛ مر على "كلوب دي فادو" (Clube de Fado) أو متحف "فادو" ( Museu do Fado ) ولو كنت من البشر الفاضية أشغال ووقتك كثير هنا ممكن تجرب عشاء في إحدى المطاعم المعتبرة شكلاً وأكلاً بمرافقة عروض موسيقى فادو..مثل "أسوسياو دو فادو كاستو" (Associacao do Fado Casto) ،وهو مبنى تاريخي فيه آثار من العصر الروماني بيقدم مأكولات برتغالية بجانب موسيقى الفادو. سوق "فيرا دا لادرا" (Feira da Ladra) : أقدم سوق في لشبونة بيفتح كل يوم ثلاثاء وسبت في "كامبو دي سانتا كلارا" (Campo de Santa Clara) . مبدئياً هذا المكان تابع ل منطقة "جراتسا" ، لكنه قريب من ألفاما...ف ليه لأ يعني. في هذا السوق بيبيعوا كووول شيء من القديم للجديد، من الملابس للمأكولات..وغيره. ٢. منطقة "بايكسا" (Baixa) هذه المنطقة موجودة ما بين منطقة "شيادو" ومنطقة "ألفاما". مش عارف شو بدي أحكيلك بس لشبونة شكلها منحوسة..زي ما حكينا عن الزلازل إللي أصابتها في الماضي، برضة منطقة "بايكسا" تضررت بشكل كبير، لكن هده المرة بسبب حريق في سنة ١٧٥٥. الماركيز "دي بومبال" بيرجع له الفضل في تصميم وبناء هذا الحي من جديد، وإللي حاولوا يصمموه بحيث إنه يكون أمان أكثر في حالة الزلازل أو الحرائق. لو شفت خارطة لحي "بايكسا" راح تشوف الترتيب والنظام الرهيب في شكل شوارعها، إللي عاملة زي دفتر الحساب.. أهم المعالم والفعاليات السياحية في بايكسا: "براسا دو كوميرسيو" (Praca do Comercio): ميدان فسيح جداً هو الأفخم والأجمل في لشبونة، أفضل ميزاته إنه مفتوح من الجهة المطلة على نهر. الميدان بتحسه موجود من أجل إبهار كبار رجال السياسة خلال زيارتهم للبرتغال. الباب الرئيسي لهذا الميدان بقوسه المشهور بيدخل فيك على شارع بديع جداً للمشاه..هو "روا أوغوستا".. "روا أوغوستا" (Rua Augusta): هذا هو الشارع الرئيسي للمشاة في بايكسا ومليان بالبوتيكات والمحلات.. لو قررت تيجي ل بايكسا ما تيجي مع ولادك ومرتك، راح ينخرب بيتك! ..في نهاية الشارع هذا راح نوصل للنقطة التالية.."روسيو".. "روسيو" (Rossio): أو "براكا دي د. بيدرو الرابع" (Praca de D. Pedro IV). هذا الميدان كان له أهمية سياسية كبيرة في الماضي، واحدة منها مثلاً إن في إحدى مبانيه كانت تتم إجتماعات السياسيين من أجل التخطيط للإستقلال من الحكم الإسباني. المنطقة هذه تضررت بشكل كبير مثلها مثل غيرها من الزلازل الرهيبة إللي حصلت، وبشكل أكبر بسبب الحريق إللي دمر "منطقة بايكسا". تصميم اللميدان هذا على الشكل الموجود عليه اليوم تم في القرن الثامن عشر. الأرضية مبلطة هنا على الطريقة البرتغالية المميزه "كالكادا بورتوغيزا" (Calcada Portugesa) ؛ على حسب إللي بيقولوه (هم مين مش عارف..بس أنا قرأت هيك يعني) المنظر الموزائيكي هنا بيرمز للأمواج ومعها فكرة أهمية البرتغال في الملاحة البحرية في العصور الماضية. كم خطوة من هذا الميدان موجود كمان شيء، على حد علمي بيميز لشبونة عن غيرها.. إليفادور دي سانتا يوستا" (Elevador de Santa Justa): لشبونة واقعة على سبع تلال...يااااادي التلال إللي جننتنا فيها!..صديقي طول بالك شوية الله يرضى عليك. موقع المدينة هذا بيفرض علينا وبيجبرنا - لحسن حظنا - إننا نستخدم كثير وسائل نقل..جزء منها هي المصاعد (Elevadores) الموجودة داخل المدينة، وإللي غيرت شكلها وميزتها عن غيرها منها المدن. أكثر مصعد مشهور..هو هذا إللي إسمه مكتوب فوق..وإللي صورته تحت.. هذا المصعد إللي هيكله حديدي وعملاق بيربط بايكسا و شيادو في أعلاه بواسطة جسر. المصعد هذا بيحمل ٢٩ شخص في المرة الواحدة، وممكن إستخدامه بواسطة "نافيجانتي كارد"..من فوق راح يواجهك منظر ساحر للمدينة....يوووووه كل المناظر من فوق ساحرة ولا شو...أيوه يا محترم.. لا تنسى إن المدينة واقعه على ٧ تلال...طيب هيني سكتت! "براسا دوس ريستاورادورس" (Praca dos Restauradores): ميدان آخر محاط بالابنية التاريخية بأساليب معمارية مختلفة..مر عليه مرور الكرام وخلص. المكان هذا جاء يذكر الجميع بحروب تحرير البرتغال من إسبانيا. ٣. "شيادو" (Chiado) هذه المنطقة موجودة ما بين منطقة "بايكسا" ومنطقة "ألتو بايرو"، وبتضم داخلها محلات وأماكن ومراكز بتتعلق بالفنون والتقاليد البرتغالية، بجانب محلات لعشاق الشوبينغ ومجموعة معتبرة من المقاهي والمطاعم..غير عن شوية مباني تاريخية وتماثيل لشخصيات مهمة في تاريخ المدينة والدولة. نصيحتي الشخصية لك إنك تسكن في منطقة شيادو أو بايكسا. بما إنني ذكرت الزلازل والحريقة في الماضي إللي دمروا أجزاء من المدينة، لا بد طبعاً إنني أذكرلك إن برضه في سنة ١٩٨٨ هب حريق في إحدى المراكز التجارية كاد أن يقضي على منطقة شيادو كلها..هي هذه المدينة منحوسة ولا شو قصتها؟؟. أكثر من ١٨ مبنى تاريخي في شيادو راحوا في الرجلين. لكن المسؤولين أدوا أداء وجبار في ترميم ما يمكن ترميمه. شيادو كانت دائماً مركز لعدد كبير من المسارح مثل مسرح "ساو كارلوس" (Sao Carlos) ومسرح "ساو لويز" (Sao Luiz) ، وفي مقاهيها كان ملتقى لعدد من الأدباء والمفكرين ؛ شخصيات مرموقة مثل "فرناندو بيسوا" (Fernando Pessoa) و "إيكا دي كويروز" (Ea de Queiroz). أهم الفعاليات والمعالم السياحية الموجودة في شيادو: "شارع جاريت" (Rua Garret): الشارع الرئيسي في شيادو، وبيضم عدة مباني مهمة ما بينها عدة مسارح ومكتبة "ليفاريا بيرتراند" العريقة. طبعاً موجودة هنا محلات بتبيع كل شيء وبيغلب عليها الطابع العصري و"الغالي". خلي بالك!..الشارع هذا موجود على منحدر تل. وإنت طالع..طالع..طالع راح توصل للنقطة القادمة.. "لارجو دو شيادو" (Largo do Chiado): هذا الميدان الصغير ساحر المنظر هو قلب القلب..مش قلبي أنا، قصدي قلب شيادو إللي هي قلب لشبونة يعني. الأجواء هنا رائعة وسياحية جداً، مليااان بشر من كل الأجناس ودايماً في حركة. التمثال الموجود هو للشاعر والممثل البرتغالي "أنطونيو ريببيرو شيادو" ( António Ribeiro) ..شيادو؟؟؟ إسمه على إسم المنطقة هذه؟؟..يآخي الأخ إنطونيو هذا من مواليد القرن الخامس عشر...منطقة شيادو هي إللي سُميت بإسمه تكريماً له. في الجهة المقابلة لتمثال إبن عمنا أنطونيو موجود مقهى "برازيلييرا" المشهور. "كافيه برازيلييرا" (Cafe Brasileira): مقهى تاريخي عمره أكثر من ١٠٠ سنة! قهوة "بيكا" هي إسم ال "إسبريسو" البرتغالي. كافيه برازيليرا هذا يُعتبر مخترع ومقدم الإسبريسو البرتغالي هذا للعالم كله..ألف شكر، أنا جربته وحسيته إيطالي.المهم..لا تنسى بعد ما تشرب فنجان القهوة تعمل شغلتين: أدخل المقهي وشوف الديكور التاريخي من الداخل، وثانياً خذ صورة بجانب التمثال البرونزي الجالس على كرسي أمام الكافيه. هذا التمثال هو للأديب "فيرناندو بيسوا" إللي كان من مرتادي المقهى. "ليفاريا بيرتراند" (Livaria Bertrand): ليفاريا بيرتراند هي أكبر مكتبة في العالم لا زالت شغّالة إلى يومنا هذا. أسست في سنة ١٧٣٢..مش عارف لو كانت ذو أهمية للسواح، لكن لا شك لمحبي الأدب. "كونفينتو دو كارمو" (Convento do Carmo): قريب من "إليفادور دي يوستا" إللي حكينا عنه من قبل موجودة أنقاض، أو بالأحرى أطلال كنيسة تاريخية. خلال زلزال سنة ١٧٥٥ تدمر جزء من هذه الكنيسة وإللي بقي منها هو إللي شايفه.. "إليفادور دا غلوريا" (Elevador da Gloria): في لشبونة موجودة ٣ خطوط من قطارات ترام تاريخية شغالة ب "شد الحبال" بالكهرباء. واحد منها هو "إليفادو دا غلوريا" ، إللي بيربط منطقة بايكسا بمنطقة بايرو ألتو. هذا القطار راح يوصلك إلى النقطة التالية.. "ميرادورو دي ساو بيدرو دي الكانتارا" (Miraduoro de Sao Pedro de Alcantara): واحد من أكبر المناطق المطلة على المدينة من فوق..أيوة..كمان واحد..ولازم تروحله. من هنا راح تشوف أمامك منظر لتفاصيل المدينة أهمها "أفينيدا دي ليبردادي" (Avenida da Liberdade) ، أفخم شارع موجود هنا علشان يبهر الزوار..على غرار "شامبس إليزيه" (Champs Elysees) في باريس.. ٤. "بايرو ألتو" (Bairo Alto) بايرو ألتو هو الجزء الأعلى من المدينة. ومعروف بوجود أكبر عدد من المقاهي والحانات والبارات والملاهي الليلية. لكن برضة هنا موجودة شوية نقاط ممكن تهمنا..خليني أحكيلك عن الأشياء الفليلة إللي عجبتني هنا: "براكا لويس دي كامويش" (Praca Luis de Camoes): كم خطوة من "لارجو دو شيادو" في بايكسا موجود هذا الميدان التاريخي الساحر إللي يعد بداية منطقة "بايرو ألتو". التمثال الموجود هو ل الأديب لويس دي كامويش. الصراحة..واضح إن البرتغال بتقدر أدباءها وفنانيها بشكل كبير. "ميرادورو سانتا كاتارينا" (Miradouro Santa Catarina): من هنا موجودة إطلالة رائعة من فوق على نهر تيو، وجسر ال ٢٥ من أبريل...أيوة..كمان إطلالة..راح أهريك إطلالات اليوم..لكن هيك المدينة مبنية شو أعمل؟ على فكرة هنا موجود منتزه طبيعي حلو للجلوس والإستجمام، أو القراءة..أو التأمل مثلاً. في صيادلة ما بيننا؟..قريب من هنا موجود متحف للصيدلة..ما شفتوش وما جربتوش..بس حبيت أذكره كمتحف فريد من نوعه. إليفادور دي بيكا (Elevador da Bica) في لشبونة موجودة ٣ خطوط ترام، شغالة كهربائياً بالشد على الحبال..ترجمتها بكلماتي الخاصة والنتيجة طلعت مصيبة سوداء..شئ مشابه ل "التلفريك"، لكن أرضي. أجمل هذه الخطوط هو إليفادور دا بيكا، وإللي بيطلع بركابه على تل علو ٢٥٠ متر حتي منطقة "بايرو ألتو"، مروراً بازقة وشوارع جانبية ظريفة بتعكس الحياة البرتغالية في لشبونة. سعر التذكرة ذهاباً وإياباً هي ٤،١ يورو. ٥. "بيليم" (Belem) بيليم هو واحد من أصغر مناطق لشبونة. خلي بالك إن بيليم بيبعد عن مركز المدينة ما يقارب ال ٨ كلم. لهذا الشيء إركب المترو أو الباص المتوجه إلى بيليم. شو لازم نشوف في بيليم: "توري دي بيليم" (Torre de Belem): واحد من أشهر مباني لشبونة التاريخية على الإطلاق، هو هذا المبنى إللي تم تشييده قديماً بهدف حماية المدينة. من هنا كانت تطلع أغلب السفن بهدف إستكشاف العالم الوسيع بقيادة أشهر بحارة البرتغال. هذا المبنى خدم على مر التاريخ مرة كمخزن للأسلحة ومرة كسجن، ومرة كمنارة. مبنى "بادراو دوس ديسكوبريمينتوس" (Padrao dos Descobrimentos): مبنى مميز برضه قريب على نهر تيو، وتم إفتتاحه في الستينات لتخليد أسماء من أشهر البحارة البرتغاليين منهم فاسكو دي جاما وماجللان. "موستيرو دوس جيرونيموس" (Mosteiro dos Jeronimos): دير تاريخي تم بناؤه بأمر من الملك مانويل الأول. المبنى من الداخل تحفة معمارية تم ضمها ضمن تراث اليونيسكو في الثمانينات. غير عن هي: في بيليم موجود عدد كبير من المتاحف، للأمانة أنا ما دخلتها شخصياً.. فعاليات أخرى مهمة لازم تعملها في لشبونة: السفر في ترام رقم ٢٨(28E) هذه الخطوط إللي شغّالة من الأربعينات هي مغناطيس سياحي معتبر. لأن الخط هذا بيمر على أهم الأجزاء المحبوبة بايكسا، شيادو وألفاما، الركوب فيه وتأمل الشوارع والأزقة والمباني التاريخية صعوداً ونزولاً هو من أجمل الفعاليات السياحية ويمكن من أمتع الرحلات داخل المدينة. في معلومات كثيرة نحكيها عن هذا المشوار الساحر.. المقال قريباً.

القرى البيضاء في الاندلس مقدمة مبسطة الموسم السياحي العملة النقدية والأسعار الوصول والمواصلات خط الرحلة المبيت شو أعمل في هذه الرحلة مقدمة مبسطة سمعت عن القرى البيضاء في الأندلس؟..طبعاً لأ، عارفك!..أكيد كل إللي كنت مركز عليه في مشاويرك بين صفحات الإنترنت، هي المدن الكبيرة بس. طبيعي إن إحنا كعرب بنهتم بالمدن الكبيرة إللي إلها ماضي وتاريخ معروف بنشعر إنه جزء منا؛ مدن مثل غرناطة وإشبيلية وقرطبة. وبحب أحكيلك إنك ما غلطت هنا..المدن هذه - بجانب كونها تاريخية وفعلاً بتستحق الزيارة - هي مدن كبيرة وفيها الكثير إللي ممكن تقدمه للسواح. الأندلس هو أجمل إقليم في إسبانيا! بجانب هذه المدن الكبيره موجودة في الاندلس عشرات القرى، إللي الزمن وقف عندها..تاريخية جداً وساحرة ومميزة عن غيرها. في السنين الأخيرة إبتدأ يظهر مصطلح "رحلة القرى البيضاء" ( Ruta de los Pueblos Blancos)، وهي عبارة عن رحلة ما بين قرى تاريخية متوزعة على إمتداد خط وهمي لمسافة 150 كلم داخل إقليم الأندلس، تقريباً ما بين ملقة (Malaga) و قادش (Cadiz). القرى البيضاء هي وجبات معمارية وتاريخية وحضارية دسمة لأبعد الحدد. عندنا أكثر من 30 قرية تاريخية (وفي روايات أخرى ١٩..أو ٤٠..مش عارف وين تعلموا العد!) متناثرة ما بين تلال، جبال وسهول الأندلس المزدانة بأشجار الزيتون والصنوبر وحقول عبّاد الشمس. وما بين تل و وادي، وأحياناً على جانب طريق صغير متفرع راح تواجهك بواقي مباني تاريخية من عصور ولت، سواءاً من العصر الإسلامي أو غيره.. القرى البيضاء..هي بيضاء (أنا في تألق اليوم ما شاء الله!). والأكيد إن لون بيوتها وشكلها المعماري بيرجع للعهد الأموي في الأندلس، وإللي فيه كانت البيوت بيضاء بالفعل إتقاءً، من الحر الشديد في الصيف. ألفن المعماري إللي بنشوفه هنا كان نسخة منه في دول شمال أفريقيا. الموسم السياحي أفضل وقت لهذه الرحلة هو ما بين شهر ٤ إلى شهر ٦، أو شهر ٩ إلى ١٠. ولو إنني شخصياً بفضل شهر ٥ أو ٦. خلال شهر ٧ وشهر ٨ بتكون درجات الحرارة لا تطاق هنا، أو يعني مش ملائمة للقيام برحلة من هذا النوع. المدة ٣ إلى ٥ أيام كافيين تماماً لرحلة من هذا النوع. ومش شرط الواحد يشوف كل القرى؛ إختار كم واحدة بطريقك وريح راسك. أنا شخصياً بحب أجمع عدة رحلات مع بعض، وأفضل شيء بالنسبة للأندلس هو دمج رحلة إلى القرى البيضاء مع رحلة إلى المدن الكبيرة، وإللي راح نتطرق لها في مقال آخر إن شاء الله. لو نويت تعمل زيي وتدمج الرحلتين على بعض، تأكد إنك تيجي للأندلس لمدة عشر أيام إلى أسبوعين على الأقل. العملة والأسعار العملة في إسبانيا هي "يورو". والدفع بواسطة بطاقات الإئتمان و ال إي-سي- كارد (من البنوك الأوروبية) ممكن في كل مكان. أجهزة الصراف الآلي موجودة في كل مكان، وممكن سحب النقود منها. تأكد من البنك تبعك، لو كانوا بيحسبوا عمولة على سحب النقود في الخارج، وإحسب طبعاً لو كان أفضل لك تحويل النقود إلى العملة الأوروبية، أو سحب النقود من الأجهزة في المدن والقرى الإسبانية. للأسف..إسبانيا شهدت بشكل عام في السنين العشرة الأخيرة إرتفاع ملحوظ في الأسعار. الأندلس كوجهة سياحية إبتدت تكتسب شهرة أكبر وأكبر في السنين الأخيرة. لكن..بشكل عام ومقارنةً بدول أوروبية أخرى مثل فرنسا أو ألمانيا، أو حتى مدن إسبانية أخرى مثل برشلونة، بنقدر نعتبر الأندلس أرخص حبتين.. التكلفة الشخصية للشخص الواحد (المصروف) بتتراوح تقريباً ما بين ٣٠ و ٥٠ يورو يومياً (لكن لو كنت من الناس ال "هاي فاي" ممكن تدفع ال ٣ أضعاف لوجبة واحدة في مطعم من المطاعم إياها..وبدون خبز). أسعار الطيران بتتعلق طبعاً من أي دولة الواحد مسافر. لو كان من داخل أوروبا مثلاً، سعر التذكرة لإتجاه واحد بتوصل حدود ١٠٠ إلى ٢٠٠ يورو. وأسعار الفنادق بتبدأ من ٧٠ يورو تقريباً لليلة الواحدة للزوج، في فندق متوسط الخدمات في المدن الكبرى أو القرى. ولأن الرحلة هذه ما بتنفع من غير إستئجار سيارة، خليني أحكيلك إن أسعار إستئجار السيارات هنا بتبدأ من ٤٠ يورو لليوم الواحد. لا تنسى إن لسة في أسعار لمواقف السيارات، وبرضة أحياناً ضريبة الطرق. لزم التنويه إن الأسعار هذه تقريبية وبتتعلق برغبة الشخص وإستعداده يدفع كام، وبتتعلق برضه بالموسم السياحي وعوامل أخرى مثل المنطقة إللي الفندق موجود فيها مثلاً. الوصول والمواصلات أفضل إمكانية هي النزول في مطار ملقة والرجوع من مطار قادش..وما بين المدينتين راح تختار القرى إللي بتحب تمر عليها.. أو ممكن النزول والرجوع من نفس المطار، بس المنطقي أكثر هو الأمكانية الأولى. هذه الرحلة بيلزمها سيارة ومن غير سيارة مش ممكن القيام فيها! ملقة قادش خط الرحلة خط الرحلة هو مش خط واحد ووحيد، إنما هي عدة خطوط ممكن الواحد يمشي بحسبها, وفعلاً..موجودة كثير صفحات إنترنت بتنصحك بالمسار الفلاني أو العلاني، أو مجموعة قرى هنا ولا هناك. لكن، الموضوع هذا قبل كل شئ بيتعلق بأي قرى الواحد حابب يشوفها شخصياً..والشئ المؤكد أكثر وأكثر إن هذا المقال جاي ينصحك بأفضل خط رحلة وأجمل قرى لازم تكون في مسار رحلتك القادمة، من منظوري الشخصي طبعاً. بعد الوصول إلى مطار قادش (مدينة كبرى) وقضاء يوم أو إثنين فيها راح تبدأ الرحلة بالسفر مدة ٤٠ دقيقة إلى أول قرية من القرى البيضاء، أركوس دي لا فرونتيرا..وبعدها راح تكمل على عدد من القرى الأخرى، لحتى توصل ملقة..خلينا أحكيلك عن خط الرحلة المفضل عندي: أركوس دي لا فرونتيرا (Arcos de la Frontera) إلى زاهاره دي لا سييرا (Zahara de la Sierra) ..٤٥ دقيقة زاهاره دي لا سييرا (Zahara de la Sierra) إلى جراتساليما (Grazalema) ..٣٥ دقيقة جراتساليما (Grazalema) إلى أولفيرا (Olvera) ..٣٠ دقيقة, والمبيت في أولفيرا أولفيرا (Olvera) إلى ستنيل دي لاس بوديجاس (Setenil de las Bodegas) ..٢٥ دقيقة ستنيل (Setenil de las Bodegas) إلى روندا (Ronda) ..٢٥ دقيقة، والمبيت في روندا روندا (Ronda) إلى ميخاس (Mijas) ..٩٠ دقيقة ميخاس (Mijas) إلى ملقة (Malaga) ..٣٠ دقيقة المبيت بما إن مدة الرحلة راح تكون من ٣ إلى ٥ أيام: المبيت مفروض يكون قريب من خط الرحلة، إذن أفضل شئ هو المبيت في القرى على طول خط الرحلة..دائماً المبيت ليلة أو ليلتين، ثم السفر.  مدة السفر تقريباً ـ بحسب خط الرحلة إللي أنا رسمته ـ راح تكون ما بين ٦ أو ٧ ساعات، بيتم تقسيمهم على ٣ إلى ٥ أيام، بحيث أن الواحد ممكن يبات في فندق ليليتين أو ٣ أو ٤ خلال الرحلة. شخصياً أنا كنت فضلت المبيت في القرى أو المدن المفضلة عندي مثل اولفيرا، ستنيل دي لاس بوديجاس، وروندا. شو أعمل في هذه الرحلة أركوس دي لا فرونتيرا (Arcos de la Frontera) أركوس هي واحدة من أشهر القرى البيضاء في الأندلس، وأغلب إللي بيمشي على خط هذه الرحلة بيبدأ الرحلة من أركوس. يمكن لإنها قريبة من مدينة قادش الساحلية مدة ٤٠ دقيقة سفر بالسيارة. قادش (أو ملقة) هي المدينة إللي الأغلبية بينزلوا في مطارها كأول محطة في الأندلس. أركوس واقعة على جبل صغير صخري مطل على وادي نهر جوادالاته (Guadalate)، وعدد سكانها بيبلغ قريب ال ٣٠٠٠٠ نسمة. موقعها هذا هو سبب شكلها المميز، ببيوتها التاريخية المبعثرة هنا وهناك وبيعلو فوق سطوحها برجين بأجراسهم التاريخية. بما إننا إتفقنا إنك راح تسافر بالسيارة: راح تلاقي موقف للسيارات في "دوك دي أركوس" (Duque de Arcos) بداخل القرية. الوصول إلى مركز القرية "بلاسا ديل كابيلدو" (Plaza del Cabildo) - وإللي الواحد بيمشي له من موقف السيارات مروراً بمجموعة من البيوت التاريخة، القصور، والكنائس - ممكن عن طريق "كاليه دين إسبينوزا" (Calle dean Espinosa). هنا موجود مبنى البلدية. خلف البلدية موجودة القلعة التاريخية (Castillos) وأمامها ميدان. الميدان هذا هو المكان إللي بتتم فيه الإحتفالات المختلفة على مدار السنة، وفيه قديماً كانت بتدور ألعاب مصارعة الثيران الرهيبة. حول نظرك بإتجاه الشمال لتشوف الكنيسة الرئيسية "سانتا ماريا" في أركوس مع برجها العملاق بأجراسة ال ١١، وإللي عمرها أكثر من ٦٠٠ سنة. هذه الكنيسة كانت أقيمت مكان المسجد إللي كان موجود هنا خلال حقبة المسلمين في الأندلس. في الإتجاه الجنوبي موجود "بالكون دي لا بينيا نويفا" (Balcon de la Pena Nueva)؛ من هنا عندك إطلالة فائقة الجمال على نهر جوادالاته وسلسلة جبال تحت إسم "سييرا دي جراتساليما" (Sierra de Grazalema). إطلالة أخرى ممكن تشوفها يا معلم لو لحقت اللافتات المُعَنْونة إلى "ميرادور" (Mirador). من هنا بيواجهنا منظر للبحيرة وفي الخلفية سلسلة الجبال إياها. شرقي القرية موجود مبنى الكنيسة التاريخية "سان بيدرو" (San Pedro), وإللي عمرها أكثر من ٧٠٠ سنة..الصراع التاريخي على منصب "الكنيسة الرئيسية في القرية" كان مشهور في أوروبا ووصل أيامها لمقر البابا من أجل البت فيه. التمشي في الأزقة الضيقة وإستكشاف تفاصيلها هي واحدة من الفعاليات المحببة والمهمة عند السواح هنا. شايف الأقواس الموجودة بكثرة ما بين مباني الأزقة هذه؟..يقال إنها سبب تسمية القرية بهذا الإسم (أركوس = قوس).. لو واجهك الحظ وجيت هنا في شهر ٩، راح تشوف هنا الإحتفالية السنوية في القرية: "فيريا سان ميغيل" (Feria san Miguel) وهي عبارة عن احتفال تقليدي بمرافقة موسيقيين، وألعاب تقليدية، ،مأكولات شعبية..ومش متأكد الصراحة بس بيقولوا...بيقولوا يعني، إن في كمان مصارعة ثيران..يا لطيف ألطف!   زاهاره دي لا سييرا (Zahara de la Sierra) مدة ٢٢ دقيقة في السيارة بتفصل أركوس عن زاهاره دي لاسييرا. طبعاً واضح إن الإسم الأصلي عربي وهو "زهرة". هذه القرية الصغيرة، وإللي عدد سكانها يا دوب ١٥٠٠ نسمة، بعيدة ١٢٠ كلم ومدة ساعة واحدة بالسيارة من قادش. من أجمل إللي راح تشوفه في خلال هذه الرحلة هو منظر زهره من بعيد (حاسس حالي بتغزل بواحدة ست) ببيوتها البيضاء المتوزعة على سفح الجبل بشكل مخروطي، وعلى القمة بواقي قلعة من العصر الإسلامي في الأندلس. إللي رجله خفيفة وبيوصل لهذه القلعة راح ينبسط برؤية المنطقة الممتدة أمام النظر. ما بين شوارع وأزقة القرية الصغيرة متوزعة بيوت وقصور من العصور الماضية وإللي كان أغلب سكانها من نبلاء أسبانيا. مثير للإهتمام كمان برج الساعة التاريخي "تورري دل ريلوي" (Torre del Reloj)، إللي عمره أكثر من ٤٠٠ سنة، وبرضه كنيسة " إجليسيا دي سانتا ماريا دي لا ماسا" (Iglesia de Santa Maria de la Mesa) التاريخية برضة. جراتساليما (Grazalema) يا دوب ٣٥ دقيقة مسافة سفر بالسيارة من زهرة وها نحنا وصلنا للقرية التالية على خارطتنا: جراتساليما. هذه القرية واقعة داخل منتزه طبيعي أو محمية طبيعية إسمها "سييرا دي جراتساليما" (Sierra de Grazalema)، ويمكن مقارنة بالقرية إللي قبلها الإقبال عليها أكثر. هطول الأمطار في منطقة جراتساليما أغزر من مناطق أخرى، وبيفسر ليه هذه المنطقة بهذا "الإخضرار" المحيط بالبيوت البيضاء..الشيء إللي بيبرز بياضها أكثر وأكثر. جراتساليما، مثلها مثل غيرها كثير؛ بداياتها بتعود للعصر الروماني، لكنها بعد دخول المسلمين لإسبانيا تم تطويرها. كعادتنا داخل القرى البيضاء، برضه هنا في مباني تاريخية رائعة مثل كنيسة "إنكارناسيون" (Encarnacion) وكنيسة "نويسترا سينيورا دي لا أورورا" (Nuestra Senora de la Aurora)..ولا بد من الضياع والتمشي في أزقاتها بين بيوتها البيضاء. أنا بعرف إن الواحد ممكن يفكر إن القرى متشابهين، ويمكن هذا الكلام يكون إلى حد صحيح، لكن بالرغم من هيك الإختلاف والتجديد والرونق المميز موجود ما بين القرية والثانية..صدقني.. بسبب إن المنطقة هذه خضراء زي ما حكيت، أشهر الفعاليات الموجودة فيها هي التمشي في أحضان الطبيعة..ولهذا الغرض تم تطوير طرق خاصة، مُعنْونة ومليانة باللافتات والمعلومات ما بين الجبال. أهم هذه الجبال، هي أقربها إلى جراتساليما: سلسلة "سييرا دي بينار" (Sierra de Pinar), وإللي جراتساليما بتمتد في أسفلها. أولفيرا (Olvera) ياه ياه ياه على الجمال..لليوم متذكر منظر هذه القرية من بعيد وأنا بقترب منها بالسيارة. ٨٠٠٠ شخص بيسكنوا هذه القرية المقسومة قسمين: القسم الأكبر إللي بيوته مترتبة نزولاً على سفح تل، والقسم الثاني الموجود على قاعدة صخرية عملاقة، هي قلب القرية التاريخي إللي في قمته واقفة القلعة بشموخ. الكنيسة العملاقة إللي شايفها من بعيد هي أكثر شيء بيجذب العين له..وإللي أمامها هذا هو الميدان، إللي كان السوق الرئيسي أيام زمان. يا دوب ساعتين راح يكونوا كافيين (زي أغلب القرى البيضاء) لحتى تشوف معالم هذه القرية: أولها هو مبنى القلعة "كاستيللو دي أولفيرا" (Castello de Olvera), وإللي لو حبيت تدخل داخلها لازم تشتري تذكرة سعرها ٢ يورو. مركز القرية التاريخي" باريو دي لا فيلا" (Barrio de la Villa) معتبر وبيضم مجموعة كبيرة من الأزقة التاريخية الساحرة؛ جدران البيوت هنا مزينة بالنباتات وقوارير الأزهار المعلقة. أشهر شارع هنا هو "كالية ميرادور" (Calle Mirador) و "كاليه كالزادا" (Calle Calzada) بدرجاته (سلالم باللهجة المصرية!) إللي بتربط ما بين الجزء التاريخي في الأعلى والجزء السفلي. وأخيراً لا تنسى هوايتي الرومانسية لتهذيب الروح الحساسة وين ما رحت: زيارة المقبرة في أولفيرا!!..لأ خليني أحكي جد..هذه المقبرة منـظرها مميز جداً ومختلف..لو بتحب يعني وما بتخاف..إنت بس زورها بالليل.. ستنيل دي لاس بوديجاس (Setenil de las Bodegas) إنت عارفها..عارفها بقول لك..صدقني..صور ستنيل مشهورة جداً في "السوشيال ميديا"..وحتى لو الإسم ما بيذكرك بشيء، أنا متأكد إنك أكيد مرت عليك صور لهذه القرية المميزة..إيييه..بدل ما أوصفلك ..شوف الصور.. برضه هنا نفسي أحكي ياه، ياااااه، ياه ..بس مش حابب أكرر نفس الكلام. ميزة ستنيل إنها موجودة في كل خطوط رحلة القرى البيضاء مهما كانت مختلفة، وهذا بسبب شكل البيوت الغريبة المبنية داخل أو تحت الجبال الصخرية. شوارع "كويفاس دل سول" (Cuevas del Sol)، "كاليه يابونيريا" (Calle Jaboneria) و "كويفاس دي لا سومبرا "(Cuevas de la Sombra) مليانة بالبيوت هذه..لازم تشوفها! إحنا مش عارفين شيء عن بدايات هذه القرية التاريخية، لكن الأكيد إنها خدمت المسلمين بحكم موقعها العالي والآمن المطل على نهر "ترييو" (Trejo). من بواقي أو أطلال "فورتاليزا نازاري" (Fortaleza Nazari) موجودة إطلالة على هذه القرية من أجمل ما يكون.."إطلالة من الأطلال" (والله بينفع إسم لمسلسل حزين..). لكن بيضل أجمل منظر لهذه القرية من فوق هو من شارع "كاليه فينتوسيللا ألتا" (Calle Ventosilla Alta). من هنا عندك منظر للقرية كلها بشكل شبه "مَنْجلي"، ومن وراءها الحقول والتلال المليانة بأشجار الصنوبر والزيتون..ويمكن تشوفلك بقرة ولا خروف بيستمتعوا بالشمس هنا ولا هنا..عالم مرتاحة يابا.. روندا Ronda أو "رِندة" بحسب المسلسلات التاريخية إياها.. لحتى كتابة هذه اللحظة، أخوك العبدلله مش عارف ليه هذه المدينة..مش قرية..مدينة!! محسوبة على القرى البيضاء وموجودة في خط كل رحلة إلى القرى البيضاء. لكن..تخميني إن السبب هو موقعها العالي ما بين الجبال، والقريب من القرى البيضاء أكثر من قربها للمدن الكبيرة.. مشكلتي مع روندا هذه هي إنها واحدة من أكثر مدن إسبانيا تميزاً..وجمالاً..على الإطلاق، وفيها كمية مهولة من الفعاليات والمعالم السياحية..ومش راح أوفيها حقها لو ما تكلمت عنها لوحدها في مقال كامل..خليني بس أعطيك كم صورة بيشقلبوا العيون وأحمسك لزيارتها. ميخاس Mijas بعد الراحة والمبيت والجولات في روندا، مسافة ساعة ونصف إلى أخر محطة على خط رحلتنا ما بين القرى البيضاء؛ ميخاس. في الحقيقة هي مدينة بتتكون من قسم تاريخي بين الجبال ومناطق تابعة لإلها بإتجاه الساحل..لكن..خلينا نعتبرها قرية زينا زي غيرنا من السواح، لأنه كل إللي راح نشوفه منها هو الجزء التاريخي ما بين الجبال. القرية أصبحت مشهورة جداً، وكونها قريبة من ملقة خلاها محطة لإستقبال السواح إللي بيوصلوها ليوم واحد بس. موقع ميخاس ما بين الجبال أعطاها ميزة لوحدها: من على السور التاريخي المحيط فيها راح تواجه الأنظار صورة لساحل البحر المشهور "كوستا دل سول" (costa del sol). تجول في شوارع وأزقة ميخاس ال مشابهة لباقي القرى البيضاء، ولو إن الواحد بيحس ما بينها إن البلدية مهتمة أكثر بالمنظر والنظافة هنا. راح تلاحظ كثرة القوارير الزرقاء معلقة على حيطان البيوت، وراح تمشي في أزقة غريبة أحياناً، هي عبارة عن أدراج ما بين البيوت والمطاعم والنوافير الصغيرة. التفاصيل الصغيرة إللي بتستحوذ على إهتمام السواح هنا فعلاً كثيرة. لا تنسى تمر على الحلبة التاريخية لمصارعة الثيران في ميخاس. على فكرة...لا تستغرب من كثرة الحمير هنا. الحمار يعد "التاكسي التاريخي في شوارع ميخاس"..لكن ما حدا راح يلزمك تركب هذا التاكسي..لا تزعل نفسك..بسيطة..إركب حصان (داخل ميخاس التاريخية مش موجودة سيارات). بعد ميخاس راح تكون وجهتنا مدينة ملقة الكبيرة والمشهورة، وإللي راح نتكلم عنها في مقال لوحدة، زي ما راح نتكلم عن قادش، وغرناطة، وإشبيلية، وقرطبة خلال رحلة إلى كبرى مدن الأندلس الكبيرة..للحديث بقية..

فيتنام من سايغون إلى هانوي -لمحة مبسطة -ألموسم -التأشيرة -العملة النقدية والتعامل فيها -الأسعار -الوصول والمواصلات -شو أعمل في فيتنام مقدمة مُبسّطه فيتنام مين هذه إللي تسافر لها؟..العالم الثالث؟..مش خايف؟..مش خطر عليك؟..خلي بالك من الأكل لتتسمم!..سيبك يا رجل.. إزعاج..عادات غريبة.. كل هذا سمعته لما إبتديت أفكر إنني أسافر إلى فيتنام، واحدة من الدول الفقيرة في آسيا..وبعد ما سافرت, إكتشفت قد إيش الكل كان غلطان؛ شفت شعب طيب وبشوش لأبعد الحدود، شفت أحياء فقيرة كثير بجانب أحياء عصرية فاحشة الثراء، فيها ناطحات سحاب وشوارع فخمة. جربت مطاعم بتتفوق على مطاعم أوروبا الفاخرة، بس حبيت أكل الشوارع أكثر ومن غير ما يجيني ولا مرة تسمم!.الطقس معتدل (بس إعرف متى تسافر!)، الخدمات معتبرة وبتراب الفلوس، الشواطيء خلابة وإيجابياتها بتفوق سلبياتها. فيتنام هي واحدة من أكثر الدول شهرةً في العالم، وللأسف مش بسبب شيء إيجابي، بل بسبب حرب أهلية، طاحنة ووحشية إمتدت لأكثر من عشرين سنة، ما بين سنة ٥٥ و ٧٥..حرب تدخلت فيها روسيا وأمريكا. لكن شو بدنا بالحروب وسيرتها عليها اللعنة؟! هذه الصفحة جاية لتحسين المزاج والتشجيع على السفر، مش العكس! لحسن الحظ فيتنام في أيامنا هذه هي واحدة من الدول المحبوبة والحبّوبة، ومن سنة للي بعدها أعداد السواح إللي بتزور فيتنام بتقفز للأعلى بخطوات كبيرة: في آخر سنة عندنا أكثر من ١٣ مليون سائح شغوف، زيي وزيك دخلوا فيتنام..شايف! مقارنةً بدول مشهورة مثل تايلاند أو اليابان يعد هذا الرقم صغير جداً، الشيء اللي بيوصلنا لأهم ميزة في هذه الدولة: إنها رخيصة جداً..وراح نتطرق لهذا الموضوع متاخر. الميزة الثانية وإللي لا تقل أهمية هي إن الطبيعة هنا ساحرة وعذراء! فيتنام زي ما حضرتك شايف يا زميل ممتدة جغرافياً بالطول، والجانب الشرقي هو عبارة عن ساحل على البحر ممتد من أقصى الجنوب لاااااااا أقصى الشمال. أكبر وأهم مدينتين هم سايغون (Saigon) في الجنوب وإللي إسمها تغير بعد الحرب وأصبح "هو شي مين سيتي" (ho chi minh city) نسبة ل...هو شي مين طبعاً!..الأمر واضح يعني ("هو شي مين" كان ثوري فيتنامي وأحد مؤسسي حزب فيتنام الشيوعي، ناضل ضد الفرنسيين واليابانيين في الحروب إللي قامت وشغل منصب رئيس الحكومة ورئيس الدولة في وقت متأخر)، والمدينة الثانية هي هانوي (Hanoi)، عاصمة فيتنام الحالية. على إمتداد الساحل موجودة عدة مدن بيهمنا منها - كبشر جاية فترة وراح تخلع - شوية مدن بس: أهمها دا نانغ (da nang)، نها ترانغ (nha trang) و هوي آن (Hoi an). في السنين الأخيرة أصبحت فيتنام أكثر شهرة على المستوى السياحي، الشئ إللي أدى لتطور البنية التحتية، توسّع المدن الساحلية، وإزدياد ناطحات السحاب والمنتجعات السياحية بشكل مبهر وسريع. شعب فيتنام أغلبه طيب، متعاون وأكيد بيرغب إن السياحة تزدهر يعني، علشانها مصدر رزق لجزء كبير من الشعب هنا. طبعاً المفروض - زي في أي مكان ثاني في العالم - إن الواحد يأخذ حذره بشكل معقول. رحلتك الأولى لفيتنام المفروض تشمل عدة مناطق..لازم تأخذها "لوكشة واحدة"، بما إنك يعني كلّفت نفسك وجيت هنا.."إذا خبصتها ف أخبصها مزبوط" (مثل قديم مشهور من إختراعي!). أغلب السواح إللي بييجوا هنا بيبدأوا من سايغون وبينتهوا في هانوي، أو العكس طبعاً، مروراً بشوية مدن ومناطق ومحميات طبيعية ما بينها..رحلة راح تكون خلطة مجنونة معجونة على بعض مكونات هي: شوية إستجمام على شواطئ من الأجمل في آسيا..حضارات ومعالم وديانات بعيدة عن إللي بنعرفه..مناظر طبيعية بتخص جنوب شرق آسيا..وكل هذا وسط مطاعم ايييه..يا لهوييي!..وبأقل الأسعار. أفضل وقت للسياحة في فيتنام   ما بين شهر ٣ وشهر ٥. هنا راح تضمن إن الأمطار تكون قليلة والطقس معتدل والعواصف بعيدة عنك..عواصف؟؟ أيوة..العواصف موجودة أحياناَ..لكنها عادةَ بتكون إبتداءاً من شهر ٦ أو ٧. لاحظ إن الطقس بيكون شوية أبرد, كل ما إتجهنا للشمال وقربنا من الساحل، مثل مدن نها ترانغ ودا نانغ. هنا في نسمة ريح مسائية بترد الروح..على قولة ستي الله يرحمها. مدة الرحلة أقل حد أسبوعين. أقل من هيك وبتصير الرحلة صربعة وتعب ووجع راس وضغط نفسي.. التأشيرة الغالبية العظمى من السواح بتحتاج تأشيرة (فيزا) من أجل دخول فيتنام سياحياً. طبعاً الشروط بتختلف بحسب الجنسية. دول مثل ألمانيا، اليابان، بريطانيا أو فرنسا مثلاً معفية من الفيزا لمدة ٤٥ يوم. بغرض التقديم على طلب لفيزا سياحية لا بد التواصل مع الدوائر الحكومية أو السفارة أو القنصلية الفيتنامية. بالإمكان إن الواحد يبعث الأوراق اللازمة مع جواز السفر وصورتين والرسوم اللازمة عن طريق البريد للسفارة لطلب فيزا مدتها راح تكون ٣٠ يوم. ألإمكانية الأفضل والأسرع والأقل وجع راس هي طلب الفيزا أونلاين (اللينك موجود على صفحة سفارة فيتنام). هنا المدة راح تكون لفترة ٩٠ يوم. بعد تعبئة الإستمارة أونلاين ودفع الرسوم أونلاين بواسطة بطاقة الإئتمان (٢٥ دولار تقريباً) راح يجي الرد بالقبول أو الرفض خلال ٣ إلى ١٠ أيام.. أنصحك بشغلة: عبي الإستمارة بحذر وخليك صريح بإجاباتك وراجع البيانات عدة مرات..غلطة صغيرة ممكن تتسبب برفض التأشيرة. الرد بييجي أونلاين ولما يجي يا ريت تراجع البيانات من جديد..أحياناً الواحد بيغلط بتعبئة الإستمارة وبرغم من هيك بيجي القبول..لكن لو كانت معك تأشيرة ببيانات مغلوطة ممكن تسافر فيتنام وتشوف المطار بس يا صديق..راح يرجعوك من غير تردد!! لو إكتشفت غلطة بالفيزا لا تبعث إيميلات..مش راح يردوا. لازم تقدم طلب وتدفع الرسوم من جديد..والله يعوض عليك يا محترم. تنساش تطبع الفيزا على ورقة وتكون بجيبك لحتى تسلمها لموظف الجوازات. وأخيراً مفضل إنك تكون حاجز تذكرة خروج خلال مدة سريان التأشيرة. لإنهم أحياناً بيسألوا عنها وقت الدخول. العملة النقدية والتعامل فيها عملة فيتنام هي "دونغ". حالياً قيمة الدولار تساوي ما يقارب ال ٢٥ ألف دونغ. يعني لو حامل بإيدك ١٠٠ دولار راح تصبح مليونير يا باشا...مبروك! التعامل بالعملة النقدية هو الأساس هنا. أغلب الأماكن بتحترم بطاقة الإئتمان برضه، لكن أحياناً بتحصل مفاجآت هنا ولا هنا. خلي معك دائماً "كاش" و دائماً إسأل قبل الدفع لو فيه نسبة مُضافة: في كثير مطاعم أو فنادق بتحسب ٣ بالمائة نسبة على المبلغ حين دفع الفاتورة ببطاقة الإئتمان..زي ما حكينا: دائماً إسال..وخلي معك كاش!! سحب النقود، أو الفلوس، أو المال....أو المصاري (إختار إللي أنت عايزه يللا) سهل جداً. أجهزة الصراف الآلي للبنوك المختلفة موجودة في كل زاوية وبتقبل السحب بواسطة بطاقة الإئتمان (فيزا هي الأفضل)..مع العلم إن في نسبة بتتراوح ما بين ٣٠ و٦٠ ألف دونج على السحبة الواحدة. وكل صراف بيسمح بسحب مبلغ معين..خليني أدلعك وأعطيك قائمة بأسماء البنوك وأقصى مبلغ وبرضه الرسوم إللي بتاخذها على السحبة الواحدة: المبلغ المتاح الرسوم البنك ٣ مليون دونج ٢٢ الف دونج Agribank ٢ مليون دونج ٥٥ الف دونج Vitienbank ٣  مليون دونج ٣ بالمائة BIDV ٣ مليون دونج ٥٠ الف دونج Vietcom Bank ٣  مليون دونج مجاناً حسب الدولة ACB Bank ٣ مليون دونج ٦٦ الف دونج Techombank ١٠ مليون دونج ١،٥ بالمائة Sacombank ٥ مليون دونج مجانا VP Bank تأكد إن البنك إللي أعطاك البطاقة في بلدك ما بيأخد عمولة هو الثاني على سحب الفلوس في الخارج.."ما هو مش راح يبقى موت وخراب ديار". لا تنسى إن المعلومات هذه ممكن تتغير من حين لآخر، زي ما قيمة المبالغ ونسب الرسوم ممكن تختلف. الأسعار فيتنام هي من أرخص الدول إللي ممكن تدخلها. هذا ما بينفى إن في مطاعم وفنادق ومحلات من كل الأنواع..من الرخيص جداً للغالي جداً..جداً..الله يبعدنا عنها طبعاً، لكن بشكل عام أي خدمة إن كانت وسيلة نقل أو فندق أو معلم سياحي أو مطعم راح تكون أرخص عليك من أغلب الدول في منطقة جنوب شرق آسيا. شوية أمثلة على السريع: ساندويتش فيتنامي بقر أو دجاج: ١ إلى ٢ دولار سيارة أجرة لمسافة ١٠ كلم: ٥ دولار قهوة: ١ إلى ٢ دولار هوتيل ٥ نجوم: ٤٠ إلى ١٠٠ دولار للزوج لليلة (شامل فطور) تذكرة طائرة داخل الدولة: ٣٠ إلى ٥٠ دولار إيجار شقة ساحلية: ٢٠ إلى ١٠٠ دولار لليلة هذه الأسعار هي المتوسط..يعني في أقل وفي أكثر.. الوصول والمواصلات المطارات الدولية في فيتنام رغم كبر الدولة، إلا أنها مش كثيرة. أشهر المطارات إللي بتستقبل رحلات من دول ثانية هي مطار سايغون، مطار هانوي ومطار دا نانغ. بما إن خط الرحلة صار معروف، إذن مفهوم إن المفروض النزول في مطار سايغون والرجوع من مطار هانوي..أو العكس. ما بين المدينتين موجود خط الرحلة إللي راح نتكلم عنه (خليك صبور يآخي).. بقي معنا نفهم أفضل وسيلة للحركة ما بين المدن. الحقيقة هذه معضلة لسه أنا ما لقيتلها الجواب الشافي: خلال هذه الرحلة راح تستعمل أغلب وسائل النقل إللي البشرية إخترعتها..ياااه حتى المنطاد؟..لأ وتقاطعنيش مره ثانية.. القصد إن الطيران مش راح يوصلك لكل النقاط والقطار والسيارة شرحه. خلينا نستعرض وسائل النقل المتاحة في فيتنام: ١. الطائرات المطارات الدولية هي موجودة في سايغون، هانوي، دا نانغ و نها ترانغ. أسعار التذاكر للطيران الداخلي معقولة جداً وبتتراوح عملياً ما بين ٣٠ و٥٠ دولار للتذكرة الواحدة. ٢. القطار أي واحد دخل اليابان من قبل أكيد وقف فاغراً فاه من الدهشة أمام قطارات الشينكانزن وإللي بتقطع مسافة ٥٠٠ كلم في أقل من ساعتين بسرعة بتوصل ٢٧٠ كلم في الساعة!! معلش أطلب منك تقعد قبل ما تقرأ الكلام إللي جاي؛ لأنني خايف عليك من الصدمة: مسافة ١٧٠٠ كلم راح يقطعها القطار بين أكبر مدن فيتنام سايغون وهانوي خلال ٣٠ إلى ٤٠ ساعه في سرعة بتوصل إلى ٦٠ كلم في الساعة!!..ما فيش مقارنة أساساً. ما بين سايغون وهانوي موجودة ٦ قطارات يومياً بتتحرك من هنا لهناك ومن هناك لهنا. وفي طريقها بتمر على المدن الساحلية دا نانغ ونها ترانغ. القطارات ومحطات القطار قديمة وبطيئه.. صعب ألخص لك في المكان هذا كل المعلومات اللازمة من أجل الحجز والسفر في هذه القطارات، وعن درجة الأمان والراحة والنظافة والخدمات..قريباً راح أضيف مقال خاص بيتكلم عن هذا الموضوع مع شرح كل التفاصيل اللازمة. رأيي الشخصي مش راح يفيدك كثير للأسف لانه ففتي ففتي: يعني أنا شايف الإيجابيات والسلبيات متساوية.. ٣. السيارة: بحكم المصايب إللي شفتها داخل فيتنام وحركة السير اللي فيها "كله داخل في كله"..بحكيلك وبصوت محمد هنيدي: "بلاااااااااش".. وبالذات لأن سيارات الأجرة الكثيرة وتسعيرتها أرخص من كيلو البطاطا. ٤. سيارات الأجرة: الشركات كثيرة والأسعار رخيصة. لكن كل واحد منا لا بد جرب وجع الراس إللي إسمه سواقين تاكسي (مش كلهم طبعاً)..في دول جنوب شرق آسيا موجودة للأسف نسبة مش بسيطة من وجع الراس المزمن اللي بيجي الواحد بسب سواقين التاكسي: تلاعب في ال "تاكسيميتر"، فصال في السعر حتى جفاف الفم، أسلوب سواقة بمبدأ "كله رايح، وكلنا راح نموت"..وهلم جرا.. هنا بيجينا أعظم إختراع في تاريخ البشرية بعد صحن الحمص بالصنوبر: تطبيق "جراب".. هذا التطبيق هو التطبيق المشابه ل "أوبر"، وإللي إحتل المكانة الأولى في أغلب دول جنوب شرق آسيا. كووول إللي الواحد بيحتاجه هو التحميل والتسجيل والتفعيل (أصبحت مغني راب..). من أي مكان أنت موجود فيه، بإستطاعتك طلب سيارة أجرة لتوصلك للمكان إللي عايزه. الأسعار هنا بالفعل أرخص من سيارات الأجرة. مش راح أحكيلك عن نظام الدفع والأمان الموجود في هذا التطبيق وإللي ممكن تعتبره من الأفضل في العالم! معلومات أكثر عن تطبيق غراب موجودة هنا ٥. الدراجات النارية: مش إلنا!.. تجربتي الوحيدة كانت في شمال فيتنام لما إستأجرت دراجة نارية ليوم واحد. التجربة كانت ظريفة ومرت بسلام بستر من الله. بعد هيك شفت حوادث ياما في أغلب المدن إللي دخلتها. الدراجات النارية هنا هي وسيلة النقل رقم واحد في فيتنام وشوارع المدن الكبيرة مليانة فيها نهاراً وليلاً. المشكلة إن حركة السير المزدحمة ويمكن قلة الرقابة جعلت التقيد بقوانين السير مش موجود..بلااااااااااش..أرجوك! خط الرحلة إللي بيدخل فيتنام لأول مرة برأيي إن لازم يدخل مناطق معينة..هذا اللي أغلبية السواح بتعمله، وإللي العبد لله برضه عمله! لإختصار المصاريف الزائدة والتعب والوقت ووجع الراس والندم: دخول الدولة يكون عن طريق سايغون والمغادرة من هانوي (والعكس).. برأيي أفضل برنامج لرحلة فيتنام راح يكون لمدة أسبوعين على الأقل، وبالترتيب التالي: سايغون: ٣ ليالي من سايغون إلى نها ترانغ: القطار أو الطائرة نها ترانغ: ليلتين من نها ترانغ إلى دانانغ: القطار أو الطائرة دا نانغ: ٤ ليالي من دا نانغ إلي هوي آن: الباص أو سيارة أجرة هوي آن: ليلتين من هوي آن رجوعاً إلى دا نانغ ثم الطيران أو القطار إلى هانوي هانوي: ليلتين من هانوي إلي نين بين: الباص نين بين: ليلتين من نين بين رجوعاً إلى هانوي طبعاً لو الوقت متأخر موجودة مناطق أخرى ممكن إضافتها أهمها: هالونغ باي، هوي، دا لات، سا با، فان نيا. شو أعمل في فيتنام (أهم المعالم) في سايغون: متحف الحرب، مبنى الوحدة، بين تين ماركت (binh tien market) ، مبنى البلدية، مبنى الاوبرا، تشاينا تاون، كنيسة نوتردام، مبنى البريد، مبنى الحكومة، كافي أبارتمنت، بيتيكسو فاينانشل تاور، معبد تيان هاو (thien hau)..وغيرها كثير لسة. نها ترانغ: إستجمام على الشاطيء، أو أحد المنتجعات السياحية على إمتداد الساحل، غير هيك ما بظن إن نها ترانغ فيها أكثر تقدمه..للأمانة. دا نانغ: تلال با نا، الجسر الذهبي، جسر التنين، ليدي بوذا، ماربل ماونتين، مانكي ماونتين، شاطيء دا نانغ. هوي آن: مدينتي المفضلة في فيتنام والمغناطيس السياحي الخالص..الكل بيحبها. الجزء التاريخي هو قطعة من التاريخ، وشوارعه بكل تفاصيلها الصغيرة هي المعلم السياحي الرئيسي فيها، بجانب وقوعها على الشاطيء.. مقال كامل عن هذه البقعة الرائعة.. من هنا نين بين (ninh binh) من أجمل الغرائب الطبيعية إللي ممكن تشوفها في فيتنام موجودة في و حوْل نين بين، إللي بتبعد عن العاصمة قرابة الساعتين سفر. شوية قرى مرمية بين أدغال وأحراش كثيفة وجبال كلسية عمودية ضخمة بتتلوى ما بينها أنهار ثعبانية. برضة عن نين بين راح أخصص مقال كامل قريباً إن شاء الله. هانوي العاصمة، وراح تكون محطتنا الأخيرة. هانوي هي أقل بلد دخلت قلبي..ما قدرت أستمتع فيها. لكن بحكم إنها مدينة كبيرة ومترامية الأطراف وطبعاً العاصمة، إذن لا بد من دخولها. أهم معالمها: منطقة وسط البلد التجارية والتاريخية، بحيرة كييم (hoan kiem) بالمعابد الموجودة فيها وحواليها والجسر الخشبي الأحمر. مبنى هو شي مين ماوزوليوم ومتحف هو شي مين. واحدة من أكثر المناطق المحبوبة عند السواح هو خط القطار الممتد داخل المناطق العشوائية بالمحلات المحيطة بالسكة الحديدية, مبنى الآوبرا. قريباً مقال كامل عن هانوي. وأخيراً نصيحة عن تجربة: جرب الأكل الفيتنامي وبالذات لأنه صحي جداً.. أمثلة: فا (pha)، بان مي (banh mi)، كوكونات كافيه، سولت كافيه، فيتناميز بانكيك، سبرينغ رولز، فيش سوب.

إستخدام تطبيق غراب (Grab) إللي راح ينقذ جيبتك في جنوب شرق اسيا مقدمة مبسطة التحميل والتفعيل طلب خدمة توصيل التكلفة الأمان مقدمة مبسطة أنا عارف إن أنت عارف تطبيق "أوبر" المشهور وإللي كان، أول ما خرج للنور، عاصفة في خدمات المواصلات..كان إلها مشجعينها وأعداءها (سواقين التاكسي زي ما أنت عارف). في دول جنوب شرق آسيا وأهمها تايلاند، كمبوديا وفيتنام موجود تطبيق مشابه فاق شهرة أوبر هنا..تطبيق "غراب" (Grab). إبن عم الأوبر اللزم لو حابب، إحتل المركز الأول في أغلب مجال خدمات التوصيل (سواءاً بشر أو أكل). التطبيق هذا بيتيح لك طلب سيارة أجرة بالسائق تبعها على الهاتف الخليوي. شوف.. خبرتي الشخصية وبرضه أكيد أنت مريت بهذه القصص: سواقين التاكسي!!..ااااااااه..جزء منهم (مش كلهم طبعاً) بيحاولوا يستغلوا الركاب، الشيء إللي بيكون مرهق للأعصاب لأبعد الحدود..فما بالك لو كنت مسافر في دولة، ما بتحكي لغة وأطباع شعبها، ولا بتعرف شوارعها وأزقاتها..أنا نفسي حاسس بوجع الراس وأنا بكتب هذه الكلمات يآخي.. هنا جاء إختراع الاوبر (صوت تصفيق بالخلفية)، وفي حالة آسيا "غراب" الغالي، حبيب الأجانب.. التحميل والتفعيل بالإمكان تحميل هذا التطبيق على جهاز "أبل" أو "أندرويد" بدون مشاكل. من أجل التفعيل لازم تسجيل البيانات الشخصية بجانب عنوان البريد الإلكتروني ورقم الموبايل وصورة سلفي والواحد فاشخ فمه.. طبعاً لا بد من إختيار خيارات الدفع: كاش أو بطاقة إئتمان أو "باي بال" (Paypal)..أو إللي كثير بينصحوا فيه "اي ووليت" (E Wallet) الخاصة بالتطبيق، وإللي بتتيح للواحد إستخدمها كوسيلة للدفع في بعض المطاعم والمتاجر في بعض دول آسيا. طلب خدمة توصيل تطبيق غراب بيستخدم جوجل مابس بكل معلوماتة المخزنة من فنادق ومطاعم ومحلات ومنتزهات وشوارع وأزقة..الخ الخ. لهذا الشئ مش شرط كتابة العنوان المُراد وصوله كاملاً بالزبط..كل ما عليك هو إدخال إسم المطعم أو الفندق إللي حابب توصل له مثلاً، التطبيق بيتكفل بالباقي. الخطوة التالية هي إختيار نقطة الإنطلاق: أنا طبعاً راح أفترض إنك راح تعمل المفروض تعمله , وتكون فعّلت خاصية "جي بي إس" في تلفونك..التطبيق راح يتعرّف هيك على موقعك المباشر، وراح يختاره كإمكانية أولى للمكان إللي سيارة الأجرة راح تاخذك منه. وطالما لم يتم تحديد وقت السفرية التطبيق راح يعتبر إن السفرية لازم تتم بأقرب وقت ممكن. هنا راح تطلع أمام عيونك قائمة بأنواع السيارات المتاحة: دراجة نارية، سيارة ٥ ركاب، سيارة ٧ ركاب وغيره. وكل وسيلة نقل إلها سعرها المكتوب في القائمة أمام عيونك. إختار وسيلة النقل الملائمة، وإضغط على بوكينغ من أجل التأكيد على الرغبة بإستخدام هذه الخدمة..التطبيق راح يبحث عن السيارة الملائمة بسائقها..إنتظر ثواني أو دقائق، وبعد إيجاد السائق، إللي بدوره أبدى إستعداده لتنفيذ هذ السفرية، راح تشوف على الشاشة صورة وإسم السائق، وبرضه لون السيارة ونوعها ورقمها. وراح تشوف حركتها في الخارطة وهي ماشية بإتجاهك في بث حي ومباشر (هذه الخدمة على فكرة لسة مش متطورة يعني البث المباشر مش مباشر لهذه الدرجة..). خلال هذه المرحلة بالإمكان التواصل مع السائق عن طريق التطبيق سواءاً في مكالمة صوتية أو رسالة نصّية. برضة المبلغ إللي راح ينسحب من فلوسك بيتم سحبه وقت الركوب في السيارة أو خلال الوصول. التكلفة التحميل والتسجيل والتفعيل مجاني. أسعار إستخدام هذا التطبيق في دول مثل فيتنام وتايلاند رخيصة جداً. مسافة ٢ أو ٣ كلم في أي مدينة في فيتنام يا دوب يكلف دولار واحد مثلاً. للأمانة، أغلب السيارات إللي واجهتني خلال إستعمال هذا التطبيق نظيفة ونسبياً عصرية (بس ما بتتوقع مارسيدس مايباخ) الأمان درجة الأمان في هذا التطبيق عالية جداً..هذه أهم النقاط إللي بتأكد على هذه الجملة: المبلغ بيتم تحديده مسبقاً في التطبيق قبل البحث عن سائق. السائق إللي راح يوصل الزبون، هو وافق ضمناً على المبلغ . يعني ما فيش جدال ولا مشاكل، ولا سم بدن، ولا شد شعر، ولا تفعيص عيون. بل عادة ما بيكون حتى في كلام كثير ما بين الزبون والسائق أساساً خلال الرحلة..كله عارف إللي له وإللي عليه. سواقين التطبيق هذا أغلبهم حريص جداً على تقديم خدمة مثالية، يعني لا سرعة زائدة ولا قيادة متهورة ولا كلام زيادة ولا وجع راس. مش لان أخلاقهم رفيعة كلهم..لا لا..بل علشان تعطيهم تقييم خمس نجوم، وممكن إكرامية لو حابب..والأهم خوفاً من إن الزبون يتقدم بشكوى للقائمين على التطبيق ويكون سبب بقطع الرزق (لا تنسى: قطع الأعناق ولا قطع الأرزاق على قولة النمس في باب الحارة!) أيوه، ممكن في أي مرحلة إن الزبائن تتقدم بشكوى للقائمين..وكل بيانات السائق موجودة مع الزبون..حماية الزبائن هنا أولوية أولى. التطبيق بيتيح لأي راكب إن يقوم بمشاركة السفرية أونلاين، مع صديق مثلاً..يعني لو الواحد إنخطف ولا حاجة.. التطبيق بيتيح إن الزبون يقوم بتسجيل صوتي طوال فترة السفرية. كل هذا ما كفاهم..بل قرروا إنهم يضيفوا "إميرجينسي باتن (Emergency Button) داخل التطبيق..في حالات الطوارىء بيتم التواصل مع الشرطة بسهولة.. وأخيراً أنا عارف إن المقال هذا باين وكأن مدفوع لي فلوس وإلي مصلحة أعمل دعاية بس هو مش هيك أبداً.. كل ما بالأمر إن أنا شخصياً إستعملت هذا التطبيق كثير، في توصيلي أو توصيل الأكل لعندي، وشفت إن هذا التطبيق مفيد رحمةً بالجيب والصحة والوقت.

نيويورك ، ام المدن مقدمة مبسطة الموسم السياحي المدة العملة النقدية والأسعار المبيت الوصول والمواصلات شو أعمل في مانهاتن شو أعمل في بروكلين مقدمة مبسطة المقال هذا راح يكون فيه كثير من عدم - الحيادية.. بتأمل تعذروني..لكن نيويورك كانت وما زالت قريبة جداً مني شخصياً؛ من جيل المراهقة ومن أول ما عيوني تفتحت على العالم الكبير (بسبب الصندوق الصغير إللي في صالة بيتنا وإللي إسمه تلفزيون)، كانت تفتحت على الصورة المشهورة لل "سكايلاين" تبع نيويورك مع بروكلين بريدج (Brooklyn Bridge) وأضواء الشبابيك في ناطحات السحاب.. جزء مهول من الأفلام والمسلسلات إللي تابعناها تصورت في نيويورك، وكل شيء شفناه في هذه الأفلام أصبح إنعكاس لعالم الأضواء الكبير والبعيد عن المنال؛ ناطحات السحاب العملاقة، محطات المترو، التاكسي الأصفر، لافتات مسارح برودواي (Broodway)، مقاعد ومصابيح سنترال بارك (Central Park)، تمثال الحرية، لافتة وول ستريت (Wall Street), تايمز سكواير (Times Square)، إمباير ستايت بيلدينغ (Empire State Building) وكرايزلر بيلدينغ (Crysler Building). والأمريكان على فكرة شاطرين جداً بصنع البروباغندا..لدرجة إنهم جعلوا من أماكن مثل لوس آنجلس، ولاس فيغاس وميامي مدن مشهورة وعالمية بتجذب ملايين السواح سنوياً..وإللي هي في الحقيقة وعلى أرض الواقع ممكن تكون غير هيك...رأيي الشخصي. لكن شو بدك بالطويلة، راح أحكي عن هذه المدن في صفحات أخرى مستقبلاً بإذن الله. بالنسبة لنيويورك الوضع بيختلف، الأفلام والمسلسلات وإن بالغت، إلا إن المدينة بالفعل بتستحق الكلام الكثير والوصف الأكثر والمبالغة إن شئت. في حالة نيويورك، مش بس المعالم الضخمة والمشهورة - وما أكثرها في نيويورك - هي إللي جعلت هذه المدينة حلم للكثيرين، إنما تفاصيل صغيرة جذابة في هذه المدينة؛ مثل عربات الأكل في الشوارع، أو منظر الشوارع في الشتاء، المقاهي والمطاعم إياها، بكراسيها الجلدية الطويلة وشبابيكها الزجاجية وأرضيتها المشابهة لرقعة الشطرنج، منظر الخيول في سنترال بارك وحوله..وكثير تفاصيل ثانية جعلتنا نتشوق نشوفها على الحقيقة. البروباغاندا برأيي ما بالغت بتاتاً..نيويورك فعلاً جذابة لأبعد الحدود. فيها حارات فقيرة؟ أيوة..فيها شوارع قذرة؟ طبعاً..فيها سلبيات أخرى؟ أكيد..لكن هذه المدينة العملاقة لو الواحد زارها مرة ومرتين وثلاثة، راح يقدر يستمتع فيها لأقصى الحدود. هذه المدينة المليونية العملاقة تقسم ل خمس أجزاء..خلينا نستعرض أهم مميزاتها على السريع: مانهاتن (Manhattan) هذه الجزيرة هي الجزء الرئيسي والمركزي في نيويورك، وبرضه سياحياً مانهاتن هو الجزء الأهم للجميع: أغلب الصور إللي بنشوفها في الإنترنت، أغلب ناطحات السحاب وأشهرها، وبرضه أغلب المعالم موجودة في مانهاتن. لهذا الشيء هذا الجزء هو الأهم في نيويورك من كوووول النواحي. بروكلين (Brooklyn) واقعة في جنوب شرق نيويورك، وبيفصلها عن مانهاتن ال "إيست ريفر" (East River) . وإللي من فوقه بتمر ٣ جسور بتربط بروكلين ومانهاتان ببعض، أشهرها هو جسر "بروكلين بريدج" الأيقوني. كوينز (Queens) الجزء الأكبر مساحةً في نيويورك. فيه شوية معالم للي وقته وفلوسه بيسمحوا. برونكس (Bronx) واقع في شمال المدينة، ومشهور بإن أغلب ساكنيه من أصول لاتينية، أو أفريقية. أهميته السياحية ضئيلة, لشعوبنا تحديداً. ستاتن آيلاند الجزء المتبقي..أهميته السياحية ضئيلة. الموسم السياحي نيويورك هي المدينة الوحيدة إللي ممكن نقول إن ممكن زيارتها في كووول أوقات السنة. كشخص بيعشق "الشحاطة ماركة أبو أصبع" وبالتالي فصل الصيف، فخليني أحكيلك إن شهر ٦ و٧ و٨ هم الشهور المفضلة عندي في نيويورك..هذا تفضيلي الشخصي..معلش! لكن إللي أغلب الصفحات بتنصح فيه هي الفترات ما بين شهر ٤ إلى شهر ٦، وشهر ٩ إلى شهر ١٠. هنا الطقس بيكون أبرد شوية ومريح أكثر للتجوال. الأمطار في نيويورك بتهطل أغلب شهور السنة بمعدل متشابه تقريباً. في شوية بينصحوا بالسفر في فترة الكريسماس ورأس السنة. المدينة هنا بتتزين بأجمل الزينة بهذه الفترة، وأحيانا بتنزل الثلوج فيها لتعطي أجواء رومانسية, وأفلام الكريسماس بتشهد على هذه الأجواء. بصفتي ما بحب الشتاء، صعب أحكيلك إن الواحد راح "يتشرّب" نيويورك صح في الشتاء؛ الرحلة هنا راح تكون أغلبها صرمحة ما بين المحلات والمتاحف والكافيهات، إللي هو طبعاً شئ جميل. لكن بيضل الإستمتاع خلال التمشي في شوارع وحارات ومنتزهات هذه المدينة ما له حدود. لهذا الشىء زي ما حكيتلك..شهر ٦ إلى شهر ٨ هي الفترة الأفضل برأيي ..شوف نظامك، وإختار أنت بقى! المدة بعد أسبوعين داخل نيويورك مشيت فيها ل حفيت رجلي، إكتشفت إن لسّه فيه معالم وشوارع وفعاليات ما رحتها ولا عملتها للأسف. نيويورك كبيرة..كبييييييره..وفيها الكثير ينشاف وينعمل يا زميل. حتى لو كان وقتك ما بيسمح، حاول تعطي هذه المدينة حقها، وحاول أنك ما تظلم نفسك وتتعبها بالمشاوير إلى أماكن ومدن كثيرة في فترة قليلة. العملة النقدية والأسعار أبو العملات وشيخ العالم إللي الكل بيرجعله وبيحترمه: الدولار..غني عن التعريف طبعاً. بطاقات الإئتمان بيحترموها هنا بأغلب الأماكن على إختلافها. نيويورك يا صديقي غالية جداً..ورخيصة جداً..كيف يعني؟ يعني غالية للي ما بياخذ باله وما بيفتح عينه، لكن..نيويورك ممكن زيارتها بتكلفة أقل بمراحل من إللي بأذهاننا. قريبا راح أزبّط مقال كامل عن "نيويورك للجيب الصغير"..إن شاء الله. لكن خليني أعطيك "تصبيرة" على السريع: بالنسبة لأي شيء بيخص الفنادق والمطاعم، مانهاتن أغلى بمراحل من أقسام نيويورك الأخرى مثل بروكلين وستاتن آيلاند وبرونكس مثلاً...فاااا..إختار السكن في جزء آخر قريب...الجملة هذه بتوصلنا للنقطة التالية... المبيت هنا مربط الفرس إللي راح يرسم معالم رحلتك في نيويورك ويخليك تطلع باليوتيوب ولا الفيسبوك وتحكي شغلة من إثنين..يا إما: "نيويورك رائعة ومتطورة وحلوة..راح أنتقل لها قريباً"..أو: " يلعن أبو ال... \\$٪&& على اليوم إللي ^#٪&&.." أيوه..المكان إللي أنت راح تسكن فيه خلال رحلتك راح يحدد نظرتك للمدينة ويكوّن رأيك عنها ويخليك تنبسط برحلتك، أو تلعن اليوم إللي جيت فيه هنا! أفضل شيء - لو الجيب بيسمح - هو طبعاً السكن في جزيرة مانهاتن الغالية كثير. منطقة نوليتا، وليتل إيتالي وتشاينا تاون ممكن تكون أرخص من غيرها، لكنها بتضل غالية نسبياً. عن خبرة ناس ثانية؛ مفضل إتخاذ سكن في جيرزي سيتي (لا تعد جزء من نيويورك برغم قربها) أو في كوينز، أو الحل الأفضل على الإطلاق هو السكن في بروكلين، بشرط يكون قريب من المترو أو القطار. من بروكلين مثلاً إلى مانهاتن ممكن السفر في القطار بتكلفة ٣ دولار ومدة ٣٠ إلى ٤٥ دقيقة إلى مانهاتن..معقول والله..ليه لأ. الوصول والمواصلات الوصول إلى نيويورك نيويورك فيها ٣ مطارات، مطار جون ف كينيدي الدولي (JFK)، مطار نيو آرك الدولي (Newark Airport)، ومطار لا جارديا (LaGuardia) ال إيييه..مش..دولي!. المواصلات من مطار جون ف كينيدي (JFK) إلى المدينة القطار: من مطار جون ف كينيدي ممكن إتخاذ "إير تراين" (Air Train) وبالتحديد الخط الأخضر والأحمر إللي بيوصلوا إلى محطة القطار. - الخط الأحمر (Jamaika) بيوصل لخطوط القطار E, Z أو J إللي بيوصلوا لمانهاتن (أبتاون، ميدتاون أو لوار إيست سايد)، سعر التذكرة ١٢ دولار. - الخط الأخضر (Howard beach) بيوصل ل خط القطار A, وإللي بدوره بينقل الركاب إلى مانهاتن. سعر التذكرة ١٢ دولار. شبكة القطار أو المترو داخل مانهاتن كبيرة ومتشابكة. وقت الوصول إلى مانهاتن ممكن ركوب خط آخر لأجل الوصول إلى الفندق..أمر بيبان معقد، لكنه سهل ورخييص جداً، مقارنة بسيارات الأجرة. ما عليك إلا إنك تكتب العنوان إللي حابب توصل له في محركات البحث وتستعمل جوجل مابس (Maps) وراح تبين معك القطارات الممكنة لتوصل العنوان..الأمر بسيط يآخي.. سيارات الأجرة: وتكلفتها ما يقارب ال ١٠٠ دولار من المطار إلى وسط مانهاتن!..طبعاً لو كنتوا مجموعة قوموا بتقسيم المبلغ على بعض وخلص. خذ بالك من إنك تركب سيارة أجرة صفراء من المكان المخصص لسيارات الأجرة. زي في أي مطار في العالم، برضه هنا موجودة كمية كبيرة من المحتالين إللي بيستغلوا السواح. أرجوك..إسأل قبل الركوب عن السعر، وأكد على السائق إنك مش راح تدفع أكثر، وطالب بتشغيل "التاكسيميتر"!..أنا خلصت ذمتي.. تطبيق أوبر: أنا ما جربته للأمانة (جربته قبل هيك طبعاً، لكن مش في أمريكا). طبعاً بالإمكان أخذ سيارة أوبر مع ركاب آخرين وتقاسم المبلغ إللي بيتراوح ما بين ٦٠ و٩٠ يورو. على فكرة..ثقافة ال "تيبينغ" أو الإكرامية، متبعة في أمريكا بشكل مبالغ فيه. عادي إنك تدفع إكرامية على كل خدمة بتتقدملك بقيمة ١٠ إلى ٢٠ بالمية من المبلغ..وبرضه في التاكسي أو الأوبر..خراب بيوت! الباص: مهمة مستحيلة الوصول بالباص من المطار للمدينة، لأن ما في خط مباشر للأسف (على حد علمي حتى الآن). المواصلات من مطار نيو آرك إلى المدينة القطار: برضه في مطار نيو آرك موجود "اير تراين" (Air Train) داخل المطار وإللي (بدون شراء تذكرة) بيوصل المسافرين إلى محطة قطار "نيو آرك ايربورت تراين ستيشون" (Newark Airport Train Station). وهنا المفروض شراء تذكرة لقطار إسمه  "ان جي ترانزيت" (NJ Transit) إما من الجهاز الموجود في المحطة هذه أو اونلاين. سعر التذكرة هذه ١٦ دولار وبتشمل السفرية في إللي عملتها في "اير تراين" والسفرية إللي لسة راح تعملها "ان جي ترانزيت". مهم: المحطة النهائية لهذا القطار هي المحطة المُراد الوصول إلها وإسمها "نيويورك بين ستيشين" (NY Pen Station). في الطريق إلى هناك موجودة محطة نيو آرك بين ستيشين (New Ark Pen Station) إللي موجودة في نيو جيرزي (New Jersey)..الله يرضى عليك لا تنزل فيها..راح تضيع.. من "بين ستيشين" في مانهاتن موجود برضه "السابواي" (مترو الانفاق..أو هيك شيء يعني!)..هنا موجودة خطوط قطارات عديدة في جميع الإتجاهات. بحسب شو عمك "جوجل مابس" بيخبرك راح تعرف كيف تتوجه للفندق إللي حجزت فيه. الباص: - في باصات صغيرة في مطار نيو آرك (Airpot / Airlink Shuttle) بتستنى في المطار لتجمّع الركاب المتوجهين إلى مانهاتن، وبتوصل كل راكب حتى باب الفندق. هذا الشيء هو إيجابي وسلبي في نفس الوقت، لإن بسبب هذه الخدمة، ممكن مدة السفرية تكون طويييييلة جداً. لكن.. عن تجربة شخصية: الباص هذا فعلا ً إمكانية ممتازة لو كان عندك وقت (بما إنك جاي سياحة ف أكيد يعني معك وقت)، وبالنسبة للسعر راح يكون أرخص من التاكسي (أظن السعر كان قبل جائحة الكورونا عليها اللعنة من منطقة تايمز سكواير تقريباً للمطار ما يقارب ال ٢٠ دولار..حالياً أكيد أكثر). - في باصات كبيرة من إللي بتعرفوها إسمها "ايربورت إكسبرس بوس" (Airport Express Bus) بتسافر من المطار إلى وسط مانهاتن، وبالذات إلى شارع ٤٢ وبتمر على ٣ محطات: Bryant park Grand Central Station Authority Bus Terminal سعر التذكرة ٢٢ دولار، و ممكن شراءها اونلاين. سيارات الأجرة (التاكسي): ما تسميهاش تاكسي..سميها خراب بيوت..١٠٠ دولار بالتمام والكمال..غير الإكرامية.. المواصلات داخل نيويورك نيويورك كبيرة جداً، وشوارع مانهاتن - الجزء إللي بيهمنا - ملائمة جداً للمشاة، ولمسافات طويلة برضه. لكن ما بين أبتاون، ميدتاون وداونتاون (راح أتكلم عنهم كمان شوية) لا بد من إستعمال وسائل النقل، إختصاراً للوقت ورحمة بالرجلين. في نيويورك موجودة طبعاً عدة وسائل نقل مختلفة وبتغطي تقريباً أغلب مناطقها واجزاءها..وقسم منها شغّال ٢٤ ساعة، ٧ أيام في الأسبوع: مترو الأنفاق (Subway، trains ) في نيويورك عندك يا سعيد الحظ ما يقارب ال ٥٠٠ محطة مترو، و٢٤ خط مختلف. خطوط المترو بتغطي برونكس، مانهاتن، بروكلين وكوينز. في النهار أغلب الخطوط بتسافر كل ٥ دقائق وبالليل كل ثلث ساعة. في أغلب المحطات موجودة خرائط بتبين أي خط ماشي إلى أي إتجاه، وعلى أي محطات بيمر. التذكرة وإللي إسمها مترو كارد (Metrocard) سعرها للسفرية الواحدة هو ٣،٢٥ دولار. موجودة إمكانية شراء تذكرة سارية المفعول ل ٧ أيام (7 Day unlimited Ride Metrocard)، وسعرها ٣٥ دولار. التذاكر ممكن شرائها في كل المحطات من الجهاز المخصص أو مكتب التذاكر. وبالإمكان شحن التذكرة من جديد (التذكرة العادية مش تذكرة ال ٧ أيام). سيارة الأجرة أو التاكسي أول ما تحط رجلك داخل التاكسي راح ينط في وجهك "التاكسيميتير" أو العداد، ومبلغ ٣ دولار ظاهر على شاشته، أيوه..المبلغ "اولريدي" وصل ٣ دولار قبل ما التاكسي يتحرك..بس هذا هو الدارج - للأمانة يعني - في كل مكان. اسعار سيارات الأجرة المتعارف عليها هو ٠،٧ دولار ل الميل ونصف، أو - وجهزلي حالك للطامة الكبرى - سعر ٠،٧ دولار كل ٦٠ ثانية لو في كنت في ترافيك أو زحام يعني. زيادة على هيك: في مناطق معينة داخل مانهاتن بيحسبوا كمان مبلغ مضاف (مش عارف ليه) قيمته واحد ونصف دولار فوق المبلغ، وفي مناطق أخرى ٢،٥ دولار. قررت تركب التاكسي وعندك إستعداد تدفع مبلغ وقدره؟..لا تنسى الإكرامية يا طيب.. أغلب سيارات الأجرة بتحترم بطاقات الإئتمان على فكرة. الباص أنا عن نفسي ما جربته ولااااا مرة والسبب إنه أكيد راح يكون أبطأ من المترو بسبب زحمة الشوارع في مانهاتن. لهذا الشيء بنصحك بإستعمال المترو. شو أعمل في نيويورك من وين نبدأ.. في كل أجزاء نيويورك الخمسة إللي ذكرناها (مانهاتن، بروكلين، برونكس، ستاتن آيلاند، كوينز) موجودة كمية هائلة من المباني والشوارع والمنتزهات الطبيعية والمتاحف والمعالم السياحية إللي بدها عمر كامل للواحد يشوفها. لكن أغلب وأهم هذه المعالم موجودة في مانهاتن، وجزء لا بأس فيه منها في بروكلين وجزء ضئيل في برونكس و كوينز. علشان ما نضيع كلنا في "جونجل" نيويورك المتشابك والمعقد، خلينا نمشي في أجزاء نيويورك إللي بتهمنا (وأهمها مانهاتن)، ونستعرض معالمها السياحة..وراح نركز على مانهاتن أولاً وبروكلين ثانياً..بس شو أعمل في مانهاتن ٩٠ بالمية من الأشياء المهمة سياحياً موجودة في مانهاتن، لهذا الشيء راح تاخذ نصيب الأسد في هذا المقام.. لكن قبل الدخول على المعالم والفعاليات الموجودة لازم نفهم تركيبة وتقسيمة مانهاتن..صدقني الأمر بسيط لكن أهميته كبيرة وراح تسهل الحركة، وتختصر الوقت والمصاريف بشكل ملحوظ. هواية الأمريكان تسمية كل شارعين ولا حارة بأسم لحاله..لكن الأسهل لنا هو التقسيم المتعارف عليه للمدينة: أبر مانهاتن أو أبتاون (Upper Manhattan, Uptown) الجزء الشمالي من الجزيرة. موجود فيه "ابر ايست سايد" (Upper East Side) الكبيرة والمشهورة بوجود الأغنياء والمستثمرين, مش إلنا يآخي: الفنادق والشقق هنا من الأغلى في نيويورك. وبرضه موجود "أبر ويست سايد" (Upper West Side) : المنطقة هذه بتمتاز بكثرة المناطق الخضراء والعائلات، وتعد أرخص واهدأ من مناطق أخرى. ميدتاون (Midtown) وهي المنطقة الوسطى في مانهاتن اللي فيها أكبر عدد من المعالم السياحية. داونتاون (Downtown) برغم وجود وول ستريت والبورصة ومباني أو مراكز تجارية وإقتصادية، إلا أن هذه المنطقة برضه لا تخلو من تفاصيل بتهم السواح. والآن، خلينا نستعرض أهم المعالم والفعاليات في أجزاء مانهاتن : أبر مانهاتن أو أبتاون ( Uptown): سنترال بارك (Central Park) متحف غوغنهايم ( The Guggenheim) متروبوليتان ميوزيوم اوف آرت ( Metropolitan Museum of Art) أميريكان ميوزيوم أوف ناتورال هيستوري ( American Museum of Natural History) كولومبوس سيركيل ( Columbus Circle) هودسون ريفر جرين-واي ( The Hudson River Greenway) ووتر لاين سكوير بارك ( Waterline Square) ميدتاون (Midtown): تايمز سكواير(Times Square) إمباير ستايت بيلدينغ (Empire State Building) روكيفيللر سنتر ( Rockefeller Center) جراند سنترال تيرمينال (Grand Central Terminal) كرايزلر بيلدينغ (Crysler Building) فيفث آفينيو (Fifth Avenue) برودواي (Broadway) براينت بارك (Bryant Park) فلات آيرون بيلدينغ (Flatiron Building) ميوزيوم اوف مودرن آرت ( The Museum of Modern Art) سانت باتريك كاثيدرال ( Saint Patrick's Cathedral) ماديسون سكواير غاردن (Madison Square Garden) مادام توسو (Madam Tossauds) داونتاون (Downtown): هاي لاين (the High Line) وان وورلد ترايد سنتر (One World Trade Center) جراوند زيرو (Ground Zero) ذا ٩.١١ ميموريال ميوزيوم ( the 9/11 Memorial Museum) سوهو (SoHo) ليتل ايتالي (Little Italy) تشاينا تاون (China Town) بروكفيلد بليس ( Brookfield Place) وول ستريت (Wall Street) تشارجينغ بول (Charging Bull) ووشنغتون سكواير بارك ( Washington Square) سانت باولز تشابيل ( St. Paul's Chapel) هدسون ريفر بارك ( Hudson River Park) بير ١٧ (Pier 17) باتري بارك (Battery Park) هدسون ريفر جرين واي (Hudson River Green Way) طبعاً أنا مش مجنون علشان أكتب معلومات عن كل شئ موجود في القائمة، لإنك مش راح تلاقي الوقت في زيارتك الأولى للتعرف عليهم كلهم، ولا أنا راح ألاقي الوقت أكتب عنهم أساساً، لكن بتقدر تحط ثقتك إنني راح أختار منهم أهم ١٥ معلم في مانهاتن، لازم تركز عليهم وتشوفهم بالأول : ١. سنترال بارك (Central Park) بالنسبة إلي شخصياً سنترال بارك هو أجمل منتزه طبيعي داخل مدينة مليونية في العالم كله (يعني..مقارنة بكل الأماكن إللي أنا دخلتها حتى الآن). هذا المنتزه العملاق في مانهاتن وبالتحديد في أبتاون (طبعاً أنت أصبحت خبرة بهذه المصطلحات ما شاء الله عنك) مساحته بتمتد لأكثر من ٨٠٠ هكتار! كل هذه المساحة هي عبارة عن منطقة خضراء بتضم مجموعة كبيرة من الأشجار والنباتات المختلفة، بتشقها عدة شوارع أو بالأحرى طرق للمشاة المزينة بالمقاعد الراقية والمصابيح المميزة (الطرق مزينة بالمقاعد..مش المشاة!)..وهنا وهناك لا بد من إن يواجهك نهر صغير أو بحيرة، ما بينها جسور وتماثيل مختلفة ونوافير بديعة الشكل. المنتزه تم تصميمه على شكل مستطيل ما بين ناطحات السحاب، وبيزوره سنوياً أكثر من ٢٥ مليون شخص. من أشهر البقع داخل هذا المنتزه العملاق هو "جريت لاون" ( Great Lawn)؛ مساحة مسطحة مكسوة بالعشب مطلة على خلفية رائعة من ناطحات السحاب. المكان هذا ملائم للجلوس وعمل "بيكنيك" مع مجموعة أو عائلة، ودائماً مليان وأجواءه من أروع ما يكون. في مساحة أخرى على غرار "غريت لاون" لكنها أصغر هي "شيب مادوو" ( Sheep Meadow). ١٣ جسر موجودين داخل سنترال بارك هي من أجمل جسور المشاة إللي ممكن الواحد يشوفها..شفنا جزء منها في أفلام رومانسية..ولأننا جبنا سيرة الأفلام؛ مش ممكن ننسى "بيتيسدا تيراس" (Bethesda Terrace) في قلب المنتزه..من أكثر الأماكن إللي خدمت ككواليس للأفلام..الرومانسية برضه..! غير عن هيك موجودة مجموعة بحيرات ساحرة..صعب أعدلك إياها كلها..ما بدي المقال يكبر أكثر من هيك..شو؟ بدك تعرف أكثر؟..شوف سنترال بارك عملاااااق وبيستحق تقضي فيه يوم كامل..إن شاء الله راح أتكلم عنه في مقال لوحده في المستقبل. الدخول مجاني. ٢. تايمز سكواير (Times Square) ميدان معروف على مستوى العالم كله، وبعد سنين من وجوده، أصبح في ميادين في مدن أخرى بتتسمى بإسمه، مثل هونغ كونغ مثلاً. ميدان تايمز سكواير النيويوركي موجود في تقاطع شارع برودواي الأيقوني مع شارع ٤٣. هذا المكان كله حياة وحركة وضجة ٢٤ ساعة..البشر اللي بتتمشى فيه، بتدخل محلاته، تقدر أعدادها ب ٤٠٠ ألف شخص يومياً!! هذا الميدان عمره أكثر من ١٢٠ سنة، ومر بعدة مراحل عصيبة: بالذات في الستينات والسبعينات كان تايمز سكواير هذا بؤرة للإتّجار بالمخدرات، والدعارة والإحتيال والنصب. أيامها كانت أغلب الناس بتتجنبه، بعكس أيامنا هذه، وإللي فيها أصبح تايمز سكواير القلب النابض داخل نيويورك وبيضم محلات وماركات من كل الأنواع. وعلى جدران ناطحات السحاب هنا موجودة لوحات إلكترونية عملاقة بتعرض إعلانات وأخبار مهمة. شو نعمل في تايمز سكواير..تمشى زي كل هالبشر المبهورة ب كم المؤثرات الصوتية والبصرية والحسية المتجمعة هنا...وخذ وقتك.. الدخول مجاني. ٣. روكيفيللر سنتر (Rockefeller Center) هو سنتر واحد أيوه, لكنه بيضم أكثر من ١٩ مبنى تابعين ليه. من أشهر مبانيه هي "توب أوف ذا روك" (Top of The Rock) ومبنى "إن بي سي ستوديوز" (NBC Studios) و "روكفيلير بلازا" (Rockefeller Plaza). ليه إخترت لك روكفيلر سنتر؟ لأنه موجود فيه "توب اوف ذا روك"، واللي منه موجودة إطلالة على نيويورك من الطابق ٧٠ من الأجمل في المدينة. شراء التذكرة مفضل طبعاً أونلاين من الصفحة الخاصة بالسنتر..الأسعار بتتراوح على حسب نوع التذكرة ما بين ٤٠ و١٩٠ دولار (الرقم المزعج هذا لل VIP). طبعاً في عدة أنواع تذاكر ولو دفعت شوية أكثر (٩٥ إلى ١٠٥ دولار) ممكن الدخول من غير التقيد بوقت محدد. من هنا راح تشوف إمباير ستيت بيلدينغ أمامك وجزء من سنترال بارك. ٤. إمباير ستايت بيلدينغ (Empire State Building) شوف..نيويورك فيها كمية ناطحات سحاب بتجيب للواحد تساقط شعر مزمن. ولو سألت أي نيويوركي عن أهم ناطحة سحاب ممكن نعتبرها أيقونة نيويورك، راح يجاوبك: إمباير ستايت بيلدينغ. تم تشييده سنة ١٩٣١، وكان أعلى مبنى في العالم حتى سنة ١٩٧٢. ليومنا هذا وإنت ماشي في شوارع نيويورك إرفع عيونك لفوق لتشوف قمته المميزة الفخمة، إللي من يوم ليوم إلها لون بشكل مختلف. في هذا المبنى موجودة إمكانية الصعود حتى الطابق رقم ٨٦ و ١٠٢. ومن هنا راح تواجه الواحد إطلالة من فوق سقوف المباني ولا أروع. سعر التذكرة للطابق رقم ٨٦ بتبدأ من ٤٤ دولار، والتذكرة لدخول الطابقين بتبدأ من ٧٩ دولار (التذاكر ممكن شرائها أونلاين على الصفحة الخاصة بالمبنى وهنا لازم إختيار وقت محدد للدخول، وطبعاً بحسب الوقت السعر ممكن يكون أعلى شوية). ٥. براينت بارك (Bryant Park) فيو نيويورك موجودة منتزهات بديعة متوزعة في المدينة ما بين ناطحات السحاب، بمثابة "واحات في الصحراء". واحد من أجمل هذه الواحات الخضراء داخل نيويورك يمكن والعالم كله هو "براينت بارك"، الموجود في قلب مانهاتن (ميدتاون). براينت بارك موجود ما بين فيفث وسيكسث أفينيو، الشوارع المهمة جداً في مانهاتن. وبرغم صغر مساحتة النسبية، إلا أنه من أكثر المنتزهات المحبوبة في نيويورك بسبب موقعه ومنظره المميز..بل بالعكس، يمكن صغره هو سبب الرونق الخاص فيه. الخضرة الكثيرة والأشجار العالية، المقاعد المتناثرة هنا وهناك، وفي الخلفية ناطحات السحاب المحيطة فيه هذا المنتزه بتعطيه - بالذات في المساء - سحر خاص فيه. أنا عن نفسي كنت خلال الأيام إللي قضيتها في نيويورك أختم يومي تقريباَ يومياً في براينت بارك. هنا دائماً موجودة كثير فعاليات، مثل اليوغا، أو التايشي، أو حفلات موسيقية أو راقصة، وغيره كثير. وفي الشتاء بيتحول براينت بارك لمكان مخصص للتزلج على الجليد، مفتوح للعامة. الدخول مجاني، زي أغلب منتزهات نيويورك. ٦. أميريكان ميوزيوم أوف ناتورال هيستوري (A merican Museum of Natural History) واحد من أشهر وأكبر المتاحف التاريخية في العالم. رغم إنني مش من عشاق المتاحف ولا من هواة هز الرأس أمام لوحات أو تماثيل مش فاهم المرسوم فيها، إلا إنني قررت أدخل هذا المتحف، لأن أغلب صفحات الإنترنت بتنصح بدخوله. على إمتداد أربع طوابق بيتناول هذا المتحف كل شيء (تقريباً) ببدايات الحضارة الإنسانية من زمااان. أكثر من ٣٠ مليون "قطعة" (مش عارف شو أسميها غير هيك..آسف) معروضة في داخل هذا المتحف. أشهر إللي بيطلعلنا منها في الإنترنت هي هياكل ديناصورات حقيقية! أسعار التذاكر بتتراوح ما بين ٢٥ و٣٥ دولار. على فكرة..المتحف هذا شهد إزدياد ملحوظ للزوار بعد عرض فيلم "نايت أت ذا ميوزيوم" (Night at the Museum) للمثل بين ستيلر، وإللي كان له بعد هيك كمان جزئين. ٧. برودواي (Broadway) برودواي هو واحد من أهم الشوارع التاريخية في نيويورك وبالتحديد في مانهاتن وبرونكس وطوله بيمتد من الشمال للجنوب لأكثر من ٥٣ كلم. من قبل وجود الاوروبيين هنا، كانت قبائل الهنود الحمر بتستخدم هنا شبه طريق ما بين الغابات والمستنقعات. لما الهولنديين وصلوا هنا قاموا بتوسيع الطريق وتحسينه، ومن هنا جاء الإسم الهولندي "بريدي فيغ" (breede weg) ومعناه " الطريق العريض" وبعدها تم "أنجلزة الإسم" إلى برودواي. أيوه..ويعني شو أهمية ال برودواي هذا..يا نهار أسود!..برودواي هذا بيمر في كل أجزاء مانهاتن وبيلامس كمية مباني ومنتزهات طبيعية من الأجمل والأشهر في نيويورك. في أبرتاون مثلاً بيدخل في كولومبوس سيركل (Columbus Circle) بجانب سنترال بارك, وبيكمل بعدها إلى داخل قلب نيويرك تايمز سكواير..وهنا وبالذات في شارع رقم واحد وأربعين بيدأ أهم جزء في برودواي، أو أشهر جزء: الجزء إللي بيضم أكثر من ٤٠ مسرح، هي الأشهر في العالم. في مسارح برودواي تعرض أهم الروايات في العالم لأشهر الممثلين إللي ممكن تسمع فيهم، وأشهر المسرحيات الغنائية مثل "الملك الأسد" و"كاتس" و "ماما ميا" وغيرها طبعاً كثييييير.. شارع برودواي بيكمل شوية وبيقرب فينا بعدها يا دوب كم خطوة من إمباير ستايت بيلدينغ. ل "يلامس" بعدها واحة خضراء من الأجمل في نيويورك هي "ماديسون سكواير بارك" ( Madison Square Park)، بجانب المبنى الأيقوني فلات آيرون بيلدينغ (Flatiron Building), وترجمته الحرفية "مبنى المكواه". ليكمل معانا بعدها كم دقيقة مشي إلي واحة أخرى بديعة هي يونيون سكواير بارك (Union Square Park)...وبيكمل كمان ليمر على مباني وشوارع من الأشهر في نيويورك..إبقى ذكرني نفتح موضوع عن أجمل تمشاية داخل نيويورك وإللي جزء منها راح يكون في برودواي..أنا بس أفضى شوية. ٨. فيفث آفينيو Fifth Avenue كمان شارع طويييييييييل..إشتهر في الستينات بإنتقال عدة عائلات غنية، حرصت على إنشاء بيوت ومباني بتتسابق ما بينها بالبذخ والإنفاق والأناقة المعمارية. شارع الأغنياء هذا إحنا ما إلنا فيه غير البحلقة. لليوم موجودة محلات، وبوتيكات وفنادق من الأفخم والأغلى في العالم. مثل برودواي، كمان فيفث آفينيو بيمر بجانب معالم، منتزهات ومباني مهمة في نيويورك أهمها سنترال بارك وبراينت بارك وروكفيللر سنتر ،وإمباير ستايت بيلدينغ وبيتقاطع مع برودواي بجانب ماديسون سكواير بارك بجانب فلات آيرون بيلدينغ. ٩. فلات آيرون بيلدينغ ( Flatiron Building) واحد من أكثر المباني المميزة معمارياً في نيويورك، وإللي لازم تتصور جنبه. الحقيقة هي إن المنطقة المحيطة بهذا المبنى رائعة جداً، بداية بالمطاعم (الصحية على فكرة) ومروراً بالمنتزه الظريف جداً ماديسون سكواير بارك. بسبب شكله المميز المبنى هذا ظهر في أفلام كثيرة، مثل أفلام سبايدرمان. ١٠. ليتل إيتالي (Little Italy) حارة مكونة من عدة شوارع أو بلوكس في داونتاون في مانهاتن، موجودة ما بين "سوهو" و "تشاينا تاون" (حارتين ثانيين لازم تشوفهم في نيويورك..راح تتعب في هذا البلد يآخي). القرن الثامن عشر شهد نزوح عدد من العائلات الإيطالية - أغلبها من جنوب إيطاليا - بحثاً عن لقمة العيش وحياة كريمة. هذه العائلات قطنت في المنطقة المحيطة ب "مولبيرري ستريت" ( Mulberry Street) ، إللي أخذت سمعة بعد هيك إنها من الأحياء الفقيرة في نيويورك..وبالتالي كان الطبيعي إن المنطقة هنا تتحول لبؤرة للفساد والجريمة. أصحابنا روبرت دي نيرو ومارتن سكورسيزي من مواليد ليتل إيتالي على فكرة. يقال إن هذا الحي بدأ يتقلص في السنين الأخيرة ويفقد هويته الإيطالية، لكن لحتى تشوف المتبقي من سحر هذه المنطقة بنصحك تركز على مولبيرري ستريت (Mulberry Street ) وجراند ستريت ( Grand Street) وإللي فيها كمية من المطاعم والمخابز، وإللي من أبوابها وشبابيكها راح تشم رائحة المخبوزات والأجبان إياها (الللللله) وبرضه راح تسمع الموسيقى الإيطالية. في سبتمبر بيتم هنا الإحتفال ب "سان جينارو"، لمدة عشر أيام، خلالها بتتحول شوارع هذا الحي لكرنفال، بينفجر ب محلات أكل الشوارع، ومنصات بتتقدم فيها موسيقى إيطالية. سؤالك الأخير: ليه ما ذكرتلك هنا معلومات عن تشاينا تاون و سوهو القريبين جداً؟.. هو فعلاً ممكن تزورهم، لكن بالنسبة إلي - وبالرغم من إن ليتل إيتالي أصغر من تشاينا تاون - إلا إنني شخصياً حبيتها أكثر. لكن لا شك إن زيارة تشاينا تاون وسوهو هي من الفعاليات المحببة إللي بنصحك تقوم فيها، لو كان الوقت بيسمح. ١١. رحلة إلى إليس آيلاند (ِEllis Island) أهمية هذه الجزيرة هي أهمية تاريخية. ملايين اللاجئين عبر التاريخ دخلوا هذه الجزيرة كمرحلة أولى في هجرتهم إلى أمريكا وبحثهم عن "الحلم الأمريكي". حالياً موجود متحف تحت إسم "إليس آيلاند ناشيونال ميوزيوم اوف إميجريشان ( Ellis Island National Museum of Immigration). هنا موجودة المكاتب إللي كانت تستقبل جموع اللاجئين، والقوائم بأسماءهم، مع وِثائق وصور وحقائب حقيقية من هذه الفترة. الوصول إلى إليس آيلاند بيكون بنفس السفينة إللي بتطلع من باتري بارك وإللي بتتوجه أولاً إلى تمثال الحرية وبتكمل بعدها ل إليس آيلاند. سعر التذكرة بيبدأ من ٢٧ دولار (وأكثر بحسب تفاصيل الرحلة) وشراءها ممكن أونلاين أو من مكتب شركة "ستياتو سيتي كروزس" ( Statue City Cruises) الموجود في باتري بارك. ١٢. زيارة الآنسة حرية نفس التذكرة والسفينة إللي بتطلع إلى إليس آيلاند بيطلع أولاً لتمثال الحرية (السعر عادة شامل للجزيرتين). أيقونة أمريكا ونيويورك هو تمثال الحرية وإللي بكل صراحة لازم زيارته بسبب شهرته العالمية. خلال شراء التذكرة ممكن بحسب السعر الصعود لأقسام محددة داخل التمثال، الشيء إللي أنا ما عملته صراحةً..لهذا الشيء مش راح أقدر أعطيك رأيي. شو أعمل في بروكلين برضة في بروكلين موجودة كمية كبيرة جداً من المعالم السياحية، بذكرلك منها: ١. بروكلين بريدج (Brooklyn Bridge) ٢. بروكلين بريدج بارك (Brooklyn Bridge Park) ٣. بروسبيكت بارك (Prospect Park) ٤. بروكلين ميوزيوم (Brooklyn Museum) ٥. بروكلين بوتانيك جاردن (Brooklyn Botanic Garden) ٦. نيويورك ترانزيت ميوزيوم (New York Transit Museum) ٧. بروكلين هايتز برومينيد (Brooklyn Heights Promenade) ٨. دومينو بارك (Domino Park) ٩. دومبو (Dumbo) ١٠. جينز كاروسيل (Jennas Carousel) ١١. جرين وود سيميتيري (Greenwood Cemetery) ١٢. بروكلين تشيلدرينز ميوزيوم (Brooklyn Childrens Meuseum) ١٣. نيويورك أكواريوم (New York Aquarium) ١٤. مانهاتن بريدج (Manhattan Bridge) ١٥. ويليامسبيرغ بريدج (Williamsburg Bridge) وغيرها كثيير..بس خلينا نكون منطقيين ونتعرف على جزء معقول منها، هو الأهم بنظري: ١. بروكلين بريدج (Brooklyn Bridge) أيقونة أخرى ياما شفناها في الصور. بروكلين بريدج وإللي عمره ما يقارب ال ١٥٠ سنة، بيربط داونتاون مانهاتن في بروكلين وطوله بيقترب من ال ٢ كلم. الرحلة من نيويورك لا تكتمل, لو ما مشيت فوق هذا الجسر المعلق لتوصل للجهة الثانية. بعد ما تعبر الجسر وتوصل بروكلين، إنزل تحت وإرجع بإتجاه النهر إللي الجسر بيعبره لتمشي على ضفاف النهر للنقطة التالية.. ٢. بروكلين بريدج بارك (Brooklyn Bridge Park) واقع بجانب الجسر مباشرة ومواجه للسكاي لاين في نيويورك..أيوة..من هنا راح تقدر تلتقط الصورة إللي ياما شفتها من زمان..ويا ريت ترتاح على واحد من الكراسي الكثيرة هنا لتستمتع بالمنظر المشهور. ٣. دومبو (Dumbo) ما وراء الجسر من الجهة الثانية موجود حي سكني عملاق إسمه "دومبو"، وإللي بيمتد ما بين بروكلين بريدج وجسر آخر إسمه مانهاتن بريدج. أيوه أنا عارف شو إللي بيدور بخيالك لما تسمع كلمة دومبو, لكن إسمحلي أقول لك إنك غلطان..دومبو هي إختصار ل " D own U nder the M anhattan B ridge O verpass". في دومبو موجود شارع ووشينجتون (Washington Street). في خلفية هذا الشارع موجود جسر مانهاتن الحديدي. المنظر هذا أو الصورة هذه هي من الأشهر في نيويورك، لهذا الشي أخذت شهرة معقولة عند السواح. يوم الأحد من كل أسبوع بيتواجد هنا سوق عام للأغراض المستعملة من الأشهر في نيويورك. طيب ليه دومبو بهذه الشهرة يعني.. دومبو كان أيام زمان منطقة صناعية مليانة بالمخازن، وفي الثمانينات تحولت لمنطقة مأهولة ومليانة بالفنانين الكحيانين، لأنه السكن فيها كان سعره رخيص..ومع الوقت إزدادت المعارض هنا. المعارض جابت ناس مثقفة أكثر، حاجتها للكلام والنقاش كبيرة..والكلام بدة قعدة وهيك..الشيء إللي يمكن بيفسر إزدياد المقاهي والمخابز والمطاعم هنا إللي بتخدم كل فئات الشعب هنا (الكلام هذا مبني على وقائع؟..والله لأ..إجتهاد مني يآخي!) من سقف مبنى "إمباير ستورز" (Empire Stores) - إللي بيجمع محلات وومطاعم ومكاتب - موجود "تايم آوت ماركت" (Time out Market) وإللي فيه عدة قاعات بتقدم مجموعة هائلة ومتنوعة من المأكولات ("فوود كورتس" باللهجة بتاعتنا)..بعد ما الواحد ياكل وجبته بالهناء والشفاء، ممكن الصعود إلى السقف ليواجه إطلالة مذهلة ل سكايلان نيويورك. ٤. بروكلين هايتز برومينيد (Brooklyn Heights Promenade) هذا الممشى الموجود ما بين بروكلين بريدج و "آتلانتيك آفينيو" هو من أجمل ال إييييه...مماشي ؟ (شو جمع ممشى يا معلم؟)..السبيل هذا يعد من كواليس كثير أفلام رومانسية. من هنا راح يواجهك سكايلاين نيويورك (داونتاون) وبروكلين بريدج. ٥. دومينو بارك (Domino Park) هذا المنتزه الصغير جداً موجود في منطقة ويليامسبيرغ في بروكلين؛ بقعة خضراء فيها ملعب صغير للأطفال، وملعب للكرة والطائرة وغيرها من الألعاب المائية. المنظر بيطل على نيويورك سكايلاين (داونتاون) و "ويليامسبيرغ بريدج" (Williamsburg Bridge). بالذات لما الظلام يحل الجلوس هنا والأستمتاع بالمنطر أمامك بيسرق الأنفاس. ٦. جرين وود سيميتيري (Greenwood Cemetery) مقبرة؟؟ جايبلنا مقبرة نزورها.. جريينوود بيضم تلال على ينابيع صغيرة ووديان وطرق ما بينها موجودة آلاف التماثيل والنصب التذكارية التاريخية وإللي تعد معمارياً تحف فنية. أهمية هذه المقبرة أيام زمان بتتجلى بالمقولة إللي إنتشرت أيامها وبتقول: "غاية إللي أهل نيويورك بيتمنوه هو تملّك بيت في فيفث آفينيو، التمشي في سنترال بارك، ودفن أهاليهم في مقبرة جرين وود. يعني المقبرة هذه هي ال "فيفث آفينيو" تبع المقابر! هنا موجود أكثر من ٦٠٠٠٠٠ قبر..لو فاضي وعندك وقت تعال هنا ..راح ترتاح نفسياً..بالليل.. شو أعمل في كوينز لضيق الوقت أنا للأمانة ما كنت دخلتها..لكن أضعف الإيمان هو إن أكتبلك قائمة بأهم معالم كوينز السياحية: ١. ميوزيوم أوف ذا موفينغ إيميج ( Museum of the Moving Image) ٢. كوينز زو (Queens Zoo) ٣. كوينز بريدج بارك (Queesn Bridge Park) ٤. فلاشينغ ميداوز بارك (Flushing Meadows- Park) ٥. جانتري بلازا ستايت بارك ( gantry plaza state park) زي ما حضرتكم شايفين...نيويورك فيها ما ينشاف لشهور كاملة..في المستقبل القريب موجودة عدة مقالات راح تتناول مميزات هذه المدينة..وفيها معلومات مفصلة ومهمة..للي بيحب.

هوي ان ، مدينة آسيوية من الخيال مقدمة مبسطة الموسم السياحي المدة العملة النقدية والأسعار خط الرحلة الوصول والمواصلات المبيت شو أعمل مقدمة مبسطة أي دولة في العالم دائما بترتبط بالأذهان بصورة محددة..صورة وجبة أكل مثلاً (البيتسا - إيطاليا)، أو معْلم سياحي مشهور (البتراء - الأردن). في حالة دولة فيتنام بتجينا صورة "هالونغ بي"..وأحياناً مدينة "هوي آن"، مدينة المصابيح المشهورة. هذه المدينة الصغيرة جداً، إللي عدد سكانها يا دوب ٧٥ ألف نسمة، هي الوجهة السياحية رقم واحد على قائمة كل واحد بيسافر إلى فيتنام. وعكس كثير أماكن ثانية، المدينة هذه مش "أوفرهايبد" أبداً..وإكتسبت شهرتها عن إستحقاق! الجزء التاريخي في البلد هو هو، زي ما كان من عصور طويلة وبيعطينا صورة عن فيتنام القديمة والتاريخية؛ بيوت صغيرة المدخل، مزينة بعمدان على مداخلها، مسقوفة بالحجار البرتقالية، جدرانها ملونة (الغالب هو اللون الأصفر أو البرتقالي) متلاصقة ومترتبة جنب بعض بتناسق لتكون أسراب ما بينها شوارع وأزقة كثيرة. في شوارعها أشجار آسيوية ظريفة الشكل، وأزهار صفراء اللون عادة، بتعطي المدينة رونق خاص فيها بس. ما بين أسقف واجهات البيوت بتتوزع مصابيح الورق الملونة والمضيئة "لانتيرن". هذه المصابيح أصبحت أيقونة وهوية المدينة، وهوس السواح فيها وصل لظهور "مدارس" لتعليم السواح طريقة بناء اللانتيرن..طبعاً كله بحسابه. ولأن الجزء التاريخي موجود بمحاذاة النهر إللي على جوانبة مغروسة أشجار أغلبها جوز الهند، فلا بد من سفن وقوارب تاريخية الشكل بتمر من هنا ولا هناك، وركابها عادة بالزي الفيتنامي التقليدي. بعكس هوي آن الحالية، في العصور الماضية كانت هوي آن من أهم النقاط في القارة بأشملها، بسبب الميناء الخاص فيها، ولإنها واقعة على طريق الحرير التجاري التاريخي. التعاملات التجارية في ميناء هوي آن كانت بتوصل من فرنسا والبرتغال والصين واليابان وغيرها. ولما ميناء دا نانغ المجاورة إبتدأ يكتسب أهمية مع الوقت، إبتدت أهمية هوي آن تقل..ويمكن هذا واحد من الأسباب إن هوي آن ما تضررت في الحروب اللاحقة مثل دا نانغ مثلاً. في أيامنا هذه هوي آن هي مدينة سياحية بحتة. تفصّلت على مقاس السواح الأجانب. أعداد السواح هنا في الموسم السياحي رهيبة! والمشي بشوارعها وأزقاتها بالذات بأوقات الظهر تكاد تكون مش محتملة. تدافع وتصوير، وناس بتصرخ بأذنك الوسطى، وناس بتشد قميصك بدها تبيعك شغلة إنت مش عارف شو هي أساساً! وما بين كل هذا وذاك كمية غريبة من الدراجات الهوائية والنارية و "الترايسايكل"، وتوووووت توت و تييييت تيت.. أغلب البيوت هنا في الجزء التاريخي تحولت لمحلات بتعرض بضائعها على البشر من ملبس ومأكل ومشرب، لكن جدير بالذكر إن الفيتناميين ما بيضغطوا على الواحد ليبيعوه بضائعهم، وبيتقبلوا الرفض دائما بلطف وإبتسامة! رغم كووول هذه المصائب، إلا إنني بحب أشدد على جمال وروعة ورونق هذه المدينة وحتمية دخولها مرة في العمر. يا ريت لو السلطات تتدخل وتنظم الأمور السياحية هنا. لكن..وما أحلى كلمة لكن..مع حلول فترة المساء, الضوضاء هنا بتقل..المصابيح بتضوي في المحلات والشوارع وحتى على سطوح القوارب، وسحر المدينة بيتجلى بأحلى صورة! تمشاية بالرجل ما بين البيوت والأزقة والمحلات أو على حافة النهر هي واحدة من أبسط وأرخص لكن أجمل التجارب اللي الواحد ممكن يعملها في حياته، ومش ممكن تنتسى! الموسم السياحي أفضل وقت للسياحة في هوي آن هو ما بين شهر ٢ و٤. بنصحك شخصياً إنك تختار فترة منتصف الشهر بسبب إحتفالية "لانتيرن" واللي بيعملوها هنا مع إكتمال القمر في كل شهر. المدة يومين إلى ٣ أيام كافيين تماماً. العملة النقدية والأسعار العملة هي "دونج" وإتكلمنا عنها بالتفصيل الممل.. هنا الأسعار في هوي آن مشابهة لمدن فيتنام الأخرى: رخيصة جداً، مع الأخذ بعين الإعتبار إن كل ما قربنا لوسط البلد، كل ما الأسعار أصبحت أغلى..طبيعي زي في أي مكان. الوصول والمواصلات أفضل وأكثر طريقة منطقية ومريحة للوصول إلى هوي آن هو عن طريق دا نانغ، ثالث أكبر مدن فيتنام، وإللي برضة الواحد راح يكون قضى فيها يومين أو ٣. طريق السفر من دا نانغ إلى هوي آن يا دوب مسافة ٢٥ كلم . وأسهل طريقة للسفر هي سيارة أجرة عن طريق تطبيق "غراب" بتكلفة حالية ما بين ١٥ إلى ٢٠ دولار. الطريقة الأخرى هي السفر في الباص من دا نانغ: باص رقم ١ بينطلق من عدة محطات في دا نانغ مثل الشاطيء أو بجانب جسر التنين، كل عشرين دقيقة ما بين الساعة ٥ ونصف صباحاً إلى السادسة مساءاً، وسعر التذكرة ٤ دولار تقريباً على الراس..عذراً قصدي على الشخص! مدة الرحلة من دا نانغ إلى هوي آن بتستغرق من ٣٠ إلى ٤٠ دقيقة. بالإمكان حجز التذاكر مسبقاً أونلاتين. أو إن الواحد بيسأل أي شخص..في دا نانغ ما فيش شخص ما دخل هوي آن..الأمر سهل فعلاً وما بده تخطيط طويل..ما تخاف. داخل هوي آن نفسها ما في حاجة للمواصلات. الجزء التاريخي وإللي فيه أغلب المعالم التاريخية بالإمكان بل لازم المشي فيه، لحتى الواحد يعيش اللحظة وهيك.. لو حبيت فيك تستأجر دراجة هوائية أو نارية من كثير محلات وفنادق بتعرض هيك أشياء في كل أنحاء هوي آن..بتمنالك طبعاً قيادة آمنة وشفاءاً عاجلاً، لإن حركة السير في فيتنام بشكل عام..يعني..إيييه..يوم لك ويوم عليك. المبيت مبدئياً أي منطقة في محيط الجزء التاريخي راح تكون عملية ومريحة. عن نفسي كنت إخترت فندق في الجزيرة المقابلة للجزء التاريخي وإللي إسمها "كام نام"، وبيربطها جسر قصير ضيق بيأدي للجزء التاريخي على طول وبسرعة. الفنادق كثيرة جداً في هوي آن، وأغلبها تابع لعائلات كاملة بتقوم على خدمات زوار الفندق بنفسها. يا ريت الواحد يسكن في فندق من هذا النوع من أجل دعم العائلات من أهالي هوي آن. وعلى فكرة: في كثير من هذه الفنادق بمستوى ٤ أو ٥ نجوم. يعني مسبح وفطور معتبر وصحي، ناهيك عن حرص العائلات هذه على فكرة إن زوارها يعيشوا تجربة فيتنامية على أصولها!، أسعار هذه الفنادق بتبدأ من ١٠ دولار لليلة وأكثر..وجزء من هذه الفنادق ممكن يكون واقع على النهر أو وسط مزرعة، أو ما بين حقول الأرز. التجربة "ال هوي آنية" فعلاً راح تكون مختلفة عن غيرها في فيتنام! شو أعمل في هوي آن ١. الجزء التاريخي الشارع الرئيسي هنا إسمه "تران فوه" وبتتفرع منه عدة أزقة وشوارع ما بين أسراب البيوت التاريخية. سبب شهرة هوي آن العالمية هو كونها بتمثل صورة عن ماهية الحياة في فيتنام القديمة، طبعاً مع تأثير في المعمار وغيره من القوى إللي كانت هوي آن في إحدى المراحل تحت سيطرتها، مثل الصين واليابان. للأسف الطابع الغالب على الجزء التاريخي - رغم سحره - هو سياحي تجاري بحت، أكيد بيفقد المدينة جزء من رونقها. لكن..تفهمنيش غلط، أرجوك..المدينة رغم كل هذا وبالذات في فترة المساء ساحرة لأبعد الحدود. النقطة المهمة إللي مش كل واحد يمكن بيعرفها، هي إن الواحد لازم يشتري تذكرة، لو كان بيرغب خلال الجولة داخل الجزء التاريخي إنه يدخل معالم تاريخية محددة، أغلبها معابد، أو متاحف. سعر التذكرة تقريباً ٥ دولار، وبتعطي الإمكانية بدخول ٥ من ٢٢ معْلَم. حوانيت بيع التذاكر موجودة على حدود الجزء التاريخي من كل الجهات. ٢. بيوت الأنفاق والله الإسم هذا أغرب من إللي فكر يكتبه..بس هو هيك..شو العمل؟! في هوي آن موجودة عدة بيوت داخل المدينة التاريخية، بالإمكان دخولها بترحيب من أهلها..هم عاوزينك تدخلها يآخي.. عرضها بيوحي إنها صغيرة لكن عمقها طويل جداً وكانه نفق بيمتد للشارع المحاذي من الجهة الثانية. البيوت التاريخية هذه أغلب أصحابها من أصل صيني..والله مش عارف شو هذه المعلومة إللي ولا إلها لازمة..    ٣. شاطيء آن بانج يمكن كل إللي بيهمنا ك سواح جاية لفترة قصيرة، هو التعرف على الجزء التاريخي في هوي آن. لكن لعشاق الكسل وشواء الجلد على شاطيء البحر، برضه في هوي آن موجودة عدة شواطيء جاهزة لهذه الأمور، أشهرها هو شاطيء آن بانج وإللي بيبعد مسافة ٢،٥ كلم عن وسط المدينة. ٤. إحتفال المصابيح الشهري معروف برضه بإسم "فستيفال المصابيح والقمر المكتمل"..أو شيء مشابه يعني.. (full moon lantern festival) أفضل يومين ممكن تختارهم من أجل القدوم هنا هو بوسط الشهر تقريباً وقت إكتمال القمر. هنا المدينة كلها بتزدان بأعداد كبيرة من المصابيح الملونة, والنهر بيمتلىء بالقوارب ذات المجدافين واللي بتكون مليانة بهذه المصابيح. منـظر المدينة بالليل بيخطف الأنفاس!! منظر القوارب البطيئة وهي بتنساب مع مياه النهر بالليل بهدوء، مع منظر المصابيح الورقية إللي طفل هنا أو هناك بيطلقها فوق سطح النهر، هو منظر قلما الواحد شافه أو راح يشوفه في حياته. السفر موجود يا عمي علشان لحظات من هذا النوع! أسعار الرحلة بالقارب هو ٧ دولار..سعر للجميع إللي راح يستأجروا القارب بقبطانه (أيوه..هذا الشاب العشريني الحبّاب، إللي لابس شبشب أبو إصباع ومسؤول عن القارب..خلينا نعتبره قبطان). القباطنه كلهم من الأظرف والله..ودائما متعاونين وبيحاولوا يلتقطوا الصور ومن غير مقابل..طيبة قلبهم بالفعل كبيرة..المشكلة الزغنطوطه هو إنه ما بيحكوا إنجليزي كثير..لكن..بواسطة إستعمال تعابير الوجه والأصوات الغريبة، مع الإيدين...والرجلين، وأصابع القدم إذا لزم..ممكن التفاهم دائماً ما بين الإنسان وأخوه.. خلال تخطيط الرحلة ل هوي آن بالإمكان مراجعة التاريخ الدقيق لهذه الإحتفالية. في الإنترنت موجودة دائماً معلومات كافية. ٥. جولة الدراجات الهوائية الفنادق هنا بتعرض جولات منظمة بالدراجات الهوائية، بتتجه عادة للمنطقة الزراعية المحيطة ب هوي آن، بغرض التعرف على حياة المزارعين والفلاحين هنا..أظن إن جزء من السواح راح ينبسط وجزء لأ..دائماً الأمر بيتعلق بإهتمامات الاشخاص. ولو كنت كسول وما بتحب الدراجات الهوائية، أطلب سيارة أجرة وتوجه إلى واحد من المقاهي الموجودة ما بين المزارع أو حقول الرز..المناظر الريفية هنا رائعة. مناظر من أحد المقاهي الموجودة وسط حقول الأرز

كراكوف ، تاريخ دولة في مدينة لوحدها مقدمة مبسطة الموسم السياحي المدة العملة النقدية والأسعار الوصول والمواصلات المبيت شو أعمل في كراكوف مقدمة مبسطة كراكوف، المدينة البولندية المشهورة إللي على طول محتلّة المركز الأول في بولندا سياحياً، والمركز الثالث من ناحية التعداد السكاني. كراكوف كانت عاصمة بولندا لمئات السنين وبتضم ليومنا هذا قرابة ال ٥٠٠٠ مبنى تاريخي في حالة ممتازة جدًا! والطابع الغالب على مركزها هو التاريخي..بالذات للمهتمين بتاريخ أوروبا، راح تنبسطوا في كراكوف. إللي بيراجع تاريخ بولندا راح يعرف إن هذه الدولة مرت بمصائب يشيب لها الولدان، خلال الحرب العالمية الثانية. وارسو مثلاً - العاصمة الحالية - تم تدمير أجزاء كبيرة جداً منها، وبالذات الجزء التاريخي إتدمر بشكل كبير. في نشاط غير مسبوق من قبل الشعب والحكومة قاموا ببناء الجزء التاريخي وفقاً للخرائط الموجودة من جديد. كراكوف من جهة ثاتية ما فقدت الكثير خلال الحرب العالمية، الشيء إللي بيجعل الجزء التاريخي فيها كامل ومتكامل، وبيجعل السياحة فيها تجربة فريدة وممتعة. شخصياً وبشكل عام تفاجأت بشكل كبير من التطور إللي شفته في بولندا وإللي ممكن تقارنه بسهولة مع دول غرب أوروبا. يعني الواحد ما كان متوقع الكثير من دولة في شرق أوروبا. الحكومة هنا ركزت بعد دخولها للإتحاد الأوروبي إنها تستغل الدعم المادي في تطوير البنية التحتية والإعمار وتطوير سوق العمل، وهذا الشيء واضح جداً في كراكوف، لكن برضة في المدن الكبرى مثل فروتسلاف وجدانسك والعاصمة طبعاً. المدن الكبيرة عامة مرتبة ومنظمة وعصرية وشوارعها الرئيسية نظيفة وأنيقة. أنا عارف إن كراكوف مش بشهرة باريس أو روما أو أمستردام..والله عارف..لكن أكاد أجزم إن التمشي في شوارعها المليانة بالبشر، وبالذات بمحاذاة نهرها خلال الصيف هي من الفعاليات إللي راح تضل بالذاكرة لفترة طويلة (من ناحية إيجابية طبعاً). الموسم السياحي بولندا تابعة للجزء الشرقي من أوروبا المشهور بدرجات حرارة خلال الشتاء ممكن تأدي لتشقق الشفاه وفقدان أصابع الرجلين. لكن طقسها أكيد - بحكم حدودها مع أوروبا الغربية - راح يكون معتدل أكثر من دول شرق أوروبا الأخرى. إمكانية إن يواجهك طقس مشمس ودافىء راح تكون عالية ما بين منتصف شهر ٦ و شهر ٩..أيوه..برضه هنا ممكن تطلع بالشورت والفانلة..صدقني. المدة ٣ أيام كاملين وراح يكونوا كافيين تماماً، لحتى تتعرف على أهم المعالم إللي راح نجيلها لقدام. لكن لو حبيت تتعرف على كل مبنى تاريخي، وتقلب كل حجر لتشوف شو موجود تحته (خذ بالك يطلعلك صرصور ولا حاجة)، مفضل تزيد كمان يومين. أنا بفضل إن الواحد يقوم برحلة إلى مدن بولندا المشهورة سياحياً مع بعض..مرة واحدة. المواصلات العمومية هنا متطورة وعالية المستوى (بالذات القطارات) ورخيصة نسبياً. ولو الوقت بيسمح برضه، ممكن دمج رحلة بالقطار إلى مدن مشهورة وعالمية من الدول المجاورة مثل براغ في التشيك، وبرلين في ألمانيا..وغيرها. العملة النقدية والأسعار العملة هي "زلوتي"، و ٤ زلوتي بيساووا دولار واحد. أغلب المحلات هنا بتحترم بطاقات الإئتمان (أكثر من دول أوروبا الغربية حتى) وقسم منها بتحترم اليورو برضة. الأسعار مقارنة بدول غرب أوروبا مثل ألمانيا، فرنسا أو هولندا رخيصة جداً. لكن ما بعد الحرب الروسية الأوكرانية إرتفعت الأسعار بشكل ملحوظ، بسبب إستقبال بولندا لنسبة كبيرة من اللاجئين الأوكرانيين. بالذات كراكوف أصبحت الأسعار فيها للاسف قريبة من الأسعار في مدن دول غرب أوروبا، لكنها لا شك بتضل أرخص بعدة مجالات مثل الفنادق والمواصلات (القطارات، سيارات الأجرة، الطيران). المبيت قولاً واحداً؛ لازم تختار فندق أو شقة في قلب المركز التاريخي، إللي هو نفسه محيط السوق التاريخي (ٍRynek Glowny), وهو الجزء المحاط بالمنتزه الطبيعي بيضاوي الشكل (الأخضر إللي شايفه). من هنا الحركة لاغلب الأماكن السياحية سهلة جداً وأغلبها ممكنة مشياً على الأقدام (لو كان الواحد رياضي يعني). لو ما وجدت مسكن ملائم في وسط البلد، راح تضطر تسكن بعيد شوية، وتتحرك مثلاًِ عن طريق سيارات الأجرة مثل أوبر، أو ترام أو باصات. الوصول والمواصلات الوصول إلى كراكوف المطار: مطار كراكوف هو مطار دولي بالإمكان السفر له من دول ثانية، وأظن إن أسعار الطيران إلى بولندا أرخص من وجهات أخرى في دول غرب أوروبا مثلاً. القطار: نظام القطارات في بولندا يا جماعة متطور ومريح جداً.هذا الكلام نابع من عدة تجارب قمت فيها، مش تجربة واحدة بس. بإمكان إللي بيسافر إلى مدن أخرى في بولندا أو أوروبا إنه يوصل كراكوف بالقطار.. شوية أمثلة؛ موجود خط قطار بيربط المدن الكبيرة في بولندا ببعض، منها بوزنان، وفروتسلاف الساحرة، و كاتوفيتسي، وكراكوف، و وارسو. من وارسو موجود طبعاً خط قطار إلى كراكوف (مدة ساعتين ونصف، بسعر ٤٥ إلى ٦٠ دولار)، ونفس الشيء مع مدن سياحية محبوبة مثل جدانسك (مدة خمس ساعات وربع، بسعر ٦٠ إلى ٧٥ دولار). المدن البولندية فيها الكثير تقدمه للزوار برضة موجودة قطارات من عواصم دول ثانية بتوصلك أحيانا مباشرة لكراكوف مثل القطار إللي بيربط مدينة براغ ب كراكوف (مدة خمس ساعات ونصف، بسعر ٤٠ إلى ٦٠ دولار تقريباً)، والقطار إللي بيطلع من برلين عاصمة ألمانيا إلى أغلب مدن بولندا الكبرى مباشرة (السعر إبتداءاً من ٤٠ دولار).. إيييه..تركزش معي زيادة عن اللزوم، الله يرضى عليك؛ الأسعار تقريبية وراح تكون أغلى كل ما حجزت متأخر وأرخص لو حجزت قبل السفر بفترة أطول. ولا شك إن أسعار الطيران أحياناً ما بين المدن داخل بولندا ممكن تكون مشابهة لأسعار القطارات..لهذا الشيء: الفحص والمقارنة قبل الحجز..القانون الأبدي! الباص: بالسنين الأخيرة إبتدت تطلعلنا شركات باصات عابرة للحدود داخل الإتحاد الأوروبي، أشهرها طبعا  فليكس - بوس (Flixbus) وإللي بتغطي مسافات طويلة ورهيبة في كل أنحاء أوروبا. وبالذات إلى كراكوف موجودة عدة خطوط جاية من جميع أنحاء أوروبا. بصفتي جربت السفر فيها أكثر من مرة؛ إن شاء الله راح يكون في مقال كامل عن هذه الطريقة في السفر داخل أوروبا قريباً. لكن خلينني أحكيلك هنا إن السفر بالباصات داخل أوروبا له إيجابيات (رخييييص) وسلبيات (أوقات السفر الطويييييلة أحياناً). المواصلات من مطار كراكوف إلى داخل المدينة (١١ كلم): الوصول إلى كراكوف القطار: من المطار إلى محطة القطار الرئيسية ممكن السفر بالقطار مدة عشرين دقيقة. التذاكر بالإمكان شرائها من الأجهزة المخصصة في محطة القطار التابعة للمطار أو داخل القطار من الجهاز المخصص أو من موظف القطار (مش عارف شو بيسموه بالعربي..أيييوه الكمسري). سعر التذكرة ما بين ٢ و ٤ دولار (يا حبيبتي يا شرق أوروبا!). الباص: موجودة عدة خطوط وشركات بتربط المطار بمحطة الباصات المركزية في كراكوف (موجود بجانب محطة القطار الرئيسية في كراكوف). أشهر هذه الشركات هي شركة فليكس بوس (Flixbus). سعر التذكرة بيتراوح ما بين ٥ و ٦ دولار وبتستغرق ٢٥ إلى ٣٥ دقيقة. سيارات الأجرة (التاكسي): طبيعي أسعار سيارات الأجرة تكون أعلى وبتتراوح ما بين ١٥ و ٢٢ دولار. بالإمكان تحميل تطبيق أوبر المحبوب هنا وإللي أكيد راح يكون أرخص. من محطة القطار الرئيسية (krakow glowny) أو محطة الباصات الرئيسية (موجودين بجانب بعض) إلى مركز المدينة (ٍRynek Glowny) مسافة ١،٦ كلم تقريباً (٢٠ دقيقة مشي). الأفضل إن الواحد يختصر التعب ويطلب أوبر من هنا ب ٣ دولار من أجل الوصول إلى وسط البلد. المواصلات داخل كراكوف الجزء التاريخي من المدينة مش صغير على فكرة ، لكن للي "رجله خفيفة" راح يستمتع ويتذوق سحر المدينة ويشوفها من أجمل نواحيها مشياً على الأقدام. كمية هائلة من الأزقة والشوارع والكافيهات والمباني التاريخية بتستنى الإستكشاف..أرجوك..تخليهاش تستنى.. تطبيق أوبر حبيبنا شغّال (لغاية كتابة هذه الكلمة) في بولندا، التحرك بسيارات الأجرة هنا نسبياً رخيص، وسهل الإستخدام، وآمن....لو الرجل مش خفيفة: داخل حدود المدينة بالإمكان شراء تذكرة واحدة لإستخدام خطوط الترام والباصات داخل المدينة. التذكرة سارية المفعول لمدة أربعين دقيقة بعد الختم (لا بد من ختمها في الجهاز الموجود قبل بداية الرحلة). لو سافرت في خط ترام معين لغاية آخر محطة ممنوع إستخدام التذكرة لرحلة أخرى. موجودة أنواع تذاكر بالإمكان إستخدامها لمدة محددة (تذاكر ل ٢٠ أو ٥٠ أو ٩٠ دقيقة، أو يوم، يومين، ٣ أيام، أو ٧ أيام). شراء التذاكر ممكن في المحطات، داخل بعض خطوط الترام والباصات، وفي الأكشاك الصغيرة إللي بتبيع سجائر, وصحف. هنا لزم التنويه إن الأسعار والقوانين ممكن تختلف من حين إلى آخر. فاااا..راجع الصفحات الخاصة بالبلد!! شو أعمل في كراكوف ١. السوق الرئيسي (Rynek Glowny) قلب المدينة النابض ليلاً نهاراً هو هذا الميدان الفسيح والمُحاط بأفخر المباني التاريخية، وإللي بتحوي داخلها مجموعة مهولة من المطاعم والمقاهي. أصحاب المطاعم هذه سمحوا لنفسهم بترتيب الطاولات والكراسي على حواف الميدان،،أيوه..لكن بأناقة. ترتيب الكراسي والطاولات والمظلات والتزيين بالزهور والنباتات الطبيعية، بتعطي رونق ربيعي معتبر! إللي بيزيد من حلاوة المنظر هو منظر عربات الخيول البيضاء، بخيولها البديعة وأصحابها بزيهم الرسمي، إللي بيعرضوا خدماتهم على السواح، ليقوموا بجولة في شوارع وأزقة الجزء التاريخي، وإللي ممنوع السيارات تمشي في أجزاء منه. مساحة هذا السوق التاريخي مستطيل الشكل هي الأكبر في بولندا. كمية المباني المهمة هنا (تاريخياً) كبيرة. خلينا نستعرض جزء مهم منها: كنيسة ..إييييه..هذه .. Kościół Wniebowzięcia Najświętszej Marii Panny كان نفسي ألاقي إسم يترجم هذه "الرواية"..بس الترجمة الإنجليزية طلعت أطول يا أخي.. هذه الكنيسة هي الأشهر في كراكوف.. الدليل؟..تعال معي لنتفرج على شوية بشر دائماً متجمهرين أمام الكنيسة هذه، وأبصارهم متجهة لقمة الكنيسة. ومن الكنيسة بنسمع أعزوفة بطيئة حزينة على البوق، وحال إنتهاء هذه الأغنية فجأةً، بنشوف كل المتجمهرين بيلوحوا بإيديهم بالتحية في إتجاه الكنيسة..شو القصة؟: الحقيقة هنا عندنا خلفية تاريخية حقيقية: يومياً في أول دقيقة من كل ساعة تُعزف هذه المعزوفة إللي بنسمعها من الكنيسة في أرجاء الميدان. وإللي بيتم عزفها للتذكير بحارس البرج إللي مات مصاب بسهم من جنود التتار في سنة ١٢٤١، خلال عزفه على البوق من أجل تحذير الأهالي هنا من هجوم التتار. إحتراماً لذكراه بيتم عزف هذه المعزوفة كل ساعة زي ما ذكرنا. قاعات القماش ( Sukiennice ) في وسط الميدان موجود مبنى تاريخي طويل ومميز وإللي بيضم بداخلة أروقة شبيهة بالأنفاق. من القرن الثالث عشر كانت هذه الأروقة بتضم عدة محلات لتجار القماش. حالياً موجودة محلات لبيع مقتنيات تذكارية (souveniers) ومجموعة كافيهات صغيرة. في الطابق إللي فوق موجود متحف تاريخي. بوابة فلوريان (Brama Floriańska) هذه البوابة هي الوحيدة الباقية من نوعها وإللي كانت جزء من سور البلد التاريخي. أجمل ما في هذه البوابة هي المنطقة المحيطة فيها يميناً ويساراً: الجزء هذا من الحائط هو شبه "مُحْتل" حالياً من تجار اللوحات الفنية، إللي بيتم تعليقها على الحائط نفسه، في منظر متناسق ساحر، قلما الواحد يشوفه في أماكن ثانية. بلانتي بارك لو رجعت لخارطة وسط المدينة التاريخي راح تلاحظ وجود منطقة خضراء بيضاوية الشكل محيطة بالمنطقة. هذا هو بلانتي بارك، المنتزه الطبيعي لأهل البلد، إللي أصبح مخصص للتمشي والقراءة والتجمع وتبادل الحديث في أحضان الطبيعة الخضراء. خذ كأس قهوة من واحد من عشرات المطاعم والمقاهي الموجودة، وتمشى في يوم مشمس في طرقات هذا المنتزه..فعالية بسيطة ورائعة تبدأ فيها يومك في كراكوف، بالزبط زي أهل المدينة. ٢. قلعة فافيل ( Zamek Królewski na Wawelu) خلينا نطلع برة المركز شوية صغيرة.. شوف، أنا ذكرتلك هنا قلعة فافيل..لكن إحنا بصدد الكلام عن تل فافيل..الموجود عليه قلعة فافيل..وكاتدرائية فافيل..وبرج فافيل.. ومنحوتات فافيل..كله فافيل..! ٢٢٨ متر بيبلغ علو تل فافيل المطل بشموخ على حافة النهر. على تل فافيل تم بناء القلعة والبرج إللي كانوا بنفس الوقت المقر الملكي في العصور الماضية. بحسب الأسطورة: كان في نبيل (أو إقطاعي بتعريف ذاك الزمان) إسمه كراك (مش إللي في بالك!)، وإللي بفضله تم طرد تنين مخيف كان موجود تحت تل فافيل. طبعاً ما فيش داعي أقول إن الأسطورة بتحكي إن إسم المدينة كراكوف تم إتخاذه من إسم الأخ كراك، وإسم التل تم إتخاذه من إسم التنين الأُسطة فافل..أما قصة عبرة بصحيح! سنة ١٩٧٠ تم إنشاء تمثال حديدي على شكل التنين فافل وإللي أحيانا بيقذف نيران من فمه..وين موجود بالزبط؟..مش راح تغفل عن مجموعة السواح الهائلة إللي واقفة تصور..الناس إنجنت.. على التل برضه موجودة كاتدرائية فافيل، وإللي بتضم أضرحة ملوك كراكوف. من أجل التعرف على القلعة والمباني المحيطة فيها بالإمكان شراء التذاكر على باب القلعة نفسها..أسعار التذاكر بتبدأ من ١٠ دولار وأكثر بحسب الأجزاء المُتاح دخولها (الخزنة الملكية، مخزن الأسلحة، الكاتدرائية..وهكذا..). طبعاً ممكن شراء التذاكر أونلاين، وإللي راح تكون أرخص شوية. زي إللي تعودنا عليه؛ مليااان شركات سياحية وغير سياحية بتعرض جولات منظمة مع مرشد على تل فافيل بأسعار مختلفة.. خلي بالك قبل ما تحجز! ٣. كاتشيميرش ( Kazimierz) بعيد عن مركز المدينة التاريخي مسافة ١٥ دقيقة مشي، موجود حي تاريخي آخر هو حي كاتشيميرش؛ الحي اليهودي إللي عمره أكثر من ٥٠٠ سنة. هذا الحي كان مركز الجالية اليهودية في بولندا كلها، وفيه تم بناء أول كنيس في بولندا..في سنين لاحقة شهدت هذه المنطقة نزوح اليهود من مناطق كثيرة في أوروبا. وخلال الحرب العالمية الثانية تم توزيع سكان كاتشيميريش على معسكرات التركيز. بعد الحرب العالمية الثانية شهدت هذه المنطقة حركة نزوح جديدة إلها. حالياً هذه المنطقة هي مركز لمعارض فنية عديدة، مقاهي ومطاعم، الغالب عليها هو الطابع الصحي..وأكيد..مباني تاريخية.. ٤. تل كراك ( Kopiec Kraka) موجود في الجانب الجنوبي من البلد (بعيد عن الجزء التاريخي) ومن على قمته موجودة إطلالة على المدينة، لا شك إنها الأجمل لمدينة كراكوف. ٥. نهر فيسلا (Wisla) في نفس اليوم إللي راح تزور فيه قلعة فافيل: بعد ما تخلص إنزل من على التل، راح تلاقي النهر أمامك. التمشي بمحاذاة النهر على جوانبه الخضراء والطرق المشقوقة بعناية ونظام هي فعالية محبوبة عند نسبة كبيرة من أهل البلد..على حواف النهر موجودة مقاهي بسيطة، لكن لو مشيت كمان شوية راح توصل لمبنى فوروم ( Forum Przestrzenie), وإللي فيه مجموعة من المطاعم والمقاهي المعتبرة، من ناحية الديكور ومن ناحية الخدمة برضة. هنا موجودة جلسات مريحة داخل وخارج المبنى على حافة النهر. كراكوف زي ما حكينا فيها مباني تاريخية ياما..وكل إللي ذكرته هو نقطة من بحر، لكنه الأهم وكافي في زيارتك الأولى والقصيرة لأيقونة بولندا.

نيس ، المدينة رقم واحد في فرنسا مقدمة مبسطة الموسم السياحي المدة العملة النقدية والأسعار الوصول والمواصلات المبيت شو أعمل في نيس مقدمة مبسطة البطة السوداء..ما في شك إن مدينة باريس أخدت في السنين الأخيرة سمعة سيئة نسبياً..يمكن بسبب إللي الناس بتتوقعه قبل دخول باريس، وإللي بتشوفه على الحقيقة بعد ما تزورها. ومع إن أنا بشكل عام ضد تكوين رأي بسرعة عن أي مكان الواحد بيدخله لأول مرة (باريس فيها كنوز ومعالم سياحية رائعة ما أخذت حقها!) إلا إن الأمر في النهاية أذواق. ومين أنا لأحكي لواحد إنه لازم يُعجب بالبلد الفلاني أو غيره يعني! مدينة نيس الفرنسية حسيتها جاية تطبطب على كل واحد خاب ظنه بعد دخول باريس. جاية تحكيله: تعال يا "خبيبي" شوف الأناقة والجمال والمعمار الفرنسو-إيطالي (من عندي هذه، بس أنت فهمتني أكيد). جزء لا بأس فيه من السواح بيعتبر نيس أجمل مدن فرنسا على الإطلاق..وفعلاً..في أي "رانكينغ" أوروبي في الإنترنت لا بد إن نيس تحتل مكان ما بين أجمل ١٠ مدن في فرنسا. مدينة نيس هي عاصمة إقليم كوت د آزور، الريفييرا الفرنسية في جنوب فرنسا يا سيدي. بغض النظر عن الفترة إللي ناويين نقضيها في نيس، المفروض والمنطقي إن الرحلة تكون مطوّلة بغرض زيارة المناطق القريبة من نيس، والموجودة عادة على إمتداد الساحل. جنوب فرنسا يا معلم موجود فيه جواهر على إمتداد الساحل بتستحق الوقوف أمامها والتعرف عليها، مثل موناكو وكان وأنتيبيس وسان تروبيه، وإللي راح نحكي عنها في المستقبل القريب في مقال لوحده إن شاء الله.. ما تخاف! لا تنسى برضة إن الحدود الإيطالية والإسبانية القريبة من جنوب فرنسا وإللي أكيد يعني لازم إستغلال الفرصة وزيارتها بنفس الرحلة..شرط إن الميزانية، وأكيد الوقت - وقبل كل شيء المدام!! - يسمحوا بهذا الشيء. الموسم السياحي شهر ٦ و٧ هي أفضل الشهور للسياحة في المدينة وفي جنوب فرنسا بشكل عام. الطقس بيكون معتدل جداً..بإختصار هنا راح يواجهك أفضل طقس ملائم للسياحة..يا سلاااام.. لكن بشكل عام ممكن الإستمتاع في نيس في فترة الخريف والربيع برضة..على غرار نبلاء إنجلترا وروسيا إللي كانت نيس وجهتهم الأولى من مئات السنين. المدة ٤ أو ٥ ليالي في مدينة نيس لوحدها كافيين، لحتى تتعرف على المدينة بمعالمها، بشواطئها، بمحلاتها وبأسواقها. لكن لو عاوز برضه تتجول في جنوب فرنسا، إذن أسبوعين في نيس وباقي المناطق مبدئياً كافيين، طبعاً فما فوق..(أنت طبعاً حفظتني..وعلى قد فراشك مد رجليك). العملة النقدية والأسعار العملة هي اليورو زي العادة في دول الإتحاد الاوروبي. والأسعار عالية. نيس وجنوب فرنسا على فكرة هيك هيك من أغلى مناطق فرنسا وأوروبا بشكل عام. وبعد الكورونا والحرب إياها الدنيا ولعت هنا..لهذا الشيء هم كم يوم بس مش أكثر. أسعار الفنادق بتكلف كمثال إبتداءاً من ١٠٠ يورو لليلة في فندق عادي ومتوسط (٣ نجوم) خارج وسط البلد. المبيت والله مش عارف شو أحكيلك، لأنه في إمكانيات لا تعد ولا تحصى للمبيت في نيس أو غيرها..لكن..خلينا نفترض إنك راح تسمع لنصيحتي: لو ناوي على زيارة نيس وبس، يا ريت تختار مركز المدينة...مركز المدينة؟؟؟ مش غالي؟؟؟..أيوة غالي لكن هيك بتضمن تستغل وقتك على أفضل وجه. المنطقة المحيطة في بلاس ماسينا ( plas masena) هي مركز الحدث! من هنا ممكن تتوجه مشياً على الأقدام لأغلب المعالم السياحية. لو ما سمعت نصيحتي يا ريت تختار مكان بجانب وسيلة المواصلات إللي راح توصلك لوسط البلد. الإمكانية الثالثة هي السكن في قرية أو مدينة قريبة بجانب نيس وإللي فيها السكن حتماً راح يكون أرخص بمراحل. طبعاً ما فيش حاجة أوصيك باختيار سكن بجانب محطة الباص أو القطار، بحيث إن السفر اليومي - ذهاباً وإياباً - إلى نيس يكون سهل..وهو فعلاً بهذه السهوله. مثال على كلامي هي قرية كاجنيس سور مير ( Cagnes-sur-Mer ) وإللي السفر منها إلى نيس بيستغرق قرابة ٢٥ دقيقة بس وبتكلفة ٢ إلى ٥ يورو. أدخل على جوجل مابس وشوف القرى والمدن القريبة على نيس وشوف أسعار الفنادق فيها. الخطوة هذه ممكن تختصر فيها مئات اليوروهات (معلش..جمع مؤنث سالم لكلمة يورو). الوصول والمواصلات الوصول إلى نيس ممكن عن طريق المطار الموجود فيها..منطقي طبعاً..و يعتبر ثالث أكبر مطار في فرنسا. من مطار نيس إلى داخل المدينة: الترام: خط رقم ٢ بيربط المطار بمركز المدينة، وبيطلع من ترمينال ١ وبرضة ترمينال ٢ وبيمر بجانب الممشى على إمتداد "بروميناد ديس انجلايس" ومركز المدينة التاريخي. بيطلع كل ١٥ دقيقة من المطار ومدة السفر تقريباً عشرين دقيقة. شراء التذكرة من الأجهزة المخصصة الموجودة في المحطة. سعر التذكرة تقريباً ٢ يورو. الباص: "نيس - إيربورت - إكسبرس" بيطلع من ترمينال ١ و٢ بتكلفة ٦ يورو: خذ باص رقم ٩٨، لو كان الإتجاه المُراد هو مركز المدينة التاريخي أو الشاطيء، وإللي بيسافر كل عشرين دقيقة حتى الساعة العاشرة مساءاً. شراء التذكرة ممكن داخل الباص ولازم ختم التذكرة في الجهاز المخصص لها. التذكرة تتيح السفر لمدة ٧٥ دقيقة وبالإمكان إستخدام الترام أو باصات أخرى خلال هذه المدة. الباص رقم ٩٩ بيطلع برضة من ترمينال ١ و٢ زي باص رقم ٩٨ وبيسافر كل ٣٠ دقيقة لغاية الساعة ٩ مساءاً وبيوصل بجانب محطة القطار الرئيسية. التاكسي: للي بيحب صرف الفلوس عمال على بطال ممكن طبعاً إستخدام التاكسي وإللي بيكلف أقل شيء ٣٠ يورو وأكثر إلى المدينة. وإللي مجرب بيعرف إن سواقين التاكسي بيحاولوا الإستغلال أحياناً. من مطار نيس إلى مدن أخرى: من مطار نيس ممكن السفر في المواصلات العمومية لأماكن أخرى كثيرة في جنوب فرنسا.، أهمها: موناكو: من محطة سانت أوجوستين بجانب ترمينال ١ (بعيد عن ترمينال ١ تقريباً ٧٠٠ متر) ممكن السفر بواسطة القطار إلى محطة القطار الرئيسية في موناكو (مدة ٣٥ دقيقة).. وباص رقم ٨٠ (Nice Airport Express Bus) بيطلع من ترمينال ٢ إلى موناكو برضة. كان Cannes: من محطة نيس سانت اوجوستين موجود قطار بيسافر إلى مدينة كان. برضة موجود باص ٦٢٠ من محطة إيروبورت برومينادة من ترمينال ١ في المطار، وإللي بيسافر مرتين في الساعة، مدة ٧٠ دقيقة. موجود على حد علمي قطارات بتسافر برضة إلى مدينة مارسيليا. المواصلات داخل نيس: طول ما أنت ساكن في المنطقة المحيطة في بلاس ماسينا غالباً مش راح تحتاج إلا رجليك يا معلم. ولو كان في مشوار أبعد: موجود الترام وبرضة باصات بتغطي معظم مساحة نيس. سعر التذكرة للسفرية الواحدة تقريباً ٢ يورو، وطبعاً في أسعار تذاكر ليوم كامل أو أكثر بأسعار أفضل. شو أعمل في نيس ١. فيو نيس (Vieux Nice): رقم واحد بالنسبة لي! فيو نيس هو مركز المدينة التاريخي، إللي لسبب من الأسباب احد أسماؤه القديمة كان "باب السوق"..أيوة إسم عربي! هذا الجزء من المدينة هو كمية كبيرة من الأزقة الأفعوانية والضيقة، إللي بتغري بالإستكشاف والضياع فيها. أحيانا ً بتشوف محل هنا ولا هنا بيبيع مأكولات شعبية أو حلويات أو محلات ملابس. وما بين الأزقة راح تواجهك كمية محترمة من المعارض الفنية الصغيرة. هذه الأزقة بتنتهي أحياناً إلى ميادين تاريخية مزينة بأشجار الصنوبر أو الزيتون، ومحاطة بالمباني التاريخية إللي بتذكر..ب إيطاليا!..شوف مثلاً "بلاس روزيتي" (la place rossetti): كل شيء هنا بتحسة إيطالي؛ المباني، المطاعم.، الموسيقى إللي طالعة من المطاعم، الجرسونات إللي داخلة للمطعم.. ...يمكن لأن نيس كانت لفترات تحت حكم ممالك إيطالية؟. في الجزء التاريخي موجودة عدة كنائس تاريخية وأسواق بتبيع مأكولات بحرية، وبضائع من كل الأنواع. ٢. كولين دو شاتوه (colline du château): شايف هذا الجبل...إييه..لأ شو جبل..يا دوب تل..وهو التل الوحيد وسط البلد بجانب الجزء التاريخي إللي حكينا عنه. كلهم ٢٠٠ درجة بس لازم تطلعهم صعوداً على سفح الجبل، وبعد وصولك راح تواجهك أجمل إطلالة ممكن تشوفها لمدينة نيس. هنا موجود مقهى أسعارة كانت معقولة أيامها..مزمز فنجان القهوة وتمتع بالمنظر الساحر.. ٣. بلاس ماسينا (plas masena): هذا الميدان هو قلب المدينة إللي موجود وسط أغلب المعالم والأماكن المحبوبة في المدينة. الميدان محاط بالمباني إللي حيطانها مطلية باللون الأحمر وشبابيكها باللون الأزرق. ما بين المباني بتتفرع عدة طرق بتنفجر بعشرات المطاعم والمقاهي المعتبرة..وأسعارها يعنيييي...برضه معتبرة! بجانب هذا الميدان موجود واحد من أشهر الشوارع "بوليفارد"؛ أفينيو جان ميديسين ( L'avenue Jean-Médecin) . في هذا الشارع الحركة ما بتوقف. الأجواء هنا بتغري بالجلوس بإحدى المقاهي الأنيقة بكراسيها وطاولاتها الصغيرة والمزخرفة عادة بالأسود والأبيض والأحمر. تعال إجلس مع أهل المدينة أنيقي الملبس، وأقعد وتأمل البشر إللي رايحة جاية، وأنت ترتشف فنجاناً من القهوة، لتتذكر أن من راقب الناس مات هماًَ!..في هذا الشارع موجود المجمع التجاري الفخم جاليريس لافاييت وإللي متخصص ب خراب البيوت وإزدياد حالات الطلاق..أسعارهم نار مستعرة! على الجهة الأخرى من بلاس ماسينا موجودة نافورة مشهورة فيها تمثال أبيض ل "أبولو"، محبوب جداً عند المصورين..ليه مش عارف؟! المهم إنك لو كملت مشي وراء النافورة، الطريق الممتد هنا مكمل معك لواحدة من أجمل بقع نيس. بروميناد ديس أنجلايس. ٤. بروميناد ديس أنجلايس ( La promenade des Anglais) وترجمته الحرفية هي "ممشى الإنجليز"..الإنجليز؟؟ في فرنسا؟؟..أيوة..وهذا الإسم مش جاي من فراغ. إبتداءاً من القرن الثامن عشر إبتدت أعداد السواح الإنجليز تزداد هنا بالذات بفترة الشتاء، لأن نيس طقسها معتدل..مش زي طقس إنجلترا المزري صراحةً. السواح الإنجليز وإللي كان أغلبهم من الأغنياء إقترحوا هنا إنشاء ممشى على إمتداد الساحل ليتمشوا عليه (ممشى علشان يتمشوا..إللي لقبني عبقري ما كذب!)، وهكذا كان؛ السلطات قامت بإنشاء الممشى بطول بيصل ل ٧ كلم. في أيامنا هذه الممشى هذا مقسم إلى جزء للمشاة (عبقري بقول لك) وجزء لراكبي الدراجات الهوائية، ووراءهم بيمتد شارع للسيارات على حافته موجودة كافيهات معتبرة وفنادق فاخرة، أشهرها الفندق الأيقوني هوتيل نيجريسكو. للأسف زي مناطق أخرى في جنوب فرنسا برضة هنا جزء من الفنادق هذه إحتكرت أجزاء من الشاطىء من أجل إستجمام زبائنها الكرام المليونيرات..ما علينا.... ٥. كورس ساليا ( Cours Saleya) : هذا السوق موجود في الجزء التاريخي في المدينة إللي سبق وحكينا عنه. هذا السوق بيفتح من الساعة السادسة صباحاً في أيام الثلاثاء حتى الأحد، وبيعرض كل إللي قلبك بيحبه، مثل أنواع من الجبن ولا مرة سمعت فيها، وأنواع من الزيتون أول مرة بشوفها، وأنواع من المأكولات أول مرة بجربها..وأسعار أنا متاكد إنني مش راح أدفعها.. بعد الظهر وحفاظاً على التقاليد بيكون الغالب هو بيع الزهور: نيس كانت من أياام زماااان معروفة بإنتاج القرنفل وبيعه. السوق مش صغير على فكرة وموجودة على جوانبه برضة كمية مطاعم مش بسيطة..أسعارها مش بسيطة برضة. ٦. بورت نيس لومبيا ( Port Lympia) : ذكرت في النقطة رقم ٢ تل كولين دو شاتوه..بعد ما تشوف نيس من فوق خليني أنصحك بعد النزول إنك ما ترجع للبلد بل تمشي بإتجاه الساحل (كلهم كم خطوة، مش مسافة يعني) وتتجه شمالاً لحتى توصل لإطلالة على بورت لومبيا..ميناء صغير مليان بالقوارب والسفن، وفي الخلفية من الجهة الثانية بيوت تاريخية ملونة..منظر حلو جداً. ولو حبيت لما ترجع بإتجاه البلد (عن طريق الممشى المحاذي للبحر) راح يواجهك الإختراع إللي طفح علينا في كل مدينة في العالم؛ الحروف الكبيرة إياها.. إنك يعني.. بتحب مدينة نيس وهيك..إطقش صورة وإرجع للبلد.. هذه هي المعالم الرئيسية في مدينة نيس، مع العلم إن موجودة كمية كبيرة من المتاحف والكنائس ومعالم أخرى بتهم قسم من الناس وقسم لأ، أذكر لك منها: متحف ماتيس، متحف مارك شاغال، كنيسة نوتردام (أيوة..لأ مش إللي في بالك)، بروميناد دو بويلون، كاتدرائية نيس، مبنى الأوبرا، جاردين ألبرت الأول، بارك فونيكس وغيرها.. على إمتداد كوت د آزور مليان مدن وقرى بتسوى السياحة ولازم دمجها خلال الرحلة إلى نيس..قريباً مقال كامل عن أجمل البقع الموجودة في جنوب فرنسا.